ទំហំនៃបំណុលដែលរាជរដ្ឋាភិបាលកម្ពុជា បានចុះកិច្ចព្រមព្រៀងឥណទានសម្បទានថ្មីជាមួយនឹងដៃគូអភិវឌ្ឍន៍នានានៅឆមាសទី១នៃឆ្នាំ២០២៥ គឺមានការថយចុះប្រមាណជា៣៧ភាគរយ ហើយមិនតែប៉ុណ្ណោះ បំណុលទាំងនោះគឺសុទ្ធសឹងតែជាបំណុលមានកម្រិតសម្បទានខ្ពស់។
តាមសេចក្តីរាយការណ៍នៅក្នុងព្រឹត្តិបត្រស្ថិតិបំណុលសាធារណៈកម្ពុជា ដែលក្រសួងសេដ្ឋកិច្ចនិងហិរញ្ញវត្ថុបានចេញថ្មីៗនេះបានឲ្យដឹងថា នៅឆមាសទី១នៃឆ្នាំ២០២៥ រាជរដ្ឋាភិបាលកម្ពុជាបានចុះកិច្ចព្រមព្រៀងខ្ចីលុយពីដៃគូអភិវឌ្ឍន៍នានា ត្រឹមតែជាង ១៩៦,៤៨ លានដុល្លារប៉ុណ្ណោះ ។
ប្រភពដដែលបានបន្តថា បើធៀបនឹងរយៈពេលដូចគ្នានឹងឆ្នាំ២០២៤កន្លងទៅ ទំហំបំណុលដែលកម្ពុជា បានខ្ចីគេគឺថយចុះប្រមាណជា៣៧ភាគរយ ហើយម្យ៉ាងវិញទៀត បំណុលដែលកម្ពុជាជំពាក់ទាំងនោះគឺសុទ្ធសឹងតែជាបំណុលមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណជា៣៦ភាគរយឯណោះ។
ប្រភពដដែលបានបន្តទៀតថា គោលដៅនៃការចុះកិច្ចព្រមព្រៀងបំណុលថ្មីទាំងនេះ គឺមិនមែនដើម្បីមកបំពេញចំណាយផ្តេសផ្តាស់ឡើយ គឺសម្រាប់បំពេញតម្រូវការហិរញ្ញប្បទានក្នុងវិស័យអទិភាពរបស់រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើន រយៈពេលវែង និង បង្កើនផលិតភាពសេដ្ឋកិច្ច ឫផលិតភាពផលិតកម្ម ។
ប្រភពដដែលបានបន្តថា ប្រភពចំណាយសំខាន់នៃបំណុលទាំងនេះ ត្រូវបានគេដឹងថា គឺយកទៅអភិវឌ្ឍន៍ហេដ្ឋារចនាសម្ព័ន្ធ និង វិស័យអាទិភាព សរុប ៨៧ភាគរយ។
គិតមកដល់ឆមាសទី១នៃឆ្នាំ២០២៥ កម្ពុជាមានបំណុលថ្នាក់ជាតិសរុបទំហំ១២,៦៧ ពាន់លានដុល្លារ នៅក្នុងនោះ កម្ពុជាជំពាក់ចិនដោយមានទំហំស្មើនឹង៣៣ភាគរយ ធនាគារអភិវឌ្ឈន៍អាស៊ី ២១ភាគរយ ធនាគារពិភពលោក១៤ភាគរយ ជប៉ុនប្រមាណជា១១ភាគរយ កូរ៉េខាងត្បូងនិងបារាំងគឺប្រមាណជា ៦ភាគរយដូចគ្នា ហើយបំណុលមរតកនោះ គឺ៥ភាគរយ ។
បំណុលទាំងនោះត្រូវបានគេដឹងថា គឺយកមកចំណាយដើម្បីអភិវឌ្ឍន៍ហេដ្ឋារចនាសម្ព័ន្ធនានា ដែលមាន ដូចជាដឹកជញ្ជូន ផ្គត់ផ្គង់ទឹកស្អាត ថាមពល ធារាសាស្ត្រ ក្រៅពីនោះគឺមានកសិកម្ម សុខាភិបាល អប់រំ ជាដើម ។
អ្នកវិភាគបានលើកឡើងថា ដោយពិនិត្យមើលស្ថានភាពបំណុលថ្នាក់ជាតិថ្មីដែលទើបនឹងចេញនេះ បញ្ជាក់ថា កម្ពុជាមានសុវត្ថិភាពផ្នែកហិរញ្ញវត្ថុ ហើយរាជរដ្ឋាភិបាលពិតជាមានការប្រុងប្រយ័ត្នណាស់ ចំពោះបញ្ហាបំណុល ។
អ្នកវិភាគដដែលបានបន្តថា នៅក្នុងស្ថានភាពដែលពន្ធបដិការអាមេរិកត្រូវឡើងពី១០ទៅ១៩ភាគរយ, បញ្ហាអវិជ្ជមាននៃការប៉ះទង្គិចនៅព្រំដែនមិនទាន់មានតម្រុយថាត្រូវដោះស្រាយយ៉ាងណា, និងបញ្ហាផ្សេងៗពាក់ព័ន្ធនឹងបញ្ហាភូមិសាស្ត្រនយោបាយមានភាពស្មុគស្មាញនៅលើពិភពលោក វាពិតជាពេលវេលាដែលរាជរដ្ឋាភិបាលគួរបង្អាក់ឫបន្ថយដៃ លើការស្វែងរកបំណុល
បន្ថែម ។
ចែករំលែកព័តមាននេះ