រាជធានីភ្នំពេញ ៖ ចោរស្ទាវម្នាក់ត្រូវប្រជាពលរដ្ឋចោមវាយឡើងទ្រោមខ្លួននៅសល់ដង្ហើមចង្រិត ខណៈដែលរូបគេធ្វើសកម្មភាពកាច់សោ.កម៉ូតូ ១គ្រឿង នៅក្នុងផ្ទះគេ ក៏ត្រូវម្ចាស់ទាន់ស្រែកផ្អើលព្រួតវាយតែម្តង ដែលហេតុការណ៍នេះ បានកើតឡើងកាលពីវេលាម៉ោង ៥ និង ៣០នាទី រសៀល ថ្ងៃទី៣០ មករា ២០១៤ នៅចំណុចមុខផ្ទះក្នុងដីឡូត៍ ១កន្លែង ស្ថិតក្នុងភូមិព្រៃមូល សង្កាត់ក្រាំងថ្នង់ ខណ្ឌពោធិ៍សែនជ័យ។
ជនសង្ស័យជាចោរមានឈ្មោះ វណ្ណ វិទ្ធី ភេទប្រុស អាយុ ១៧ឆ្នាំ ស្នាក់នៅភូមិអណ្តូង សង្កាត់ទួលរកា ខណ្ឌពោធិ៍សែនជ័យ។ ចំណែកជនរងគ្រោះមានឈ្មោះ កង រតនា ភេទប្រុស អាយុ ២៣ឆ្នាំ ជាសិស្សវិទ្យាស្ថានជាតិគ្រប់គ្រង ជាម្ចាស់ម៉ូតូម៉ាកស្កុបពី ពណ៌សលាយផ្កាឈូក ពាក់ស្លាកលេខ ភ្នំពេញ 1BZ-3439។
តាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានទុកម៉ូតូនៅមុខផ្ទះ ចំណែកជនសង្ស័យបានដើរចូលទៅក្នុងផ្ទះ ដោយជួបជាមួយម្តាយជនរងគ្រោះ ហើយនិយាយលេងជាមួយគ្នា លុះម្តាយជនរងគ្រោះភ្លេចខ្លួន ស្រាប់តែជនសង្ស័យធ្វើសកម្មភាពកាច់សោ.កម៉ូតូ ភ្លាមនោះ ជនរងគ្រោះចេញមកឃើញទាន់ស្រែកឡើងធ្វើឲ្យមានការភ្ញាក់ផ្អើលដល់អ្នកភូមិតាមចាប់បានប្រមាណជា ២០០ម៉ែត្រ ពីផ្ទះ រួចចោមរោមវាយជនសង្ស័យឡើងទ្រោមខ្លួន។
ក្រោយកើតហេតុ សមត្ថកិច្ចបានចុះមកដល់ ហើយបាននាំជនសង្ស័យទៅប៉ុស្តិ៍នគរបាលរដ្ឋបាលក្រាំងថ្នង់ ដើម្បីសាកសួរ និងកសាងសំណុំរឿងទៅតុលាការ៕
ចែករំលែកព័តមាននេះ