រាជធានីភ្នំពេញ ៖ ជនសង្ស័យចំនួន៤នាក់ ដែលបានប្រព្រឹត្តអំពើចោរកម្ម ចំនួន៣ករណីផ្សេងគ្នា ត្រូវបាននគរបាលខណ្ឌដង្កោ ដឹកនាំ និងបញ្ជាដោយលោកវរសេនីយ៍ឯក ជឹម ស៊ីថា…
រាជធានីភ្នំពេញ ៖ ជនសង្ស័យចំនួន៤នាក់ ដែលបានប្រព្រឹត្តអំពើចោរកម្ម ចំនួន៣ករណីផ្សេងគ្នា ត្រូវបាននគរបាលខណ្ឌដង្កោ ដឹកនាំ និងបញ្ជាដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ ស្រាវជ្រាវឃាត់ខ្លួនបានជាបន្តបន្ទាប់ ។
ក្នុងនោះ រួមមាន ទី១.អំពើធាក់ផ្ដួលម៉ូតូរួចយកកាំបិតភ្ជង់ប្លន់យកម៉ូតូ និងខ្សែក ពីស្ត្រីអាជីវករម្នាក់បានសម្រេច ត្រូវនគរបាលឃាត់ខ្លួនបានម្នាក់ក្នុងចំណោមគ្នា៣នាក់ ។ ទី២.អំពើឆក់កាបូប ត្រូវនគរបាលឃាត់ខ្លួនបាន២នាក់ និងទី៣.អំពើគាស់ផ្ទះលួចទ្រព្យសម្បត្តិ ត្រូវនគរបាលឃាត់ខ្លួនបានម្នាក់ ។
រហូតមកដល់វេលាព្រឹកថ្ងៃទី១៦ ខែកញ្ញា ឆ្នាំ២០២៥ ក្រោយពេលបង្ក្រាបចាប់ខ្លួនបាន ធ្វើការសាកសួរ និងកសាងសំណុំរឿងរួចរាល់ ហើយនោះនគរបាលខណ្ឌដង្កោ បានបញ្ជូនជនទាំង៤នាក់នោះ ទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ហើយ ។
បើតាមនគរបាលខណ្ឌដង្កោ បានប្រាប់ឲ្យដឹងថា បទល្មើសទី១ ៖ សកម្មភាពធាក់ផ្ដួលម៉ូតូ រួចយកកាំបិតភ្ជង់ប្លន់យកម៉ូតូ និងខ្សែកប្លាទីពីស្ត្រីម្នាក់បានសម្រេច កើតឡើងនាវេលាម៉ោង០៤និង៤០នាទីជិតភ្លឺថ្ងៃទី១១ ខែកញ្ញា ឆ្នាំ២០២៥ នៅតាមផ្លូវបេតុង ស្ថិតក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។ បង្កឡើងដោយជនសង្ស័យ៣នាក់ ហើយត្រូវកម្លាំងនគរបាលឃាត់ខ្លួនបានម្នាក់ឈ្មោះ ជា ម៉ាប់ ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។ ចំណែកបក្ខពួក២នាក់ទៀត ឈ្មោះ បូរិទ្ធី ហៅ ហុក ភេទប្រុស អាយុ៣២ឆ្នាំ និងឈ្មោះ ជៀម វិសាល ភេទប្រុស អាយុ៣១ឆ្នាំ មិនស្គាល់ទីកន្លែងស្នាក់នៅកំពុងរតគេចខ្លួន ។
នគរបាល បានប្រាប់ឲ្យដឹងទៀតថា ក្រោយចាប់ខ្លួនជនសង្ស័យខាងលើកម្លាំងនគរបាលដកហូតបានម៉ូតូ ១គ្រឿង ម៉ាកHONDA BEAT ពណ៌ស ពាក់ស្លាកលេខ ភ្នំពេញ 1LQ-5358 និងកាំបិតកែច្នប្រវែង៤៦សង់ទីម៉ែត្រ ០១ដើម ដែលជាមធ្យោបាយរបស់ជនសង្ស័យប្រើប្រាស់ក្នុងការធ្វើសកម្មភាពប្លន់ ។
ដោយឡែកស្ត្រីរងគ្រោះឈ្មោះគៀង ចែម អាយុ៦៨ឆ្នាំ ជនជាតិខ្មែរ មុខរបរលក់ដូរ មានទីលំនៅផ្ទះលេខ១៥៦ ផ្លូវបេតុង ភូមិតាឡី សង្កាត់ដង្កោ ខណ្ឌដង្កោ ។ គាត់បាត់បង់ម៉ូតូ១គ្រឿងម៉ាកHONDA DREAM C១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខភ្នំពេញ 1FN-7692 និងខ្សែកប្លាទីន ១ខ្សែទម្ងន់៥ជី ។
