ខេត្តសៀមរាប ៖ ដងស្ទឹងសៀមរាបដុះស្លែ និងចកនៅលើផ្ទៃទឹកយ៉ាងខៀវស្រងាត់ តាំងពីស្ពានថ្ម មុខព្រះរាជដំណាក់ ព្រះអង្គចេក ព្រះអង្គចម លោកយាយ ទេព…
ខេត្តសៀមរាប ៖ ដងស្ទឹងសៀមរាបដុះស្លែ និងចកនៅលើផ្ទៃទឹកយ៉ាងខៀវស្រងាត់ តាំងពីស្ពានថ្ម មុខព្រះរាជដំណាក់ ព្រះអង្គចេក ព្រះអង្គចម លោកយាយ ទេព រហូតដល់មុខផ្សារចាស់ត្រូវបានភ្ញៀវជាតិ និងអន្តរជាតិដែលចូលមកទស្សនានៅតាមប្រាង្គប្រាសាទអង្គរវត្តក៏ដូចជាដើរទស្សនានៅតាមផ្សាររាត្រីបានរិះគន់ចំៗ ថាតាំងពីអភិបាលខេត្តចាស់២ជំនាន់មករហូត ដល់អភិបាលខេត្តថ្មីនៅតែស្ទឹងសៀមរាបមិនឃើញបានស្អាតដដែល ពួកគាត់ដាក់ជាសំណួរសួរថា តើស្ទឹងមួយនេះខាងណាជាអ្នកសម្អាត?7 ។
អ៊ុំ ប្រុសម្នាក់ឈ្មោះ អ៊ុំ ហ៊ាង មកពីខេត្តបាត់ដំបងបានប្រាប់ភ្នាក់ងារកោះសន្តិភាពនៅមុខព្រះអង្គចេក ព្រះអង្គចម នារសៀលថ្ងៃទី២៣ ខែកក្កដានេះ ដែលគាត់បានមកអុជធូប បូងសួង ដើម្បីសុំសេចក្តីសុខសប្បាយជូនដល់កូនចៅរបស់គាត់ដែលបានមកលេងនៅលើទឹកដីខេត្តសៀមរាប ។ អ៊ុំប្រុសបានបញ្ជាក់ផងថា កាលពីអំឡុងឆ្នាំ២០០៥ គាត់បានមកលេងកូនប្រុសគាត់លក់ដូរនៅខេត្តសៀមរាបនាំគ្នាដើរលេងតាមមាត់ស្ទឹងឃើញមានសំរាមដែរ ប៉ុន្តែពុំឃើញមានស្លែ និងសម្រាម ឬចកពេញលើផ្ទៃទឹកស្ទឹងសៀមរាបនេះឡើយ មានដែរតែតិចតួច ណាស់ តាំងពីជំនាន់លោក សូរ ភិរិន្ទ អភិបាលខេត្តចាស់ដែលបានដេញប្រជាពលរដ្ឋនៅតាមដងស្ទឹងសៀមរាបនេះចេញ ។
មកដល់អភិបាលខេត្តថ្មី លោក ឃឹម ប៊ុនសុង នៅតាមដងស្ទឹងសៀមរាបមិនសូវឃើញចក ប៉ុន្មានទេ មានតែស្លែច្រើន ។ រហូតមកដល់លោកទៀ សីហា អភិបាលខេត្តថ្មី តើស្ទឹងសៀមរាបអាចស្អាតដូច កាលពីជំនានមុនបានដែរ ឬទេ? ។បើមិនបានដូចក៏អាចប្រហាក់ប្រហែលបានទេ ? ។
