រាជធានីភ្នំពេញ ៖ ការប្រកួតបាល់ទាត់ពានរង្វាន់ Hun Sen-Cup កាលពីថ្ងៃទី២៩ មករា ឆ្នាំ២០១៤ ដែលធ្វើឡើងលើ២ទីលានស្មើនឹង៤ប្រកួតនោះ ក្រុមបាល់ទាត់ដែលចូលរួមលេងបាននិងកំពុងប្រឹងប្រែងយា៉ងខ្លាំងដើម្បីដណ្តើមពិន្ទុឆ្ពោះទៅកាន់វគ្គបន្តទៀត ។
រាជធានីភ្នំពេញ ៖ ការប្រកួតបាល់ទាត់ពានរង្វាន់ Hun Sen-Cup កាលពីថ្ងៃទី២៩ មករា ឆ្នាំ២០១៤ ដែលធ្វើឡើងលើ២ទីលានស្មើនឹង៤ប្រកួតនោះ ក្រុមបាល់ទាត់ដែលចូលរួមលេងបាននិងកំពុងប្រឹងប្រែងយា៉ងខ្លាំងដើម្បីដណ្តើមពិន្ទុឆ្ពោះទៅកាន់វគ្គបន្តទៀត ។
នៅពហុកីឡដ្ឋានជាតិអូឡាំពិក ក្រុមភ្នំពេញក្រោន និងក្រុម Tri Asia (ខេត្តកណ្តាល) ទទួលបានលទ្ធផលស្មើគ្នា១ទល់១ ។ ក្នុងតង់ទី១ ក្រុម Tri Asia រកបានគ្រាប់បាល់នាំមុខមុនមួយគ្រាប់ នៅនាទីទី១៧ ដោយកីឡាករពាក់អាវលេខ២៨ សុក ច័ន្ទរស្មី លុះជិតចប់តង់ទី១ទៅហើយគឺនៅនាទីទី៤១ ក្រុមភ្នំពេញក្រោនរកបានគ្រាប់បាល់១គ្រាប់សងវិញ ដោយកីឡាករពាក់អាវលេខ៧ ឃីម បូរី ។ ចូលដល់តង់ទី២ ក្រុមទាំងពីរបានលេងវាយសម្រុកគ្នាទៅវិញទៅមក ប៉ុន្តែនៅតែគ្មានក្រុមណាមួយអាចរកគ្រាប់បាល់បានទៀតទេ រហូតដល់ចប់ការប្រកួត៩០នាទីតែម្តង ។ មួយប្រកួតទៀតក្រុមអគ្គស្នងការដ្ឋាននគរបាលជាតិ បានលត់ក្រុមខេត្តកំពង់ឆ្នាំងយា៉ងចាស់ដៃដោយយកឈ្នះក្នុងលទ្ធផល៩ទល់០ ។ នៅតង់ទី១ក្រុមអគ្គស្នងការដ្ឋាននគរបាលជាតិអាចរកគ្រាប់បាល់នាំមុខរហូតដល់៥ទល់០ និងតង់ទី២ រកបាន៤គ្រាប់ទៀត ធ្វើឱ្យចប់ការប្រកួត ក្រុមអគ្គស្នងការដ្ឋាននគរបាលជាតិឈ្នះក្រុមខេត្តកំពង់ឆ្នាំង៩ទល់០ ។
សម្រាប់ការប្រកួតនៅស្តាតចាស់វិញ ក្រុមខេត្តស្វាយរៀង ជើងឯក League ឆ្នាំ២០១៣ ឈ្នះក្រុមខណ្ឌចំការមនក្នុងលទ្ធផល២ទល់១ ។ មួយប្រកួតទៀតក្រុមគិរីវង់សុខសែនជ័យ លេងឈ្នះក្រុមសាកលវិទ្យាល័យអាសីុអឺរ៉ុប៣ទល់១។ ការប្រកួតនឹងបន្តធ្វើនៅថ្ងៃទី៥ កុម្ភៈ នៅលើទីលានទាំងពីរដដែលដោយនៅលើទីលានស្តាតចាស់ ចាប់ផ្តើមនៅវេលាម៉ោង១និង៣០នាទី រសៀលរវាងក្រុមខេត្តក្រចេះ និងក្រុមណាហ្គាខប និងមួយប្រកួតទៀតរវាងក្រុមកងរាជអាវុធហត្ថខេត្តព្រះសីហនុ និងក្រុមចម្ការកៅស៊ូបឹងកេត ។ ដោយឡែកនៅលើទីលានពហុកីឡដ្ឋានជាតិអូឡាំពិកវិញ ចាប់ផ្តើមនៅវេលាម៉ោង៣និង៤៥នាទីរសៀល រវាងក្រុមខណ្ឌចំការមន ជួបប្រកួតជាមួយក្រុមគិរីវង់សុខសែនជ័យ និងមួយប្រកួតទៀតក្រុមសាកលវិទ្យាល័យអាសីុអឺរ៉ុប ជួបប្រកួតជាមួយក្រុមខេត្តស្វាយរៀង ៕
ចែករំលែកព័តមាននេះ