ខេត្តបន្ទាយមានជ័យ ៖ ក្មេងស្រីអាយុប្រហែល៤ឆ្នាំម្នាក់ ត្រូវបានរថយន្តដឹកដីកិនស្លាប់យ៉ាងអាណោចអាធ័មនៅនឹងកន្លែងកើតហេតុ ខណៈរត់ឆ្លងផ្លូវតាមម្តាយទៅផ្សារទិញម្ហូប ។
ហេតុការណ៍គួរន្ធត់ខាងលើនេះបានកើតឡើងកាលពីវេលាម៉ោង៥និង១៥នាទីល្ងាចថ្ងៃទី២៩ ខែកក្កដា ឆ្នាំ២០១៩ នៅចំណុចមុខផ្សារពង្រ ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ។
ក្មេងស្រីរងគ្រោះឈ្មោះ លិន ស្រីណាន់ អាយុ៤ឆ្នាំ នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ ចំណែករថយន្តដឹកដីមួយគ្រឿងប្រភេទកង់១០ ពាក់ស្លាកលេខ បន្ទាយមានជ័យ ៣A- ២២២២ បើកបរដោយបុរសម្នាក់មិនស្គាល់អត្តសញ្ញាណ ត្រូវសមត្ថកិច្ចចាប់ឃាត់ខ្លួន ។
បើតាមប្រភពនៅកន្លែងកើតហេតុបានឲ្យដឹងថា មុនពេលកើតហេតុ គេឃើញម្តាយជិះម៉ូតូដឹកក្មេងស្រីរងគ្រោះមកទិញម្ហូបនៅផ្សារពង្រ ដោយទុកកូនឲ្យនៅចាំម៉ូតូ ហើយម្តាយដើរឆ្លងផ្លូវទៅទិញម្ហូប ស្រាប់តែកូនស្រីបានរត់តាមពីក្រោយដោយស្ត្រីជាម្តាយមិនបានដឹងនោះទេ ស្របពេលនោះក៏មានរថយន្តដឹកដីមួយគ្រឿងមកដល់ក៏បុក និងកិនក្មេងស្រីនោះខ្ទេចមើលសពលែងយល់ ។
តាមប្រភពដដែលបានបន្តថា បន្ទាប់ពីកើតហេតុ សមត្ថកិច្ចឃាត់ខ្លួនអ្នកបើកបរបានភ្លាមៗនៅកន្លែងកើតភ្លាមៗ ហើយបញ្ជូនទៅការិយាល័យនគរបាលចរាចរណ៍ខេត្តតែម្តង ព្រោះខ្លាចក្រែងកើតមានអំពើហិង្សាណាមួយពីសំណាក់ក្រុមគ្រួសារក្មេងស្រីរងគ្រោះ និងប្រជាពលរដ្ឋនៅទីនោះ ។
ក្រោយពីកើតហេតុ សមត្ថកិច្ចបានធ្វើការវាស់វែង និងយករថយន្តទៅរក្សាទុកនៅនគរបាលចរាចរណ៍ខេត្ត ដើម្បីដោះស្រាយតាមនីតិវិធី ។ ចំណែកសពក្មេងស្រីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី។
ទាក់ទិនទៅនឹងករណីគ្រោះថ្នាក់ចរាចរណ៍គួរឱ្យរន្ធត់ខាងលើនេះ ប្រជាពលរដ្ឋនៅទីនោះបាននិយាយរិះគន់ចំពោះរថយន្តដឹកដីដែលធ្វើចរាចរណ៍តាមផ្លូវជាតិលេខ៥៦A នេះ គឺតែងតែបើកបរលឿនៗ មិនគិតថាជាទីប្រជុំជននោះទេ ជាពិសេសគឺអ្នកបើកបរស៊ីឈ្នួលឲ្យគេ ព្រោះអាងតែមិនមែនជារថយន្តរបស់ខ្លួន ហើយបើមានបញ្ហា គឺម្ចាស់រថយន្តជាអ្នកចូលខ្លួនមកដោះស្រាយ ឲ្យតែអ្នកបើកបររត់គេចខ្លួនរួច ៕ (កែសម្រួលដោយ ៖ ធីតា)
ចែករំលែកព័តមាននេះ