ប្អូនថ្លៃកាប់សម្លាប់បងថ្លៃស្រី សាលក្រមផ្តន្ទាទោសដាក់ពន្ធនាគារ ១៣ឆ្នាំ
រាជធានីភ្នំពេញ ៖ សាលាដំបូងរាជធានីភ្នំពេញ កាលពីថ្ងៃទី៣០ ខែតុលា ឆ្នាំ២០២៥ បានប្រកាសសាលក្រមផ្តន្ទាទោសជនជាប់ចោទឈ្មោះ ជិន ចាន់ចំណាប់ ភេទប្រុស…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីថ្ងៃទី៣០ ខែតុលា ឆ្នាំ២០២៥ បានប្រកាសសាលក្រមផ្តន្ទាទោសជនជាប់ចោទឈ្មោះ ជិន ចាន់ចំណាប់ ភេទប្រុស អាយុ២៩ឆ្នាំ មុខរបរមិនពិតប្រាកដ ដាក់ពន្ធនាគារកំណត់១៣ឆ្នាំ ពីបទ.ឃាតកម្ម ប្អូនថ្លៃកាប់បងថ្លៃស្រី បណ្តាលឲ្យមរណៈភាពជនរងគ្រោះ ប្រព្រឹត្តនៅចំណុចភូមិខ្វា ខណ្ឌដង្កោ រាជធានីភ្នំពេញ កាលពីថ្ងៃទី២៩ ខែមេសា ឆ្នាំ២០២៥ វេលាម៉ោង២០និង៣០នាទី ។
សូមបញ្ជាក់ថា ៖ «ជនដៃដល់សារភាពប្រាប់មូលហេតុ ក្រោយលើកដៃប្រល័.យជីវិតបងថ្លៃស្រី យប់មិញ» ដោយអនុវត្តតាមបញ្ជាផ្ទាល់របស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ត្រី ប៊ុន សត្យា ស្នងការរងទទួលផែនព្រហ្មទណ្ឌរាជធានីភ្នំពេញ និងដឹកនាំកម្លាំងផ្ទាល់ដោយលោកវរសេនីយ៍ឯក ជឹម ស៉ីថា អធិការ នៃអធិការដ្ឋាននគរបាលខណ្ឌដង្កោ បានបំបែកសំណុំរឿងឃាតកម្មមួយ ប្អូនថ្លៃកាប់បងថ្លៃស្រី បណ្តាលឲ្យមរណៈភាពដល់ជនរងគ្រោះនៅកន្លែងកើតហេតុ ហើយជនដៃដល់ជាឃាតករបានរត់គេចខ្លួន ។ ប៉ុន្តែអ្វី ដែលជាភាពជោគជ័យរបស់សមត្ថកិច្ច គឺក្រោយហេតុការណ៍នោះកើតឡើង ត្រឹមតែរយៈពេលស្ទើរមិនបាន១ម៉ោងផង ឈានទៅដល់ការឃាត់ខ្លួនជនសង្ស័យបាន។ ជនរងគ្រោះមានឈ្មោះ វ៉ា ស្រីនិច ភេទស្រី អាយុប្រហែល៣០ឆ្នាំ មុខរបរ ជាកម្មការនីរោងចក្រ ស្នាក់នៅផ្ទះកើតហេតុខាងលើ ។
អង្គហេតុបណ្តាលឲ្យប្អូនថ្លៃឈានដល់ការកាប់សម្លាប់បងថ្លៃស្រីនោះ គឺផ្តើមចេញពីជំលោះក្នុងគ្រួសារ ។ យោងតាមរបាយការណ៍របស់សមត្ថកិច្ចឲ្យដឹងថា ជនសង្ស័យឈ្មោះ ជិន ចាន់ចំណាប់ ភេទប្រុស អាយុ២៩ឆ្នាំ មិនមានមុខរបរពិតប្រាកដ ជាជនប្រើប្រាស់គ្រឿងញៀន និងតែងតែប្រើអំពើហិង្សាក្នុងគ្រួសារ ហើយធ្លាប់ត្រូវបានសមត្ថកិច្ចចាប់បញ្ជូនទៅមណ្ឌលអប់រំកែប្រែទៀតផង ។ ដោយឃើញសកម្មភាពប្អូនថ្លៃយ៉ាងដូច្នោះ បបងថ្លៃស្រី ដែលជាជនរងគ្រោះ តែងតែណែនាំអប់រំប្អូន កុំឲ្យដើរផ្លូវខុស ដែលសង្គមស្អប់ខ្ពើម ហើយមិនតែប៉ុណ្ណោះ សូម្បីម្តាយបង្កើតជនសង្ស័យក៏និយាយគេលែងស្តាប់ដែរ ផ្ទុយទៅវិញ បែរជាជនសង្ស័យមានការខឹងសម្បារ និងចោទប្រកាន់មកលើបងថ្លៃស្រីថា ម្តាយលែងនិយាយរកខ្លួន(ជនសង្ស័យ)ព្រោះតែបងថ្លៃចាក់រុក ម្លោះហើយទើបមានគំនុំជាមួយបងថ្លៃស្រី រហូតកើតជាជម្លោះ កាប់បណ្តាលឲ្យមរណៈភាពជនរងគ្រោះ ៕
ចែករំលែកព័តមាននេះ