បរទេស ៖ តម្លៃមាសអន្តរជាតិបានបន្តហក់ឡើងដល់កម្រិតខ្ពស់បំផុតមិនធ្លាប់ពីមុន នៅថ្ងៃទី១៦ កញ្ញា ឆ្នាំ២០២៥ ជំរុញដោយកម្សោយប្រាក់ដុល្លារអាមេរិក មុនពេលកិច្ចប្រជុំគោលនយោបាយរបស់ធនាគារកណ្តាលអាមេរិក (Fed) នៅសប្តាហ៍នេះ…
បរទេស ៖ តម្លៃមាសអន្តរជាតិបានបន្តហក់ឡើងដល់កម្រិតខ្ពស់បំផុតមិនធ្លាប់ពីមុន នៅថ្ងៃទី១៦ កញ្ញា ឆ្នាំ២០២៥ ជំរុញដោយកម្សោយប្រាក់ដុល្លារអាមេរិក មុនពេលកិច្ចប្រជុំគោលនយោបាយរបស់ធនាគារកណ្តាលអាមេរិក (Fed) នៅសប្តាហ៍នេះ ដែលជាកិច្ចប្រជុំត្រូវបានរំពឹងខ្ពស់ថានឹងកាត់បន្ថយអត្រាការប្រាក់របស់ខ្លួន។ នេះបើតាមការចេញផ្សាយពីទីភ្នាក់សារព័ត៌មាន Reuters។
តម្លៃមាសអន្តរជាតិបានកើនឡើងដល់ ៣ ៦៩៣ដុល្លារក្នុង១អោន ឬ ៤ ៤៤៩ដុល្លារក្នុង១តម្លឹងដែលជាតម្លៃខ្ពស់បំផុតមិនធ្លាប់មានពីមុន មុនពេលរក្សាតម្លៃមកត្រឹម ៣ ៦៩១ដុល្លារក្នុង១អោន ឬ ៤ ៤៤៦ដុល្លារក្នុង១តម្លឹង គិតត្រឹមម៉ោង ២:៣០នាទីរសៀលថ្ងៃទី១៦ ខែកញ្ញា ឆ្នាំ២០២៥ (ម៉ោងនៅកម្ពុជា)។
ប្រធានាធិបតីអាមេរិក លោក ដូណាល់ ត្រាំ លើការបង្ហោះលើបណ្តាញសង្គម កាលពីថ្ងៃទី១៥ ខែកញ្ញា កន្លងទៅ បានអំពាវនាវលោក Jerome Powell ប្រធានធនាគារកណ្តាលអាមេរិក ដើម្បីអនុវត្តការកាត់បន្ថយអត្រាការប្រាក់នៅក្នុងកម្រិតខ្ពស់មួយ ដើម្បីជំរុញសេដ្ឋកិច្ចអាមេរិក។ បណ្តាវិនិយោគិនកំពុងកំណត់អត្រានៃការកាត់បន្ថយ ២៥ពិន្ទុមូលដ្ឋាន នៅបិទបញ្ចប់កិច្ចប្រជុំរយៈពេលពីរថ្ងៃ នៅថ្ងៃទី១៧ ខែកញ្ញា ជាមួយឱកាសតិចតួចស្តួចស្តើងដែលរំពឹងថានឹងអាចឈានដល់ ៥០ពិន្ទុមូលដ្ឋាន។
ក្រឡេកទៅប្រាក់ដុល្លារអាមេរិកបានជួញដូរនៅក្នុងកម្រិតទាបជិត២កន្លះខែ បើធៀបនឹងប្រាក់អឺរ៉ូ។ ដុំមាស ដែលជារឿយៗត្រូវបានចាត់ទុកជាទ្រព្យសម្បត្តិដ៏មានសុវត្ថិភាពបំផុត អំឡុងពេលនៃភាពមិនប្រាកដប្រជានៃសេដ្ឋកិច្ចសកល និងភូមិសាស្ត្រនយោបាយ ហើយតម្លៃតែងតែកើនឡើងនៅពេលមានការអត្រាប្រាក់ទាប។
បណ្តាពាណិជ្ជករ និងអ្នកជំនាញលើកឡើងថា តម្លៃមាសនឹងបន្តកើនឡើងឥតឈប់ឈរ ដល់បំណាច់ឆ្នាំនេះ មុនពេលឈានដល់ការទម្លុះរបាតម្លៃ៤ពាន់ដុល្លារក្នុង១អោនជាលើកដំបូង ឬ ៤ ៨១៩ដុល្លារក្នុង១តម្លឹង នៅឆ្នាំក្រោយ។
អ្នកស្រី Renisha Chainani ប្រធានផ្នែកស្រាវជ្រាវក្រុមហ៊ុន Augmont ដំណើរការរោងចក្រចម្រាញ់រ៉ែមាស ដែលមានមូលដ្ឋាននៅទីក្រុងម៉ុមបៃ ប្រទេសឥណ្ឌា បានថ្លែងនៅក្រៅសន្និសីទសារព័ត៌មានស្តីពីទីផ្សារមាសរបស់ឥណ្ឌាថា ការលោតរបស់តម្លៃមាសរយៈពេលវែងមើលទៅនៅដដែល ដោយសារតម្រូវការខ្ពស់ ពិសេសពីបណ្តាធនាគារកណ្តាល និងមូលនិធិវិនិយោគបន្តកើនឡើងក្នុងល្បឿនកាន់តែលឿន។
អ្នកស្រីបន្តថា បច្ចុប្បន្នមាសស្ថិតក្នុងការជួញដូរលើស ហើយអាចឃើញការកែតម្រូវ ៥ ទៅ ៦% ក្នុងរយៈពេលខ្លីខាងមុខនេះ មុនពេលកើនឡើងខ្ពស់ម្តងទៀត ដើម្បីឈានដល់កម្រិតកំណត់ត្រាថ្មីលើសពី ៤ ២០០ដុល្លារក្នុង១អោន ឬ ៥ ០៦០ដុល្លារក្នុង១តម្លឹង នៅឆ្នាំក្រោយ។
ចំណែកលោក Nicholas Frappell ប្រធានទីផ្សារសកលនៃក្រុមហ៊ុន ABC ដំណើរការរោងចក្រចម្រាញ់រ៉ែមាសក៏បានលើកឡើងស្រដៀងគ្នាថា «បណ្តាអ្នកវិភាគបាននិងកំពុងការពារតម្លៃមាសឱ្យឡើងដល់ ៤ពាន់ដុល្លារក្នុងឆ្នាំ២០២៦។ ប៉ុន្តែវាពិតជាពិបាកអារកាត់ខ្លាំងណាស់ ព្រោះតែរាល់ការព្យាករណ៍ដែលយើងបានឃើញតម្លៃបានឈានដល់កម្រិតនោះ គឺលឿនជាងអ្វីដែលយើងរំពឹងទុកទៅទៀត»៕
ចែករំលែកព័តមាននេះ