ផ្តន្ទាទោសជនប្រមឹកវាយអាចារ្យវត្តស្លាប់ ដាក់ពន្ធនាគារ១៦ឆ្នាំ
រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញ កាលពីថ្ងៃទី៣០ ខែតុលា ឆ្នាំ២០២៥ បានប្រកាសសាលក្រមជាសាធារណៈ ដោយផ្តន្ទាទោសជនជាប់ចោទម្នាក់ឈ្មោះ កន វ៉េត…
រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញ កាលពីថ្ងៃទី៣០ ខែតុលា ឆ្នាំ២០២៥ បានប្រកាសសាលក្រមជាសាធារណៈ ដោយផ្តន្ទាទោសជនជាប់ចោទម្នាក់ឈ្មោះ កន វ៉េត ភេទប្រុស អាយុ៣២ឆ្នាំ មុខរបរ មិនពិតប្រាកដ ស្នាក់នៅក្នុងវត្ត ដាក់ពន្ធនាគារកំណត់១៦ឆ្នាំ ពីបទ.ឃាតកម្ម មានស្ថានទម្ងន់ទោសទាក់ទងមរណភាពជនរងគ្រោះ ប្រព្រឹត្តកាលពីថ្ងៃ៨ ខែមិថុនា ឆ្នាំ២០២៤ ។ សាលក្រមទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយ មិនសុខចិត្តចំពោះការកាត់ក្តីនេះ ។
សូមរម្លឹកថា កាលពីយប់ថ្ងៃទី០៧ ខែមិថុនា ឆ្នាំ២០២៤ ជនជាប់ចោទឈ្មោះ កន វ៉េត ជាមនុស្សញៀនសុរា ផឹកស្រាថ្នាំ អស់ចំនួន ៣លីត្រ ក៏ស្រវឹង រួច ចូលដេកក្នុងកុដិព្រះសង្ឃ វត្តមុនីសាគរ ភូមិយកបាត្រ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។ ក្នុងស្ថានភាពស្រវឹងម្តងៗជនជាប់ចោទតែងតែនិយាយច្រើន និងស្រែកឡូឡា ផ្អើលព្រះសង្ឃ និងអាចារ្យវត្ត ក៏បានធ្វើឲ្យជនរងគ្រោះឈ្មោះ សួន រឿន ភេទប្រុស អាយុ៦៩ ឆ្នាំ ដែលជាអាចារ្យវត្ត ណែនាំ និងស្តីបន្ទោសជាញឹកញាប់ ដើម្បីរក្សាសណ្តាប់ក្នុងវត្តអារាម ដែលធ្វើឲ្យប៉ះពាល់ដល់ការរៀនសូត្ររបស់ព្រះសង្ឃ ។ ផ្ទុយទៅវិញ ជនជាប់ចោទ មិនដែលយកចិត្តទុកដាក់ និងស្តាប់តាមដំបូលមានរបស់លោកអាចារ្យទេ ហើយតែងតែបង្កជម្លោះ រហូតមានការលបលួចច្របាច់កជនរងគ្រោះទៀតផង ។ លុះដល់ថ្ងៃទី០៨ ខែមិថុនា ឆ្នាំ២០២៤ ម៉ោង១៣និង៣០នាទី ជនរងគ្រោះកំពុងដេកនៅលើតុ ក្នុងសាលាបាលី ស្រាប់តែជនជាប់ចោទ បានយកដែកបំពង់ទីបមូល វាយទៅលើជនរងគ្រោះចំចុងភ្នែកស្ដាំ និងចង្កា បណ្តាលឲ្យសន្លប់បាត់បង់ស្មារតី ខណៈពេលនោះ ត្រូវបានកម្លាំងសមត្ថកិច្ចចុះទៅជួយរអន្តរាគមន៍ និងឃាត់ខ្លួនជនសង្ស័យ រួមនឹងវត្ថុតាង ដែកបំពង់ទីបមូល ១ ប្រវែងប្រហែល១ម៉ែត្រ នាំទៅទីស្នាក់ការប៉ុស្ដិ៍រដ្ឋបាលនគរបាក្បាលកោះ ដើម្បីធ្វើការសាកសួរ ។ ចំណែកជនរងគ្រោះ ត្រូវបានប្រជាពលរដ្ឋ នាំយកទៅសង្គ្រោះនៅមន្ទីរឯកជនប៉ុន្តែពេលទៅដល់មន្ទីរពេទ្យ ជនរងគ្រោះក៏បានស្លាប់បាត់បង់ជីវិតទៅហើយ ។
ដោយយោងទៅលើបទល្មើសជាក់ស្តែង និងពាក្យបណ្តឹងរបស់ភាគីជនរងគ្រោះ សមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងរាជធានីភ្នំពេញ តាមនីតិវិធីច្បាប់ ៕
ចែករំលែកព័តមាននេះ