ខេត្តកំពង់ស្ពឺ ៖ កូនប្រុសអកត្តញូម្នាក់ ត្រូវបានឪពុកម្តាយប្តឹងឱ្យនគរបាលធ្វើការឃាត់ខ្លួន ខណៈដែលខឹងរឿងឪពុកម្តាយស្តីបន្ទោសថា បាត់លុយចំនួន១០ម៉ឺនរៀល ទប់កំហឹងមិនជាប់ កូនប្រុសរូបនោះបានស្ទុះទៅទាញកាំបិតកាប់បំផ្លាញសម្ភារ ថែមទាំងគំរាមកាប់សម្លាប់ឪពុកទៀតផង ដោយទ្រាំនឹងទង្វើររបស់កូនលែងបាន…
ខេត្តកំពង់ស្ពឺ ៖ កូនប្រុសអកត្តញូម្នាក់ ត្រូវបានឪពុកម្តាយប្តឹងឱ្យនគរបាលធ្វើការឃាត់ខ្លួន ខណៈដែលខឹងរឿងឪពុកម្តាយស្តីបន្ទោសថា បាត់លុយចំនួន១០ម៉ឺនរៀល ទប់កំហឹងមិនជាប់ កូនប្រុសរូបនោះបានស្ទុះទៅទាញកាំបិតកាប់បំផ្លាញសម្ភារ ថែមទាំងគំរាមកាប់សម្លាប់ឪពុកទៀតផង ដោយទ្រាំនឹងទង្វើររបស់កូនលែងបាន ក៏ដាច់ចិត្តដាក់ពាក្យបណ្តឹងឱ្យនគរបាលឃាត់ខ្លួនតែម្តង ។
ការឃាត់ខ្លួនកូនអកត្តញូកាប់បំផ្លាញសម្ភារ និងគំរាមកាប់សម្លាប់ឪពុកថែមទៀតផងនោះបានធ្វើឡើង កាលពីថ្ងៃទី១៦ ខែកញ្ញា ឆ្នាំ២០២៥ នៅក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។នគរបាលក្រុងច្បារមនបាននិយាយឱ្យដឹងថា យុវជនដែលកាប់បំផ្លាញសម្ភារៈ និងគំរាមកាប់សម្លាប់ឪពុកខ្លួនឯង ហើយនគរបាលឃាត់ខ្លួនមានឈ្មោះ ម៉ី រ៉ាឌី អាយុ១៧ឆ្នាំ រស់នៅជាមួយឪពុកម្តាយក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ។
លោកយ័ន្ត សង្ហា អធិការនគរបាលក្រុងច្បារមនបានឱ្យដឹងថា ការឃាត់ខ្លួនយុវជនខាងលើ ដោយមានការចង្អុលបង្ហាញពីលោកឧត្តមសេនីយ៍ទោ ឃឹម សុខខៃ ស្នងការនគរបាលខេត្តកំពង់ស្ពឺរួចមក ទើបលោកវរសេនីយ៍ទោ យ័ន្ត សង្ហា អធិការនគរបាលក្រុងច្បារមន បានដឹកនាំកម្លាំងផ្នែកយុត្តិធម៌ក្រុងច្បារមន និងបានសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ច្បារមនបានធ្វើការឃាត់ខ្លួនជនបង្កម្នាក់ ករណីប្រើហិង្សាក្នុងគ្រួសារ ដែលបានប្រព្រឹត្តកាលពីវេលាម៉ោង០៥ និង១២នាទីល្ងាចថ្ងៃទី១៤ ខែកញ្ញា ឆ្នាំ២០២៥ កើតឡើងចំណុចភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ កន្លងទៅ ។
លោកអធិការនគរបាលក្រុងច្បារមនបានបន្តថា បើយោងតាមពាក្យបណ្ដឹងរបស់ឈ្មោះម៉ី ហៀង ភេទប្រុស អាយុ៦១ឆ្នាំ រស់នៅភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ បានប្ដឹងចោទប្រកាន់ទៅលើឈ្មោះម៉ី រ៉ាឌី ភេទប្រុស អាយុ១៧ឆ្នាំ (ត្រូវជាកូនបង្កើត) រស់នៅផ្ទះជាមួយគ្នា ដែលបានធ្វើសកម្មភាពយកកាំបិតផ្គាក់កាប់ចានឆ្នាំងនិងចង្ក្រានហ្គាសបណ្ដាលឲ្យបែកនិងខូចខាតទាំងស្រុង និងបានគំរាមកកាប់សម្លាប់រូបខ្លួនជាម្តាយថែមទៀតផង។
ក្រោយពីទទួលបានពាក្យបណ្តឹងរួច កម្លាំងប៉ុស្ដិ៍នគរបាលរដ្ឋបាលសង្កាត់ស្វាយក្រវ៉ាន់សហការជាមួយផ្នែកយុត្តិធម៌ក្រុងច្បារមន បានចុះទៅដល់កន្លែងកើតហេតុ និងឃាត់ខ្លួនឈ្មោះ ម៉ី រ៉ាឌី មកសាកសួរ ។ យុវជនខាងលើ បានឆ្លើយសារភាពថា ខ្លួនពិតជាបានធ្វើសកម្មភាពយកកាំបិតផ្គាក់កាប់លើចានឆ្នាំង និងចង្ក្រានហ្គាស បណ្ដាលឲ្យបែកនិងខូចខាតពិតប្រាកដ មូលហេតុ ខឹងនិងឪពុក ស្ដីឲ្យ រឿងបាត់លុយ១០ម៉ឺនរៀល ។
បច្ចុប្បន្ន យុវជនជាកូនខាងលើ ត្រូវបាននគរបាលកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