រាជធានីភ្នំពេញ ៖ កិច្ចពិភាក្សាការងាររវាងលោកថោង ខុន រដ្ឋមន្ត្រីក្រសួងទេសចរណ៍ និងលោកHidea Sawada ប្រធានមូលនិធិគាំទ្រអប់រំអន្តរជាតិ និងជាអគ្គនាយកក្រុមហ៊ុន H.T.S Company LTD ដែលបានធ្វើឡើងកាលពីថ្ងៃទី៣១ មករា ឆ្នាំ២០១៤កន្លងទៅនេះ នៅទីស្តីការក្រសួងភាគីទាំងពីរបានជំរុញ ហើយនឹងសម្រេចឱ្យមានការហោះហើរដោយត្រង់ពីប្រទេសជប៉ុនមកកម្ពុជា ។
លោក Hidea Sawada បញ្ជាក់ថា យ៉ាងហោចណាស់ក្នុងរយៈពេល៦ខែទៀតនឹងមានការហោះហើរត្រង់ពីជប៉ុនមកកម្ពុជា ជាពិសេសពីទីក្រុងតូក្យូមកសៀមរាប ហើយក៏អាចនឹងមានការតភ្ជាប់ពីអាមេរិក តូក្យូ សៀមរាបផងដែរ ។ បន្ថែមពីលើនេះទៀត លោកនឹងខិតខំព្យាយាមស្វែងរកដៃគូវិនិយោគ ដើម្បីអភិវឌ្ឍន៍តំបន់ឆ្នេរនៅក្នុងប្រទេសកម្ពុជា ក្នុងនោះអាចនឹងមានការវិនិយោគឧទ្យានក្រោមសមុទ្រ និងការអភិវឌ្ឍ Resort និងសណ្ឋាគារជាលក្ខណៈអន្តរជាតិនៅលើកោះនានានៅតំបន់ឆ្នេរនៃប្រទេសកម្ពុជា ។ ក្នុងកិច្ចពិភាក្សាគ្នានោះដែរ ភាគីទាំងពីក៏បានធ្វើការសិក្សាទៅលើគម្រោងវិនិយោគរៀបចំសួនសម្រាប់េទសចរណ៍ ដែលជំហានដំបូងនេះគឺកំពុងតែសិក្សានៅភ្នំពេញ និងខេត្តសៀមរាប ។ លោកថោង ខុន រដ្ឋមន្ត្រីក្រសួងទេសចរណ៍បានជម្រាបជូនភ្ញៀវពីសក្តានុពលវិស័យទេសចរណ៍កម្ពុជាផ្អែកលើទេសចរណ៍វប្បធម៌ធម្មជាតិ ។
ប្រទេសកម្ពុជា មានសក្តានុពលវប្បធម៌ដ៏អស្ចារ្យគឺប្រាសាទអង្គរវត្ត និងវប្បធម៌អរូបីជាច្រើន និងមានតំបន់ឆ្នេរសមុទ្រដ៏ស្អាត និងតំបន់អេកូទេសចរណ៍ធម្មជាតិភាគឦសាន ។ លោករដ្ឋមន្ត្រីបញ្ជាក់ថា កម្ពុជាទទួលភ្ញៀវទេសចរមកទស្សនាបានជាង៤លាន២សែននាក់ នៅឆ្នាំ២០១៣ កន្លងមក ។ ក្នុងទីផ្សារទេសចរណ៍ទាំង១០ មានទេសចរមកទស្សនាកម្ពុជាច្រើនជាងគេគឺវៀតណាម ចិន កូរ៉េ ក្នុងនោះភ្ញៀវទេសចរជប៉ុនស្ថិតក្នុងលំដាប់ទី៦គឺមានការកើនឡើង។ ក្នុងកំណើន១៥,៥% នៃចំនួនទេសចរទាំងអស់ មាន៥០% ទៅទស្សនាអង្គរវត្តគឺមានចំនួន២លាន២សែននាក់ នៅភ្នំពេញ១លាន៩សែននាក់ និងភ្ញៀវទេសចរទៅទស្សនាតំបន់អេកូទេសចរណ៍មានការកើនឡើង១២% ក្នុងនោះក៏មានគោលដៅទេសចរណ៍វប្បធម៌បេតិកភណ្ឌថ្មីមួយទៀតគឺប្រាសាទព្រះវិហារ ។ លោករដ្ឋមន្ត្រីបន្ថែមថា តាមការព្យាករណ៍នៅឆ្នាំ២០១៥ កម្ពុជាអាចទទួលភ្ញៀវទេសចរបាន៥លាននាក់ និងនៅឆ្នាំ២០២០ អាចបាន៧លាននាក់ ។ ទីផ្សារទេសចរណ៍កម្ពុជាសរុប ៧៥%មកពីអាស៊ីប៉ាស៊ីហ្វិក មកពីអឺរ៉ុប១៧% និងមកពីអាមេរិក៧% ។ ជារួមវិស័យទេសចរណ៍បាននាំមកនូវចំណូលជាតិចំនួន ២.៥៤៧លានដុល្លារ កាលពីឆ្នាំមុន និងបានរួមចំណែក១២% ទៅក្នុងGDP ហើយបានបង្កើតការងារ ដោយផ្ទាល់ជូនប្រជាជនបានចំនួន៤០ម៉ឺននាក់ ។
លោករដ្ឋមន្ត្រីថោង ខុន សម្តែងការរំពឹងទុកថា តាមរយៈការជំរុញឱ្យមានការហោះហើរត្រង់ពីជប៉ុនមកកម្ពុជានេះដែរ នឹងអាចទាក់ទាញភ្ញៀវទេសចរ និងសម្រួលការធ្វើដំណើរដល់អ្នកទេសចរជប៉ុនដែលមានវ័យចាស់ៗមកកាន់ប្រទេសកម្ពុជា បានច្រើនថែមទៀត និងជួយជំរុញអ្នកវិនិយោគជប៉ុនលើវិស័យទេសចរណ៍ និងអភិវឌ្ឍន៍កោះឆ្នេរនិងសួនទេសចរណ៍នៅកម្ពុជា ៕
ចែករំលែកព័តមាននេះ