រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ មិនដឹងជាប្រញាប់ទៅណាទេ បានជិះម៉ូតូ ១គ្រឿង ម៉ាកហុងដាឌ្រីមសេ១២៥ ឆ្លងផ្លូវផង បើកលឿនដូចហោះ ហើយក៏ជ្រុលទៅបុកម៉ូតូ…
រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ មិនដឹងជាប្រញាប់ទៅណាទេ បានជិះម៉ូតូ ១គ្រឿង ម៉ាកហុងដាឌ្រីមសេ១២៥ ឆ្លងផ្លូវផង បើកលឿនដូចហោះ ហើយក៏ជ្រុលទៅបុកម៉ូតូ ១គ្រឿងទៀត ម៉ាកហុងដាស្កូបពី ពេញទំហឹង។ បណ្ដាលឲ្យដួលទាំងអស់គ្នា ហើយខ្ទាតក្មេងប្រុសជំទង់ម្នាក់ ដែលជាអ្នកជិះម៉ូតូស្កូបពី ចូលក្រោមកង់រថយន្តកុងតឺន័រ កិនរងរបួសធ្ងន់ធ្ងរ ចំណែកបុរស ដែលជាជនបង្ក អត់របួសឡើយ រួចលើកម៉ូតូជិះរត់គេចបាត់ស្រមោល ។
ឧប្បត្តិហេតុខាងលើនោះ បានកើតឡើងនៅវេលាម៉ោង៤រសៀលថ្ងៃទី៤ ខែកុម្ភៈ ឆ្នាំ២០២៦ នៅលើកំណាត់ផ្លូវជាតិលេខ៤ ស្ថិតនៅត្រង់ចំណុច បុរីសែនមនោរម្យ ភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ច បានប្រាប់ឲ្យដឹងថា ក្មេងប្រុសជំទង់រងគ្រោះឈ្មោះ ផល្លា បញ្ញាបុត្រ អាយុ១៦ឆ្នាំ ជាសិស្ស មានទីលំនៅភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ ចំណែកក្មេងប្រុសជំទង ដែលជាអ្នកឌុបឈ្មោះ ប៊ុន សាលវ័ន្ត អាយុ១៦ឆ្នាំ មានទីលំនៅភូមិជាមួយគ្នារបួសស្រាល។ នៅមុនពេលកើតហេតុ ក្មេងប្រុសជំទង់រងគ្រោះ បានជិះម៉ូតូ១គ្រឿងម៉ាកហុងដាស្កូបពី ពណ៍ខ្មៅ ពាក់ស្លាកលេខភ្នំពេញ1JI-3800 ពីក្រោយមិត្តភក្ដិ (មិត្តភក្ដិជាអ្នកឌុប) ធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច ស្របគ្នាជាមួយរថយន្តកុងតឺន័រ ១គ្រឿង ។
សមត្ថកិច្ចបានប្រាប់ឲ្យដឹងបន្តថា លុះពេលទៅដល់ត្រង់ចំណុចកើតហេតុ ស្រាប់តែមានបុរសមិនស្គាល់អត្តសញ្ញាណម្នាក់ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខត្បូងឃ្មុំ 1M-6919 ឆ្លងផ្លូវក្នុងទិសដៅពីជើង ទៅត្បូង ជ្រុលមកបុកពេញទំហឹងតែម្ដង។ ពេលនោះ បានបណ្ដាលឲ្យម៉ូតូទាំង២គ្រឿងដួល ហើយខ្ទាតក្មេងប្រុសជំទង់ខាងលើ ចូលកង់រថយន្តកុងតឺន័រកិន បណ្ដាលឲ្យរងរបួសធ្ងន់ធ្ងរ ចំណែកបុរស ដែលជាជនបង្ក អត់របួសនោះទេ រួចក៏លើកម៉ូតូជិះគេចខ្លួន។ ខណៈនោះ ប្រជាពលរដ្ឋបាននាំគ្នាដេញចាប់ដែរ ប៉ុន្តែតាមអត់ទាន់ ហើយបុរសនោះ ក៏គេចខ្លួនបាត់ដោយសុវត្ថិភាព ចំណែករថយន្តកុងតឺន័រ ដែលកិនក្មេងប្រុសជំទង់ខាងលើ ក៏ត្រូវបានប្រជាពលរដ្ឋឃាត់ទុកផងដែរ ។
សមត្ថកិច្ច បានបញ្ជាក់ប្រាប់បន្ថែមទៀតថា លុះក្រោយមកឪពុកម្ដាយក្មេងប្រុសរងគ្រោះខាងលើ ទៅដល់កន្លែងកើតហេត និងបានសួរនាំទៅកាន់អ្នកឃើញហេតុការណ៍បានដឹងថា កូនប្រុសគាត់ជិះម៉ូតូបុកគ្នា ដួលខ្ទាតចូលក្រោមរថយន្តកុងតឺន័រ ដោយខ្លួនឯង។ ទើបពួកគាត់អត់ប្ដឹងផ្ដល់ ហើយអនុញ្ញាតឲ្យរថយន្តកុងតឺន័រនោះ បន្តដំណើរទៅមុខទៀតបាត់ទៅ បន្ទាប់មកពួកគាត់បានសុំយកម៉ូតូ ទៅធ្វើការជួសជុលឡើងវិញដោយខ្លួនឯង ចំណែកក្រុមសង្គ្រោះអង្គភាព៧១១ បានដឹកយកជនរងគ្រោះទៅកាន់មន្ទីរពេទ្យដើម្បីសង្គ្រោះបន្ទាន់ ៕
ចែករំលែកព័តមាននេះ