ចំណែកពលរដ្ឋម្នាក់រស់នៅក្នុងក្រុងសៀមរាប សូមមិនបញ្ចេញឈ្មោះបានលួចប្រាប់ភ្នាក់ងារកោះសន្តិភាព នៅព្រឹកថ្ងៃទី២៣ ខែកក្កដានេះថា តាំងពីគាត់មករស់នៅលើទឹកដីខេត្តសៀមរាបអស់រយៈពេលជាង១០ឆ្នាំនេះមិនដែលឃើញទឹកស្ទឹងសៀមរាបស្អាតសោះឡើយ បានត្រឹមតែនាំគ្នាមកសម្អាតមួយភ្លែតៗប៉ុណ្ណោះ ។ ប្រភពបានបញ្ជាក់ថា ពួកគាត់ដើរហាត់ប្រាណនៅតាមដងស្ទឹងសៀមរាប រាល់ថ្ងៃមិនថាមានចក ឬស្លែនោះទេ ថែមទាំងស្អុយទឹកមកម្តងៗ ខណៈពេលមានខ្យល់បក់បោកចេញមកពីលើផ្ទៃទឹកស្ទឹងសៀមរាបមួយនេះព្រោះទឹកស្ទឹងសៀមរាបនេះត្រូវបានគេបង្ហូរចេញមកតាមលូរពីសណ្ឋាគារ ផ្ទះសំណាក់ ឬភោជនីយដ្ឋានព្រមទាំងផ្ទះប្រជាពលរដ្ឋដែលរស់នៅតាមស្ទឹងនេះផង ។
ប្រភពបានបញ្ជាក់ថា ចំពោះភ្ញៀវជាតិ និងអន្តរជាតិដែលចូលមកទស្សនានៅក្នុងទីក្រុងប្រវត្តិសាស្ត្រនៃទឹកដីអង្គរខេត្តសៀមរាបរបស់យើង ពួកគេបាននាំគ្នានិយាយមើលងាយថា អាជ្ញាធរ ក្រុង-ខេត្តសៀមរាបមិនមានវិធានការចាត់ការនៅឡើយ ។ ជាពិសេសប្រជាពលរដ្ឋនៅក្នុងក្រុងសៀមរាបតែម្តងដែលតែងនាំគ្នាដើរហាត់ប្រាណ ហើយនិយាយថា ឃើញស្ទឹងសៀមរាប ឥឡូវគួរឱ្យខ្ពើម ។
តាមប្រភពពីភ្ញៀវជាតិម្នាក់ គឺលោក សុជាតិ មកពីខេត្តកំពង់ចាម ដែលបាននាំប្រពន្ធកូនចូលមកដើរលេងតាមប្រាសាទអង្គរវត្តបាននិយាយរិះគន់ទៅលើអភិបាលខេត្តថ្មី ក៏ដូចអភិបាលខេត្តចាស់២ជំនាន់មកហើយដែរ គ្មាននាំគ្នាជួយមើលស្ទឹងសៀមរាបទេ បានជាទឹកស្ទឹងប្រវត្តិសាស្ត្រមួយនេះគ្មានអ្នកសម្អាត ។ លោកបានបញ្ជាក់ថា ដងស្ទឹងសៀមរាបមួយនេះ កាលពីពួកគាត់មកតាំងពីមុន ខៀវស្រងាត់ គួរឱ្យចង់ផឹក តែបច្ចុប្បន្នខ្ពើមគួរឱ្យឆ្អើម ចាញ់ស្ទឹងកំពង់ធំ និងស្ទឹងសង្កែផងខុសគ្នាស្រឡះគេមានសួនច្បារ តាំងពីមុខសាលាខេត្តរហូតដល់ផុតកន្ទុយភ្នែក ប៉ុន្តែសូមបងប្អូនដែលនាំក្រុមគ្រួសារមកលេងសៀមរាប តើគិតដូចខ្ញុំដែរឬទេថា ស្ទឹងសៀមរាប បើនាំគ្នាស្តាឱ្យជ្រៅ ហើយបង្ហូរទឹកដាក់វិញ ព្រមទាំងដាក់កម្មករឱ្យជួយសំអាត តាមដងស្ទឹងជារៀងរាល់ថ្ងៃ ឬកន្លះខែចុះសម្អាតក្នុងស្ទឹងម្តង ដើម្បីយកស្លែ ឬចក និងសំរាម ដែលមនុស្សបោះចោលទៅក្នុងទឹកម្តងក៏វាឃើញស្អាតដែរ មិនបាច់ចាំសម្អាតរាល់ថ្ងៃក៏បាន ។
