ខេត្តស្ទឹងត្រែង ៖ មានមនុស្សម្នាក់បានស្លាប់ និង ៧នាក់ទៀត រងរបួសធ្ងន់ស្រាល ក្នុងឧប្បត្តិហេតុគ្រោះថ្នាក់ចរាចរណ៍កាលពីវេលាម៉ោង ៤ និង ៤៥នាទី ល្ងាចថ្ងៃទី០២ កុម្ភៈ ២០១៤ ត្រង់ចំណុចផ្លូវជាតិលេខ៧៨អា បង្គោលលេខ៤៨៥ នៃទឹកដីស្រុកកោះញែក ខេត្តមណ្ឌលគិរី។ ជនរងគ្រោះត្រូវបានសមត្ថកិច្ចដឹកបញ្ជូនមកសង្រ្គោះនៅមន្ទីរពេទ្យបង្អែកខេត្តស្ទឹងត្រែង។
តាមព័ត៌មានបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តម៉ាក Ford បុកជាមួយរថយន្តសំាយ៉ុង ១២កៅអី ក្នុងទិសដៅបញ្រ្ចាសទិសគ្នា ដែលរថយន្តសំាយ៉ុងធ្វើដំណើរពីខេត្តរតនគិរី ឆ្ពោះទៅភ្នំពេញ ចំណែករថយន្តបង្កធ្វើដំណើរពីអូរពងមាន់ ខេត្តស្ទឹងត្រែង ទៅខេត្តរតនគិរី។
លុះដល់ចំណុចកើតហេតុ រថយន្ត Ford បានបើកចូលផ្លូវរបស់រថយន្តសាំយ៉ុង រួចបុកទាំងកំរោលធ្វើឲ្យរថយន្តសាំយ៉ុងក្រឡាប់ជាច្រើនត្រលប់ចូលទៅក្នុងព្រៃ បណ្តាលឲ្យមនុស្សម្នាក់ស្លាប់ និង ៧នាក់ទៀត រងរបួស រីឯខាងរថយន្ត Ford បានដាច់កង់ខាងមុខ អ្នកបើកបររត់គេចខ្លួចបាត់ស្រមោល។
ជនរងគ្រោះទី១ ឈ្មោះ ហឿង ណែង ភេទប្រុស អាយុ ៧១ឆ្នាំ រស់នៅសង្កាត់អូរឫស្សី២ ខណ្ឌ ៧មករា រាជធានីភ្នំពេញ ស្លាប់នៅនឹងកន្លែង។ ចំណែកអ្នករងរបួសធ្ងន់មានឈ្មោះ ហឿង ស៊ូហុង ភេទស្រី អាយុ ៤៨ឆ្នាំ ជាអ្នកលក់ដូរនៅផ្សារដើមគ រាជធានីភ្នំពេញ ត្រូវជាកូនស្រីរបស់ជនរងគ្រោះដែលស្លាប់ និងអ្នករងរបួសស្រាល ៦នាក់ទៀត ជាសាច់ញាតិក្រុមគ្រួសារ។
លោក គង់ រតនា នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត បានឲ្យដឹងថា គ្រោះថ្នាក់ចរាចរណ៍បានកើតឡើងនៅចំណុចភូមិសាស្រ្តខេត្តមណ្ឌលគិរី ដូច្នេះ កម្លាំងនគរបាលខេត្តស្ទឹងត្រែង បានត្រឹមបញ្ចូនជនរងគ្រោះមកមន្ទីរពេទ្យខេត្តស្ទឹងត្រែង ប៉ុណ្ណោះ ចំពោះរថយន្តបង្កហេតុ មិនបានដឹងពីស្លាកលេខទេ ព្រោះទុកឲ្យសមត្ថកិច្ចខាងខេត្តមណ្ឌលគិរី ជាអ្នកធ្វើការ។
លោក គង់ រតនា បន្តថា រយៈពេល ៣ថ្ងៃ នៅក្នុងឱកាសចូលឆ្នាំប្រពៃណីចិន គិតចាប់ពីថ្ងៃទី៣០ មករា ដល់ថ្ងៃទី០២ កុម្ភៈ មានគ្រោះថ្នាក់ចរាចរណ៍ចំនួន ២ករណី បណ្តាលឲ្យមនុស្ស ២នាក់ របួសធ្ងន់ និងម្នាក់ទៀតរបួសស្រាល ខូចខាតម៉ូតូធ្ងន់ ២គ្រឿង រថយន្ត ១គ្រឿង ខូចខាតស្រាល។ គ្រោះថ្នាក់ចរាចរណ៍នេះ បណ្តាលមកពីល្បឿនលឿន និងការប្រជែងគ្នា៕
ចែករំលែកព័តមាននេះ