​រាជធានីភ្នំពេញ៖ ក្នុង​គោលដៅ​ប្រែក្លាយ​តំបន់​តាម​ដង​ទន្លេ​ឱ្យក្លាយជា​ស្នូល​នៃ​ដង្ហើមសេដ្ឋកិច្ច​កម្ពុជា​ ក្រសួង​រៀបចំដែនដី នគរូបនីយកម្ម និង​សំណង់ ​បាន​ផ្តួចផ្តើម​គំនិត​យ៉ាង​ធំ​មួយ​ក្នុង​ការ​រៀបចំ​ដែនដី និង​នគរូបនីយកម្ម​តាម​បណ្តោយ​ដងទន្លេមេគង្គ និង​ទន្លេសាប ដើម្បី​បង្កើត​ជា របៀងសេដ្ឋកិច្ច​ដ៏​មាន​សក្តានុពល។

យោងតាមការចុះផ្សាយរបស់ក្រសួង​រៀបចំដែនដី នគរូបនីយកម្ម និង​សំណង់ នៅថ្ងៃទី១៤ ខែតុលានេះ បានឱ្យដឹងថា ក្នុងគោលគំនិតនៃការរៀបចំដែនដី និងនគរូបនីយកម្ម ដើម្បីបង្កើតជារបៀងសេដ្ឋកិច្ច ជាស្នូលនៃដង្ហើមសេដ្ឋកិច្ចកម្ពុជា ក្រសួងរៀបចំដែនដី នគរូបនីយកម្ម និងសំណង់ បានផ្តួចផ្តើមគិតគូរលើទីតាំងសក្តានុពលសម្រាប់រៀបចំជាផែបម្រើឱ្យទេសចរណ៍ និងភស្តុភារកម្ម តាមបណ្តោយដងទន្លេមេគង្គ និងទន្លេសាប ឱ្យសមស្របទៅនឹងផែនការប្រើប្រាស់ដី ដោយបានសាកល្បងកំណត់នូវទីតាំងមានសក្តានុពលដែលអាចរៀបចំជាផែសម្រាប់ភស្តុភារកម្ម ផែសំចតសហគមន៍ និងរៀបចំលំហសាធារណៈ រួមមាន៖ ចំណតសម្រាប់ភ្ញៀវទេសចរណ៍ ផែសម្រាប់ទូកទេសចរណ៍ កន្លែងផ្តល់ព័ត៌មាន តូបលក់ដូរ បន្ទប់ទឹកសាធារណៈ និងកន្លែងអង្គុយសម្រាក សួនច្បារ ផ្លូវជិះកង់ និងផ្លូវថ្មើរជើង និងហេដ្ឋារចនាសម្ព័ន្ធតភ្ជាប់ទៅច្រាំងទន្លេជាដើម។

សូមជម្រាបជូនថាកិច្ចប្រជុំពិភាក្សាលើការងារនេះរៀបចំឡើងនៅទីស្តីការក្រសួង ដោយមានការចូលរួមពីតំណាងក្រសួងទេសចរណ៍ ក្រសួងសាធារណការ និងដឹកជញ្ជូន រដ្ឋបាលរាជធានី-ខេត្តតាមបណ្តោយដងទន្លេមេគង្គ និងទន្លេសាប និងក្រុមហ៊ុនទូកទេសចរណ៍៕