អភិបាលខេត្តកំពង់ធំ ដឹកនាំគណៈប្រតិភូឡាវ ទស្សនកិច្ចរោងចក្រកែច្នៃគ្រាប់ស្វាយចន្ទីដ៏ធំមួយនៅស្រុកកំពង់ស្វាយ
ខេត្តកំពង់ធំ ៖ ឯកឧត្តម នួន ផារ័ត្ន អភិបាលខេត្តកំពង់ធំ នាព្រឹកថ្ងៃទី១៥ ខែកញ្ញា ឆ្នាំ២០២៥ បានដឹកនាំឯកឧត្តម…
ខេត្តកំពង់ធំ ៖ ឯកឧត្តម នួន ផារ័ត្ន អភិបាលខេត្តកំពង់ធំ នាព្រឹកថ្ងៃទី១៥ ខែកញ្ញា ឆ្នាំ២០២៥ បានដឹកនាំឯកឧត្តម Athsaphangthong SIPHANDONE អភិបាលរដ្ឋធានីវៀងច័ន្ទន៍ នៃសាធារណរដ្ឋប្រជាមានិតឡាវ និងគណៈប្រតិភូ អញ្ជើញទស្សនកិច្ចរោងចក្រកែច្នៃគ្រាប់ស្វាយចន្ទី ក្រុមហ៊ុន MIRARTH Agritech របស់ប្រទេសជប៉ុន ដែលកំពុងវិនិយោគធ្វើការកែច្នៃគ្រាប់ស្វាយចន្ទីនាំចេញ មានទីតាំងស្ថិតក្នុងភូមិត្រពាំងអារ័ក្ស ឃុំជ័យ ស្រុកកំពង់ស្វាយ ខេត្តកំពង់ធំ ។ នេះបើយោងតាមផេកក្រសួងមហាផ្ទៃបានប្រកាសនាថ្ងៃទី១៥ ខែកញ្ញានេះ ។
នោះក្នុងនោះដែរ រោងចក្រកែច្នៃស្វាយចន្ទីនេះ នឹងក្លាយជាសសរស្តម្ភសេដ្ឋកិច្ចរបស់ខេត្តកំពង់ធំ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។ ដំណើរទស្សនកិច្ចស្វែងយល់អំពីដំណើរការនៃការកែច្នៃគ្រាប់ស្វាយចន្ទី ថ្នាក់ដឹកនាំខេត្តកំពង់ធំ រួមជាមួយគណៈប្រតិភូនៃសាធារណរដ្ឋប្រជាមានិតឡាវ ទទួលបានការស្វាគមន៍យ៉ាងកក់ក្តៅពីគណៈគ្រប់គ្រងក្រុមហ៊ុន MIRARTH Agritech និងជួបសំណេះសំណាលជាមួយ និងបងប្អូនកម្មករ-កម្មការិនី ដែលកំពុងបម្រើការងារនៅទីនោះផងដែរ ។
ជាមួយគ្នានោះដែរ គណៈគ្រប់គ្រងក្រុមហ៊ុន MIRARTH Agritech បានជម្រាបជូនគណៈប្រតិភូ អំពីខ្សែច្រវាក់នៃការកែច្នៃគ្រប់ស្វាយចន្ទី ដោយរួមទាំងបច្ចេកទេសរបស់ក្រុមហ៊ុនមួយចំនួនទៀត ។
បច្ចុប្បន្នក្រុមហ៊ុនបានទទួលទិញគ្រាប់ស្វាយចន្ទីស្រស់ពីសហគមន៍មួយចំនួន ដូចជាសហគមន៍សាលាវិស័យ សហគមន៍ឃុំក្រយា និងសហគមន៍សន្ទុក ព្រមទាំងសហគមន៍ទំនើបទាំង៣ ស្ថិតក្នុងខេត្តកំពង់ធំផងដែរ។ក្រុមហ៊ុនកំពុងធ្វើការកែច្នៃគ្រាប់ស្វាយចន្ទីស្រស់ចំនួន ៦តោនក្នុង១ថ្ងៃ (សមត្ថភាព១០តោនគ្រាប់ស្រស់ក្នុង១ថ្ងៃ) ដើម្បីធ្វើការនាំចេញទៅទីផ្សារប្រទេសជប៉ុន និងសហភាពអឺរ៉ុប។ ក្រុមហ៊ុនគ្រោងនឹងពង្រីកសមត្ថភាពកែច្នៃគ្រាប់ស្វាយចន្ទីស្រស់ឱ្យឡើងដល់ជាង ២ម៉ឺនតោនក្នុង១ឆ្នាំ នាពេលខាងមុខ៕
ចែករំលែកព័តមាននេះ