ទីក្រុងកៀវ៖ កាលពីយប់មិញ រុស្ស៊ីវាយប្រហារយ៉ាងខ្លាំងក្លាទៅលើទីក្រុងធំលំដាប់ទី២របស់អ៊ុយក្រែន ខាគីវ ដោយប្រើប្រាស់គ្រាប់បែកបញ្ជាពីចម្ងាយ និងដ្រូនបណ្ដាលឱ្យឆេះមន្ទីរពេទ្យ និងរបួសមនុស្ស៧នាក់។ ការវាយប្រហារនេះកើតឡើងចំពេលដែលជំនួយយោធារបស់អឺរ៉ុបសម្រាប់អ៊ុយក្រែនធ្លាក់ចុះខ្លាំងនៅដំណាក់កាលចុងក្រោយ និងចំពេលដែលលោកហ្សេឡិនស្គីត្រៀមជួបលោកត្រាំនៅសប្ដាហ៍នេះដើម្បីស្នើសុំមីស៊ីលម៉ាកថូម៉ាហក (Tomahawk) ដែលអាចបាញ់បានចម្ងាយ២៥០០គីឡូម៉ែត្រ។
សាក្សីនិយាយថាបន្ទាប់ពីមានគ្រាប់កាំភ្លើងផ្លោងចូលមន្ទីរពេទ្យធំ អ្នកជំងឺ៥០នាក់ក៏ប្រញាប់ជម្លៀសខ្លួនជាបន្ទាន់ទៅកាន់ទីកន្លែងសុវត្ថិភាព។ លោកហ្សេឡិនស្គីថ្លែងថាគោលដៅធំនៃការវាយប្រហារលើកនេះគឺទីតាំងផលិតថាមពល។ លោកនិយាយតែត្រឹមនេះដោយមិនបញ្ជាក់លម្អិតថាតើទីតាំងណាខ្លះរងការវាយប្រហារនោះទេ។ លោកថ្លែងបន្តទៀតថាជារៀងរាល់ថ្ងៃ, ជារៀងរាល់យប់ រុស្ស៊ីបន្តវាយប្រហាររោងចក្រផលិតថាមពល, វាយប្រហារខ្សែភ្លើង និងវាយប្រហារទីតាំងស្តុកទុកឧស្ម័ន។
រុស្ស៊ីវាយប្រហារទីតាំងទាំងនោះនៅពេលជិតដល់រដូវរងាដើម្បីកុំឱ្យប្រជាជនអ៊ុយក្រែនមានអ្វីសម្រាប់ដុតកម្ដៅខ្លួន។ លោកហ្សេឡិនស្គីជាថ្មីម្ដងទៀតសូមជំរុញឱ្យបណ្ដារដ្ឋបរទេសនានាសូមជួយផ្ដល់ខែការពារដែនអាកាសដើម្បីទប់ទល់នឹងការវាយលុករបស់រុស្ស៊ី។ ហ្សេឡិនស្គីថ្លែងថាយើងចង់ឃើញអាមេរិក អឺរ៉ុប ក្រុមប្រទេសជី៧ និងប្រទេសដៃគូទាំងអស់ដែលមានប្រព័ន្ធនេះ (ប្រព័ន្ធការពារដែនអាកាស) ផ្ដល់មកឱ្យអ៊ុយក្រែនដើម្បីការពារអាយុជីវិតរបស់ប្រជាជនយើង។ ពិភពលោកត្រូវតែបង្ខំឱ្យទីក្រុងម៉ូស្គូចូលតុចរចាគ្នាដោយចិត្តស្មោះស។
ទោះជាមានការអំពាវនាវបែបនេះក្ដី អឺរ៉ុប និងអាមេរិកហាក់ដូចជានឿយណាយនឹងការផ្ដល់ជំនួយទៅឱ្យអ៊ុយក្រែន។ ទិន្នន័យចុងក្រោយនេះបង្ហាញថាជំនួយយោធាសម្រាប់អ៊ុយក្រែនកាលពីខែកក្កដា និងខែសីហាថយចុះ៤៣%បើប្រៀបធៀបនឹងរយៈពេល៦សែមុននោះ។ នេះបើយោងតាមរបាយការណ៍របស់វិទ្យាស្ថានកៀលនៅអាល្លឺម៉ង់ (Kiel) ដែលតាមដានការផ្ដល់ជំនួយទៅឱ្យអ៊ុយក្រែន។
ហ្សេឡិនស្គីត្រៀមហោះទៅវ៉ាស៊ីនតោននៅថ្ងៃសុក្រសប្ដាហ៍នេះដើម្បីនិយាយបញ្ចុះបញ្ចូលឱ្យលោកត្រាំផ្ដល់គ្រាប់មីស៊ីលរយៈចម្ងាយឆ្ងាយយកទៅវាយប្រហាររុស្ស៊ី។ លោកត្រាំធ្លាប់និយាយម្ដងជាពីរដងហើយថាលោកអាចនឹងផ្ដល់មីស៊ីលថូម៉ាហកឱ្យអ៊ុយក្រែនបើលោកពូទីនមិនព្រមចូលតុចរចា។ គេគិតថាបើសិនលោកត្រាំធ្វើបែបនេះប្រហែលជាវ៉ាស៊ីនតោន និងម៉ូស្គូមើលមុខគ្នាលែងចំជាមិនខាន។ ខាងលើនេះជាការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