ខេត្តកំពង់ចាម ៖ អ្នកធ្វើដំណើរតាមម៉ូតូចំនួន ២គ្រឿង មានគ្នា ៦នាក់ ត្រូវបានរថយន្តកាមរីឆ្លាម ១គ្រឿង ពណ៌ស្ករ បើកបុកយ៉ាងពេញទំហឹងនៅលើកំណាត់ផ្លូវជាតិលេខ៧ ស្ថិតនៅភូមិទន្លេបិទលើ ឃុំទន្លេបិទ ស្រុកត្បូងឃ្មុំ ដែលហេតុការណ៍នេះ បានកើតឡើងកាលពីវេលាម៉ោង ៦ និង ៣០នាទី ល្ងាចថ្ងៃទី៣០ មករា ២០១៤
ខេត្តកំពង់ចាម ៖ អ្នកធ្វើដំណើរតាមម៉ូតូចំនួន ២គ្រឿង មានគ្នា ៦នាក់ ត្រូវបានរថយន្តកាមរីឆ្លាម ១គ្រឿង ពណ៌ស្ករ បើកបុកយ៉ាងពេញទំហឹងនៅលើកំណាត់ផ្លូវជាតិលេខ៧ ស្ថិតនៅភូមិទន្លេបិទលើ ឃុំទន្លេបិទ ស្រុកត្បូងឃ្មុំ ដែលហេតុការណ៍នេះ បានកើតឡើងកាលពីវេលាម៉ោង ៦ និង ៣០នាទី ល្ងាចថ្ងៃទី៣០ មករា ២០១៤ បណ្តាលឲ្យម៉ូតូរងការខូចខាតជាដំណំ ចំណែកមនុស្សវិញបានផ្លោងចេញពីម៉ូតូរងរបួសធ្ងន់ ៥នាក់ ក្នុងនោះ បាក់ជើង ២នាក់ និងរបួសស្រាលម្នាក់ ត្រូវបានបញ្ជូនមកសង្រ្គោះជាបន្ទាន់នៅមន្ទីរពេទ្យបង្អែកខេត្ត។
តាមសាច់ញាតិអ្នករងគ្រោះ បានប្រាប់ឲ្យដឹងថា បុរសឈ្មោះ កែវ អ៊ិន ហៅ វ៉ា អាយុ ៣៣ឆ្នាំ រស់នៅភូមិបឹងកុកទី២ សង្កាត់បឹងកុក ក្រុងកំពង់ចាម បានជិះម៉ូតូម៉ាកស៊ីរុស ១គ្រឿង ជិះគ្នា ៤នាក់ (ជាអ្នកឌុប) ប្រពន្ធឈ្មោះ ឈឿន តី អាយុ ៣២ឆ្នាំ កូនប្រុសតូចឈ្មោះ សុធារិទ្ធ អាយុ ៣ឆ្នាំ ព្រមទាំងពូម្នាក់ឈ្មោះ ប្រាក់ ចាន់គ្រឹស្នា អាយុ ៤៣ឆ្នាំ ចេញពីផ្ទះទៅលេងផ្ទះបងប្អូននៅឃុំជប់ ស្រុកត្បូងឃ្មុំ។
លុះពេលនាំគ្នាជិះម៉ូតូត្រលប់មកផ្ទះវិញ ខណៈពេលដែលជិះមកដល់ត្រង់ភូមិទន្លេបិទលើ ក្នុងទិសដៅពីកើតមកលិច ក៏ត្រូវរថយន្ត ១គ្រឿង បើកច្រាសទិសគ្នា មកបុកយ៉ាងពេញទំហឹងតែម្តង បណ្តាលឲ្យអ្នកជិះម៉ូតូទាំង ៤នាក់ រងរបួសធ្ងន់ ៣នាក់ មានពូឈ្មោះ គ្រឹស្នា មានទីលំនៅភូមិព្រែកតាគង់ សង្កាត់តាសេក ខណ្ឌឫស្សីកែវ រាជធានីភ្នំពេញ រងរបួសបាក់ជើងឆ្វេង។ ប្រពន្ធរបស់អ្នកឌុប បាក់ជើងឆ្វេងដូចគ្នា ចំណែកកូនប្រុសតូចរងរបួសស្រាល។
មន្រ្តីនគរបាលចរាចរណ៍ស្រុកត្បូងឃ្មុំ បានប្រាប់ឲ្យដឹងថា រថយន្តបង្កហេតុខាងលើបើកបរដោយឈ្មោះ ទ្រី ពៅ ភេទប្រុស អាយុ ២៤ឆ្នាំ រស់នៅភូមផ្សារថ្មី ឃុំពាមប្រធ្នោះ ស្រុកកោះសូទិន បានផឹកស្រាស្រវឹងមិនត្រឹមតែបុកម៉ូតូនោះទេ គឺថែមទាំងបានបុកម៉ូតូស្មាសរីវូ ១គ្រឿងទៀត ជិះគ្នា ២នាក់ រងរបួសធ្ងន់ ត្រូវបានបញ្ជូនមកសង្រ្គោះនៅគ្លីនិកមួយក្នុងក្រុងកំពង់ចាម។
រថយន្តក្រោយពីបានបុកមនុស្សហើយនោះ បានព្យាយាមបើកទាំងបែកកង់គេចទៅទិសខាងកើត បានចម្ងាយប្រហែល ៣គីឡូម៉ែត្រ ត្រូវបានកម្លាំងរដ្ឋបាលប៉ុស្តិ៍ឃុំទន្លេបិទ ដេញស្ទាក់ចាប់បានទាំងរថយន្ត និងអ្នកបើកបរ បញ្ជូនមកកាន់អធិការដ្ឋានគរបាលស្រុកត្បូងឃ្មុំ ដើម្បីដោះស្រាយតាមច្បាប់៕
ចែករំលែកព័តមាននេះ