រាជធានីភ្នំពេញ ៖ និស្សិតម្នាក់ចេញពីផឹកស៊ីជាមួយមិត្តភក្តិ ពេលត្រលប់មកផ្ទះវិញត្រូវក្រុមចោរស្ទាក់វាយនឹងដុំថ្មត្រូវចំមាត់បែកឈាមរងរបួសធ្ងន់ ប្លន់យកម៉ូតូដោយសុវត្ថិភាព ដែលហេតុការណ៍នេះ បានកើតឡើងកាលពីវេលាម៉ោង ១១ និង ៤៥នាទី យប់ថ្ងៃទី០៤ កុម្ភៈ ២០១៤ នៅតាមបណ្តោយផ្លូវនតប្រ៊ីត កែងផ្លូវ២០០៤ ស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ។
យុវជនរងគ្រោះជានិស្សិតឆ្នាំទី១ ស្នាក់នៅម្តុំវត្តសំរោងអណ្តែត សង្កាត់ភ្នំពេញថ្មី ខណ្ឌសែនសុខ បានរងរបួសធ្ងន់ត្រូវរថយន្តសាមុយដឹកទៅសង្រ្គោះបន្ទាន់នៅមន្ទីរពេទ្យ។
តាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះ និងមិត្តភក្តិ ២នាក់ទៀត បានទៅផឹកស៊ីនៅហាងមួយកន្លែងតាមបណ្តោយផ្លូវ២០០៤ តាំងពីម៉ោង ៩យប់ លុះដល់ម៉ោងជាង ១១យប់ ពេលជនរងគ្រោះជិះម៉ូតូត្រលប់មកផ្ទះវិញជាមួយមិត្តភក្តិមកដល់ចំណុចកើតហេតុ ក៏មានក្រុមចោរមានគ្នា ៤នាក់ ជិះម៉ូតូ ២គ្រឿង ចាំស្ទាក់វាយនឹងដុំថ្មបណ្តាលឲ្យជនរងគ្រោះជាអ្នកបើកបរម៉ូតូរងរបួសធ្ងន់តែម្តង ចំណែកក្រុមចោរបានលើកម៉ូតូជនរងគ្រោះជិះរត់គេចខ្លួនបាត់ដោយសុវត្ថិភាព៕
ចែករំលែកព័តមាននេះ