រាជធានីភ្នំពេញ ៖ ទីតាំងខុនដូមួយកន្លែងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាអនឡាញOnline Scam ត្រូវបានសមត្ថកិច្ចចម្រុះនៃរដ្ឋបាលរាជធានីភ្នំពេញ ចុះបង្ក្រាបដោយឃាត់ខ្លួនជនសង្ស័យចម្រុះជាតិសាសន៍ចំនួន៤៨នាក់ ព្រមទាំងដកហូតសម្ភារប្រព្រឹត្តបទល្មើសមួយចំនួនធំ ។ ប្រតិបត្តិការនេះ ធ្វើឡើងនៅថ្ងៃទី១៥…
រាជធានីភ្នំពេញ ៖ ទីតាំងខុនដូមួយកន្លែងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាអនឡាញOnline Scam ត្រូវបានសមត្ថកិច្ចចម្រុះនៃរដ្ឋបាលរាជធានីភ្នំពេញ ចុះបង្ក្រាបដោយឃាត់ខ្លួនជនសង្ស័យចម្រុះជាតិសាសន៍ចំនួន៤៨នាក់ ព្រមទាំងដកហូតសម្ភារប្រព្រឹត្តបទល្មើសមួយចំនួនធំ ។
ប្រតិបត្តិការនេះ ធ្វើឡើងនៅថ្ងៃទី១៥ ខែកញ្ញា ឆ្នាំ២០២៥ វេលាម៉ោង១៣:០០នៅក្នុងទីតាំងអគារខុនដូ HANA ដែលមានចំនួន៧ជាន់ ស្ថិតនៅអគារលេខ១៤៦៩ ផ្លូវ១០៨៩ ភូមិរោងចក្រ១ សង្កាត់គោកឃ្លាង ខណ្ឌសែនសុខ រាជធានីភ្នំពេញ ។ ក្នុងប្រតិបត្តិការនោះ ដោយមានការចូលរួមពីសមត្ថកិច្ចជំនាញ និងអាជ្ញាធរមូលដ្ឋាននិងដោយមានការចូលរួមពីតំណាងអយ្យការអមសាលាដំបូងរាជធានីភ្នំពេញផងដែរ ។
តាមព័ត៌មានឱ្យដឹងថា សមត្ថកិច្ចចម្រុះបានធ្វើការឡោមព័ទ្ធនិងឆែកឆេរអគារខុនដូខាងលើអស់រយៈពេលជាច្រើនម៉ោង ដោយពាក់ព័ន្ធនឹងបទល្មើស Online Scam និងការស្នាក់នៅប្រមូលម្តុំជនបរទេសខុសច្បាប់ ។ នៅក្នុងប្រតិបត្តិការនោះ សមត្ថកិច្ចបានឃាត់ខ្លួនជនសង្ស័យសរុបចំនួន៤៨នាក់ (ស្រី១០នាក់) មាន៤សញ្ជាតិ ក្នុងនោះ ជនជាតិកូរ៉េខាងត្បូងចំនួន៣៣នាក់ (ស្រី៥នាក់) ជនជាតិនេប៉ាល់ចំនួន១នាក់ (ប្រុស) ជនជាតិបង់ក្លាដេស ចំនួន១នាក់ (ប្រុស) ជនជាតិខ្មែរ ចំនួន១៣នាក់ (ស្រី៥នាក់) ផងដែរ ។ ក្រៅពីនេះ ក្រុមប្រតិបត្តិការក៏បានរឹបអូស សម្ភារបម្រើឱ្យការប្រព្រឹត្តបទល្មើស Scam Online រួមមាន កុំព្យូទ័រ ចំនួន៦០គ្រឿង, ទូដែកចំនួន៣គ្រឿង និងលិខិតឆ្លងដែន សរុបចំនួន៣៥ច្បាប់ ។
បច្ចុប្បន្ន ជនជាតិកូរ៉េខាងត្បូងជនជាតិនេប៉ាល់ ជនជាតិបង់ក្លាដេស និងខ្មែរ សរុបចំនួន៤៨នាក់ខាងលើ ព្រមទាំងសម្ភាររឹបអូស ត្រូវបានប្រគល់ជូនស្នងការដ្ឋានរាជធានីភ្នំពេញ ដើម្បីបន្តអនុវត្តនីតិវិធី ។
គួរបញ្ជាក់ថា កាលពីថ្ងៃទី១៤ ខែកក្កដា ឆ្នាំ២០២៥ រាជរដ្ឋាភិបាលកម្ពុជា បានដាក់ចេញ យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានៅទូទាំងប្រទេស ដោយមានការចូលរួមអនុវត្តសកម្មភាពពីក្រសួង ស្ថាប័ន អាជ្ញាធរថ្នាក់ក្រោមជាតិ និងសមត្ថកិច្ចពាក់ព័ន្ធ ដើម្បីបង្ការទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
ក្នុងក្របខណ្ឌយុទ្ធនាការបោសសម្អាតការឆបោក តាមប្រព័ន្ធបច្ចេកវិទ្យានេះ សមត្ថកិច្ចចម្រុះនឹងចាត់វិធានការ តាមផ្លូវច្បាប់យ៉ាងតឹងរឹងបំផុតចំពោះ មេខ្លោងទាំងឡាយដែលជាប់ពាក់ព័ន្ធ នឹងអំពើឆបោកតាមប្រព័ន្ធបច្ចេកវិទ្យានេះ ៕
ចែករំលែកព័តមាននេះ