ទីក្រុងអាន់តាណារីវ៉ូ៖ ប្រធានាធិបតីម៉ាដាហ្កាស់ស្កា លោកអានឌ្រី រ៉ាចូអេលីណា (Andry Rajoelina) បានរំលាយសភាបាត់ទៅហើយនៅថ្ងៃអង្គារនេះនៅពេលមានសញ្ញាមិនស្រួលថាអាចនឹងមានចលនាបះបោរពីពួកយោធា។ ឥឡូវនេះគាត់បានរត់គេចខ្លួនទៅក្រៅប្រទេស។ គាត់និយាយតាមត្រង់ថាគាត់រត់ចេញពីស្រុកលើកនេះដើម្បីការពារអាយុជីវិតរបស់ខ្លួន។
លោករ៉ាចូអេលីបានចេញក្រឹត្យមួយបង្គាប់ឱ្យរំលាយសភាជាការប្រញាប់។ នេះបើតាមសេចក្ដីប្រកាសរបស់លោកដែលបង្ហោះនៅលើទំព័រហ្វេសប៊ុករបស់ខុទ្ទកាល័យប្រធានាធិបតីម៉ាដាហ្កាស់ស្កា។ នៅក្នុងស្ថានភាពច្របូកច្របល់បែបនេះ លោករ៉ាចូអេលីណាកំពុងស្ថិតនៅទីណាពិតប្រាកដមិនទាន់ដឹងនៅឡើយទេ។ ប៉ុន្តែមុននឹងឈានដល់ដំណាក់កាលនេះ ទាហានជាច្រើនកងឯកភាពបានសហការជាមួយពួកអ្នកតវ៉ាដើម្បីទាមទារឱ្យលោករ៉ាចូអេលីណាចុះពីតំណែង។
ទង្វើនេះត្រូវគេចាត់ទុកថាជាការប៉ុនប៉ងធ្វើរដ្ឋប្រហារ។ មានន័យថាបើលោកមិនព្រមចុះតាមសម្រួលទេអាចនឹងមានរដ្ឋប្រហារកើតឡើង។ លោករ៉ាចូអេលីណាប្រកាសតាមបណ្ដាញសង្គមកាលពីយប់មិញថាលោកសម្រេចចិត្តចាកចេញទៅក្រៅប្រទេសដើម្បីការពារអាយុជីវិតផ្ទាល់។ ការសម្រេចចិត្តរំលាយសភានៅថ្ងៃនេះកើតមានឡើងចំពេលដែលក្រុមអ្នកតំណាងរាស្ត្រកំពុងរៀបចំកិច្ចប្រជុំដើម្បីដកតំណែងរបស់លោក។
ដូច្នេះមិនទាន់បានបោះឆ្នោតដកតំណែងផង លោកបានរំលាយសភាទុកជាមុន ដែលជាហេតុធ្វើឱ្យសភាអស់សុពលភាពក្នុងការប៉ុនប៉ងដកតំណែងរបស់លោក។ ម៉ាដាហ្កាហ្សាជាកោះធំលំដាប់ទី៤នៅលើពិភពលោក និងមានប្រជាជន៣១លាននាក់ស្ថិតនៅឆ្នេរសមុទ្រអាហ្វ្រិកភាគខាងកើត។ ការដែលប្រធានាធិបតីប្រទេសនេះប្រកាសរំលាយសភានឹងធ្វើឱ្យសភាពការណ៍នយោបាយកាន់តែច្របូកច្របល់។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានអេភី និងប្រភពដទៃទៀត៕
ចែករំលែកព័តមាននេះ