ខេត្តកំពត ៖ សំណង់ជាម៉ូតផ្ទះលំហែដែលគេដឹងថាមានចំនួន៣០០ខ្នង សាងសង់ដោយក្រុមហ៊ុនបរទេសមួយ និងចំណាយប្រាក់អស់រាប់លានដុល្លាររួចទៅហើយ គឺជាសំណង់ដែលគេសាងសង់នៅលើភ្នំចំនួន២ ក្នុងភូមិទ្វារថ្មី ឃុំព្រៃថ្នង ស្រុកទឹកឈូ និងកំពុងធ្វើឱ្យមានការទាក់ទាញសម្រាប់អ្នកកាសែត…
ខេត្តកំពត ៖ សំណង់ជាម៉ូតផ្ទះលំហែដែលគេដឹងថាមានចំនួន៣០០ខ្នង សាងសង់ដោយក្រុមហ៊ុនបរទេសមួយ និងចំណាយប្រាក់អស់រាប់លានដុល្លាររួចទៅហើយ គឺជាសំណង់ដែលគេសាងសង់នៅលើភ្នំចំនួន២ ក្នុងភូមិទ្វារថ្មី ឃុំព្រៃថ្នង ស្រុកទឹកឈូ និងកំពុងធ្វើឱ្យមានការទាក់ទាញសម្រាប់អ្នកកាសែត ។ សំណង់ផ្ទះលំហែម៉ូតជាវីឡានេះ គេសាងសង់តាំងពីឆ្នាំ២០១៩មកតែមិនទាន់ហើយ មានន័យថា សាងសង់បានត្រឹមតែបុកគ្រឹះ និងបុកសសរឡើង ហើយក៏ទុកចោល ។
បើសិនជាមើលត្រឡប់ក្រោយបន្តិចនោះ គឺការបោះបង់សំណង់នេះ មិនបន្តសាងសង់នោះ គឺខណៈដែលពិភពលោកនេះផ្ទុះនូវជំងឺឆ្លងសាហាវនោះគឺកូវីដ-១៩ ។ ផ្ទះវីឡាដែលគេទុកចោលនេះ ស្ថិតនៅកណ្ដាលព្រៃភ្នំ ដែលផ្ទះខ្លះក៏ធ្វើរួចរាល់ និងផ្ទះខ្លះទៀតគ្រាន់តែចាក់គ្រឹះសសរចោល ហើយក៏បានផ្អាកការសាងសង់ទៅវិញ ។ បើយោងតាមប្រជាពលរដ្ឋដែលចូលទៅរកអនុផលព្រៃឈើ ដូចជាបោចវល្លិនៅទីនោះ បាននិយាយប្រាប់កាលពីព្រឹកថ្ងៃទី១៤ ខែកញ្ញា ឆ្នាំ២០២៥ថា ផ្ទះដែលគេធ្វើទុកចោលនេះ មានប្រមាណ៣០០ខ្នង ហើយក្រុមហ៊ុនសាងសង់ជាជនបរទេស បានឈប់ដំណើរការជាយូរឆ្នាំហើយ ។
ឯមូលហេតុនៃការផ្អាកសាងសង់ ឮថាអត់លុយ ហើយគ្មានអ្នកណាចូលទៅទិញ ព្រោះ មានតែជនបរទេសទេដែលចូលចិត្តទៅរស់នៅកន្លែងស្ងាត់ៗបែបនេះ ។ អ្នករាយការណ៍ព័ត៌មានបានព្យា យាមចង់ជួបតំណាងក្រុមហ៊ុន ឬអ្នកទទួលខុសត្រូវលើគម្រោងសាងសង់សំណង់ផ្ទះវីឡានេះដែរ តែមិនអាចទាក់ទងបានដោយសារគ្មានអ្នកណាដឹងថា មានបញ្ហាអ្វីខ្លះ ទាក់ទិននឹងការបោះបង់សំណង់លើភ្នំនេះទេ ។ ជាមួយនេះ ក៏បានទាក់ទងទៅអាជ្ញាធរឃុំ ស្រុក និងខេត្តដែរ តែមិនអាចទទួលបានព័ត៌មានទាក់ទិននឹងផ្ទះវីឡា ដែលគេសាងសង់នៅលើភ្នំរហូតដល់៣០០ខ្នងនេះទេ ។
ខេត្តកំពត ជាខេត្តមួយដែលសម្បូរទៅដោយតំបន់ទេសចរណ៍ធម្មជាតិជាច្រើន រាប់ចាប់តាំងពីតំបន់អេកូទេសចរណ៍ធម្មជាតិ និងកែច្នៃ ប្រវត្តិសាស្ត្រ វប្បធម៌ ភ្នំ ព្រែក និងកសិ-ទេសចរណ៍ជាដើម ។ តំបន់នីមួយៗ ត្រូវបានបែងចែកជា៤ផ្នែកសំខាន់ៗដូចជា ឧទ្យានជាតិព្រះមុនីវង្សបូកគោ ក្រុងកំពត សំណង់បេតិកភណ្ឌ ដងព្រែកកំពង់បាយ និងទីជនបទនៃខេត្តកំពត ។ សក្តានុពលនៃតំបន់ទេសចរណ៍ក្នុងខេត្តនេះ បានទាក់ទាញភ្ញៀវជិតឆ្ងាយមកកម្សាន្តមិនចេះជិនណាយ ពិសេសជនបរទេសមកពីអឺរុប គឺពេញនិយមមកលំហែកាយនៅខេត្តកំពត ក្រៅពីទស្សនាប្រាង្គប្រាសាទនៅខេត្តសៀមរាប ។
ដូច្នេះហើយ ទើបផ្ទះលំហែកាយជាច្រើននៅតាមដងព្រែកទឹកឈូ បានក្លាយជាការទាក់ទាញ ។ ខេត្តកំពតមានតំបន់ទេសចរណ៍ចំនួន៣៩កន្លែង ក្នុងនោះមានតំបន់សមុទ្រ ទឹកធ្លាក់ ព្រៃកោងកាង និងតំបន់ព្រៃភ្នំជាដើម ។ ចំណែកផ្ទះវីឡាដែលគេទុកចោល គឺស្ថិតនៅលើភ្នំខ្វៀន ដែលជាទស្ស នីយភាពព្រៃភ្នំដ៏ត្រកាល ។ បើគិតពីរយៈពេលនៃការទុកចោលសំណង់នេះ គឺ៦ឆ្នាំហើយ គិតចាប់ពីពេលសាងសង់នៅឆ្នាំ២០១៩ ៕
ចែករំលែកព័តមាននេះ