ទីក្រុងវ៉ាស៊ីនតោន៖ អាមេរិកវាយប្រហារជាថ្មីទៀតទៅលើទូកដែលសង្ស័យដឹកគ្រឿងញៀនចេញពីវេណេហ្ស៊ូអេឡាបណ្ដាលឱ្យស្លាប់មនុស្ស៦នាក់។ នេះបើយោងតាមការប្រការរបស់លោកត្រាំកាលពីយប់មិញ។ អ្នកដែលត្រូវបានបាញ់សម្លាប់ទាំងនោះជាអ្នកជិះនៅលើទូកនោះផ្ទាល់តែម្ដង។ នៅក្នុងប្រតិបត្តិការសឹកលើកនេះគ្មានទាហានអាមេរិកណាម្នាក់រងរបួស ឬស្លាប់ទេ។
គិតទាំងលើកនេះទៀត អាមេរិកវាយប្រហារទូកដែលសង្ស័យដឹកគ្រឿងញៀនជាលើកទីប្រាំនៅសមុទ្រការីប៊ីន (Caribbean) ។ ការវាយប្រហារនេះកើតឡើងចំពេលដែលរដ្ឋបាលរបស់លោកត្រាំចាត់ទុកក្រុមជួញដូរគ្រឿងញៀនមិនមែនត្រឹមតែជាឧក្រិដ្ឋជនធម្មតាប៉ុណ្ណោះទេ ប៉ុន្តែជាពួកភេរវកម្មគ្រឿងញៀន និងជាក្រុមអ្នកប្រយុទ្ធខុសច្បាប់ដែលត្រូវតែប្រើប្រាស់កម្លាំងយោធាដើម្បីកម្ចាត់ចោល។
លោកត្រាំនិយាយថាប្រតិបត្តិការបាញ់ទូកសង្ស័យដឹកគ្រឿងញៀននោះត្រូវបានដឹកនាំ និងបញ្ជាដោយផ្ទាល់ពីរដ្ឋមន្ត្រីការពារជាតិ។ លោកត្រាំក៏បានផ្សព្វផ្សាយវីឌីអូមួយឈុតតាមទម្លាប់ដូចកាលពីពេលមុនៗដែរ។ តាមរយៈវីឌីអូដែលផ្សព្វផ្សាយតាមបណ្ដាញអ៊ិចដោយរដ្ឋមន្ត្រីការពារជាតិ គេឃើញទូកមួយគ្រឿងដែលទំនងជាចតនៅស្ងៀមនៅលើផ្ទៃសមុទ្រ។ មិនយូរប៉ុន្មាន ទូកនោះត្រូវបានបាញ់ប្រហារដោយមីស៊ីលមួយគ្រាប់បណ្ដាលឱ្យផ្ទុះឆេះតែម្ដង។
លោកត្រាំអះអាងថាការវាយប្រហារនេះធ្វើឡើងនៅលើដែនសមុទ្រអន្តរជាតិ។ ប្រភពពីភ្នាក់ងារសម្ងាត់ឱ្យការណ៍មកថាទូកនោះដឹកគ្រឿងញៀន, ជាទូកដែលមានទំនាក់ទំនងជាមួយបណ្ដាញរត់ពន្ធគ្រឿងញៀន និងជាទូកដែលបើកចូលខ្សែទឹកដែលពួកឧក្រិដ្ឋជនគ្រឿងញៀនតែងតែប្រើប្រាស់ជាប្រចាំដើម្បីដឹកជញ្ជូនទំនិញរបស់ពួកគេ។ មន្ត្រីក្រសួងការពារជាតិម្នាក់ដែលស្នើសុំមិនបញ្ចេញឈ្មោះប្រាប់ថាការអះអាងនៅលើបណ្ដាញសង្គមនោះពិតជាត្រឹមត្រូវទៅតាមស្ថានភាពជាក់ស្ដែង។ នេះបើយោងតាមប្រភពពីអេភី (AP) និងប្រភពដទៃទៀត៕
ចែករំលែកព័តមាននេះ