នគរបាលខាងលើ បានប្រាប់ឲ្យដឹងបន្ថែមទៀតថា នៅមុនពេលកើតហេតុស្ត្រីរងគ្រោះបានជិះម៉ូតូចេញពីផ្ទះទៅបើកតូបរៀបចំកន្លែងលក់ដូរនៅផ្សារសារឿន យ៉ានី ស្ថិតនៅភូមិតាឡី សង្កាត់ដង្កោ លុះក្រោយពេលបើកទ្វារតូបរៀបចំរួចរាល់ ក៏បានជិះម៉ូតូត្រលប់ទៅផ្ទះវិញ ។ លុះពេលទៅដល់ត្រង់ចំណុចកើតហេតុ ស្រាប់តែជនសង្ស័យចំនួន០៣នាក់ខាងលើ ជិះម៉ូតូ០១គ្រឿង មិនចាំម៉ាកធ្វើសកម្មភាពធាក់ដៃចង្កូតម៉ូតូរបស់ជនរងគ្រោះ បណ្ដាលឲ្យដួល ។ បន្ទាប់មកជនសង្ស័យចំនួន០២នាក់ ក៏បានចុះពីលើម៉ូតូយកកាំបិតកែច្នៃភ្ជង់គំរាមជនរងគ្រោះកុំឲ្យស្រែកឆោឡោ ប្លន់យកម៉ូតូម៉ាកខាងលើ និងខ្សែកប្លាទីន ទម្ងន់៥ជី ពីជនរងគ្រោះរួចគេចខ្លួនបាត់ស្រមោល ។
នគរបាលដដែលបានបញ្ជាក់ប្រាប់ទៀតថា ក្រោយពេលកើតហេតុស្ត្រីរងគ្រោះ ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ ហើយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានដឹកនាំបញ្ជាកម្លាំងធ្វើការស្រាវជ្រាវ រហូតដល់ថ្ងៃទី១៥ ខែកញ្ញា ឆ្នាំ២០២៥ វេលាម៉ោង១៨និង០០នាទីល្ងាច ទើបឃាត់ខ្លួនជនសង្ស័យបាន០១នាក់ ឈ្មោះ ជា ម៉ាប់ នៅតាមផ្លូវលំ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ រួមនិងវត្ថុតាងខាងលើ រួចនាំយកមកសាកសួរនៅប៉ុស្តិ៍នគរបាលរដ្ឋបាលដង្កោ ។
ក្រោយពេលសួរនាំជនសង្ស័យឈ្មោះ ជា ម៉ាប់ បានសារភាពថា ខ្លួន និងបក្ខពួកចំនួន០២នាក់ទៀត គឺឈ្មោះ បូរិទ្ធី ហៅ ហុក និងឈ្មោះ ជៀម វិសាល ពិតជាបានធ្វើសកម្មភាពប្លន់យកម៉ូតូ និងខ្សែកប្លាទីន របស់ជនរងគ្រោះពិតមែន ។ បន្ទាប់មកបក្ខពួកឈ្មោះ ជៀម វិសាល ជាអ្នកយកម៉ូតូ និងខ្សែកប្លាទីនដែលប្លន់បានទៅលក់ ប៉ុន្តែមិនដឹងថា លក់ឲ្យនរណាឡើយ រួចឈ្មោះ ជៀម វិសាល បានឲ្យលុយឲ្យខ្លួនចំនួន៩០,០០០រៀល ហើយខ្លួនបានយកសុីចាយ និងទិញថ្នាំញៀនជក់អស់ហើយ ។
នគរបាលបានិយាយផងដែរថា ដោយឡែកបទល្មើសទី២ ៖ សកម្មភាពឆក់កាបូបនៅតាមផ្លូវបេតុង ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង០៦និង៣០នាទីព្រឹកថ្ងៃទី១៥ ខែកញ្ញា ឆ្នាំ២០២៥ ហើយនគរបាលបានស្រាវជ្រាវឃាត់ខ្លួនជនសង្ស័យ០២នាក់ ។ រីឯបទល្មើសទី៣ ៖ ករណីគាស់បង្អួចលួចទួរស័ព្ទដៃកើតឡើងកាលពីថ្ងៃទី១២ ខែ កញ្ញា ឆ្នាំ២០២៥ កម្លាំងនគរបាលស្រាវជ្រាវឃាត់ខ្លួនជនសង្ស័យបានម្នាក់ ហើយតុលាការសម្រេចចេញដីការឃុំខ្លួនជនសង្ស័យរូបនោះហើយ ៕
ចែករំលែកព័តមាននេះ