រាជធានីភ្នំពេញ ៖ យ៉ាងហោចណាស់មនុស្ស១នាក់ បានរងរបួសធ្ងន់ធ្ងរ និងត្រូវបានក្រុមសង្គ្រោះអង្គភាព៧១១ ដឹកបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈភ្លាមៗ ខណៈអ្នកទាំង៣នាក់ខាងលើ ជិះម៉ូតូម៉ាកហុងដាស្កូបពី ១គ្រឿង ឌុបគ្នា…
រាជធានីភ្នំពេញ ៖ យ៉ាងហោចណាស់មនុស្ស១នាក់ បានរងរបួសធ្ងន់ធ្ងរ និងត្រូវបានក្រុមសង្គ្រោះអង្គភាព៧១១ ដឹកបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈភ្លាមៗ ខណៈអ្នកទាំង៣នាក់ខាងលើ ជិះម៉ូតូម៉ាកហុងដាស្កូបពី ១គ្រឿង ឌុបគ្នា ក្នុងល្បឿនលឿនគួរសម ជ្រុលទៅបុកម៉ូតូកង់បី ១គ្រឿងទៀត កំពុងបើកបរឆ្លងផ្លូវពេញទំហឹង ។
ឧប្បត្តិហេតុខាងលើនោះបានកើតឡើងកាលពីវេលាម៉ោង៥ល្ងាចថ្ងៃទី៣ ខែកុម្ភៈ ឆ្នាំ២០២៦ នៅតាមផ្លូវជាតិលេខ៤ ស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមអ្នកលក់ដូរអីវ៉ាន់នៅជិតនោះ និយាយថា នៅមុនពេលកើតហេតុ ជនរងគ្រោះទាំង៣នាក់ ក្នុងនោះមានក្មេងស្រីជំទង់២នាក់ និងយុវជនម្នាក់ បានជិះម៉ូតូ ១គ្រឿង ម៉ាកហុងដាស្កូបពី ពណ៍ក្រហម ពាក់ស្លាកលេខភ្នំពេញ 1LL-0185 ឌុបគ្នាធ្វើដំណើរតាមផ្លូវជាតិលេខ៤ ក្នុងល្បឿនលឿនគួរសម និងក្នុងទិសដៅពីកើតទៅលិច។ លុះពេលទៅដល់ត្រង់ចំណុចកើតហេតុខាងលើ ស្រាប់តែវាក់ជាមួយម៉ូតូកង់បី ១គ្រឿង ពណ៍ស ពាក់ស្លាកលេខភ្នំពេញ1JZ-7900 កំពុងបើកបរឆ្លងផ្លូវជាតិលេខ៤ ក្នុងទិសដៅពីជើងទៅត្បូង ហើយគេចអត់ទាន់ ក៏ជ្រុលទៅបុកពេញទំហឹងតែម្ដង ។
អ្នកលក់ដូរខាងលើ បាននិយាយទៀតថា ខណៈនោះបណ្ដាលឲ្យដួលម៉ូតូខ្ទាតក្មេងស្រីជំទង់ម្នាក់ ផ្លោងធ្លាក់បោកផ្ទប់ថ្នល់រងរបួសធ្ងន់ ចំណែកយុវជនអ្នកបើកបរម៉ូតូ និងក្មេងស្រីជំទង់ម្នាក់ទៀត រងរបួសស្រាល ហើយម៉ូតូស្កូបពី និងម៉ូតូកង់បីរងការខូចខាត ។
ក្រោយពេលកើតហេតុក្រុមសង្គ្រោះអង្គភាព៧១១ បានដឹកអ្នករងរបួសទៅសង្គ្រោះបន្ទាន់នៅមន្ទីរពេទ្យព្រះកុសុមៈ បន្ទាប់មកនគរបាលប៉ុស្តិ៍ចោមចៅទី៣និងនគរបាលខណ្ឌពោធិ៍សែនជ័យចុះវាស់វែងរួចនាំយកម៉ូតូ និងម៉ូតូកង់បីទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