រាជធានីភ្នំពេញ ៖ មានមនុស្សចំនួន៤នាក់បានស្លាប់ និង១៣នាក់រងរបួសធ្ងន់ ៨នាក់រងរបួសស្រាល ក្នុងគ្រោះថ្នាក់ចរាចរណ៍រយៈពេល៤ថ្ងៃគឺចាប់ពីថ្ងៃទី៣០-៣១ មករា និងថ្ងៃទី១-២ កុម្ភៈ អំឡុងពេលនៃពិធីបុណ្យចូលឆ្នាំប្រពៃណីចិន-វៀតណាមនៅរាជធានីភ្នំពេញក្នុងគ្រោះថ្នាក់ចរាចរណ៍ដែលបានកើតឡើងចំនួន១៤លើក នេះ
បើតាមការឱ្យដឹងពីលោកវរសេនីយ៍ទោ ចេវ ហាក់ ប្រធានការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ។
លោកចេវ ហាក់ បញ្ជាក់ឱ្យដឹងទៀតថា ចំនួនគ្រោះថ្នាក់ចរាចរណ៍នេះបើប្រៀបធៀបទៅនឹងឆ្នាំ២០១៣ក្នុងរយៈពេលដូចគ្នាឃើញថា មានការថយចុះ២លើក ចំនួនអ្នកស្លាប់ដោយគ្រោះថ្នាក់ចរាចរណ៍ថយចុះ២នាក់ រងរបួសធ្ងន់ថយចុះ៩នាក់ និងរបួសស្រាលថយចុះ២នាក់ ។ លោកបានកត់សម្គាល់ថា បើពិនិត្យពីស្ថានភាពទូទៅស្តីពីចរាចរណ៍ក្នុងរាជធានីភ្នំពេញគឺមានសភាព ចង្អៀតនៅថ្ងៃទី៣០ មករា ដែលជាថ្ងៃសែនចិន ពិសេសនៅតាមទីផ្សារ និងនៅតាមច្រកចេញចូលរាជធានីភ្នំពេញ ។ ប៉ុន្តែស្ថានភាពចរាចរណ៍ហាក់មានសភាពស្ងប់ស្ងាត់នៅថ្ងៃទី១-២ កុម្ភៈ ។ លំហូរចូលចរាចរណ៍ចូលមកក្នុងរាជធានីភ្នំពេញ បានកើនឡើងវិញចាប់ពីល្ងាចថ្ងៃទី២ កុម្ភៈ នៅពេលដែលប្រជាពលរដ្ឋវិលមកពីធ្វើដំណើរកម្សាន្តវិញ និងសម្រាកលំហែតាមរមណីយដ្ឋាននានានៅចុងសប្តាហ៍ស្របនឹងឱកាសចូលឆ្នាំនេះដែរ ។
ចំណុចគួរកត់សម្គាល់មួយទៀតក្នុងឱកាសចូលឆ្នាំចិន ក្នុងរាជធានីភ្នំពេញ គេមិនបានឮសំឡេងផាវផ្ទុះនៅថ្ងៃសែនដូចឆ្នាំមុនៗនោះទេ ដែលបង្ហាញឱ្យឃើញពីការចូលរួមរបស់ប្រជាពលរដ្ឋក្នុងរាជធានីភ្នំពេញក្នុងការអនុវត្តតាមសេចក្តីណែនាំរបស់សាលារាជធានីភ្នំពេញ ដើម្បីរួមចំណែករក្សាសន្តិសុខ សណ្តាប់ធ្នាប់ របៀបរៀបរយសាធារណៈក្នុងទីក្រុងបានល្អប្រសើរ ៕
ចែករំលែកព័តមាននេះ