ចំណែកអ្នកស្រី សុភ័ណ្ឌ រស់នៅក្នុងក្រុងសៀមរាបបានរៀបរាប់ប្រាប់ថា នាងខ្ញុំដើរហាត់ប្រាណនៅជុំគ្នាជាមួយមិត្តភក្តិតែងតែលឺភ្ញៀវដើរលេងតាមដងស្ទឹងសៀមរាប តាំងពីមុខព្រះរាជដំណាក់ ព្រះអង្គចេក ព្រះអង្គចម រហូតដល់ផ្សារចាស់ និងនៅតាមដងស្ទឹងផ្លូវទៅភ្នំក្រោម គ្មានឃើញនរណាចុះស្តា ឬកាយចក និងសំរាមនៅក្នុងស្ទឹងនោះឡើយ ហើយពួកគាត់នាំគ្នានិយាយរអ៊ូរដាក់គ្នាថា ហេតុអ្វីស្ទឹងសៀមរាបឃើញសុទ្ធតែស្លែ ចក និងសំរាម គ្មានឃើញអនាម័យអញ្ជឹង តាំងពីអភិបាលខេត្តចាស់រហូតដល់អភិបាលខេត្តថ្មី បើជួបអ្នកហាត់ប្រាណខាងមន្ត្រីសាលាក្រុងគេនិយាយថា ដូចខាងមន្ត្រីសាលាខេត្តដែរ ហើយគេនាំគ្នាសួរថា ខាងសាលាក្រុងបាននិយាយថា ស្ទឹងសៀមរាបពួកគាត់មិនដឹងទេ ព្រោះពួកគាត់ជាមន្ត្រីតូចតាច ។ អ្នកស្រីបន្តថា កាលពីមុនស្ទឹងសៀមរាបមិនទាន់ដល់ថ្នាក់នឹងទេ តាំងពីដេញពួកយួនចេញពីមាត់ស្ទឹងនោះ ។
លោកតូ ម៉ាស់ ជនជាតិហ្វីលីនម្នាក់ដែលមានអ្នកបកប្រែជាភាសារអង់គ្លេសបានរៀបរាប់ប្រាប់នៅរសៀលថ្ងៃទី២២ ខែកក្កដាថា បើយើងនាំគ្នាសម្អាតតែម្នាក់មួយដៃក៏វាឃើញស្អាតដែរកុំថា ចាំបទបញ្ជាថ្នាក់លើទើបថ្នាក់ក្រោមចាត់ចែងនោះ ។ លោកបានបញ្ជាក់ទៀតថា បើធ្វើប្រចាំគ្នាយ៉ាងនេះមុខជាខ្មាស់ភ្ញៀវបរទេស ជាពិសេសខ្មែរគ្នាឯងគេរិះគន់មិនដាច់ពីមាត់ទេថា មកពីថ្នាក់លើមិនមើលទើបបានជាស្ទឹងសៀមរាបវាទៅបែបនេះ ។
ករណីខាងលើនេះដែរមន្ត្រីសាលាក្រុងម្នាក់សុំមិនបញ្ជេញឈ្មោះ បានប្រាប់ភ្នាក់ងារកោះសន្តិភាពនៅរសៀលថ្ងៃទី២៣ ខែកក្កដានេះថា ខាងសាលាក្រុងកាលពីប៉ុន្មានខែមុនបានប្រជុំគ្នានិយាយពីស្ទឹងសៀមរាបដែរ រឿងស្តាស្ទឹងនោះ ប៉ុន្តែបែរជាគ្មានឃើញលទ្ធផលផ្លែផ្កាដូចក្នុងកិច្ចប្រជុំពីសោះ ។ ជុំវិញករណីខាងលើនោះភ្នាក់ងារកោះសន្តិភាពមិនអាចសុំការទាក់ទងពីលោកប្រធានមន្ទីរបរិស្ថានខេត្តបានទេ នៅរសៀលថ្ងៃទី២៣ ខែកក្កដានេះ ដោយសារទូរស័ព្ទរបស់លោកនៅក្រៅតំបន់សេវា ។ ចំណែកលោក លី សំរិទ្ធ អភិបាលរងខេត្ត និងជាអ្នកនាំពាក្យរដ្ឋបាលសាលាខេត្តភ្នាក់ងារកោះសន្តិភាពមិនអាចសុំការទាក់ទងបានទេនៅរសៀលថ្ងៃទី២៣ ខែកក្កដានេះ ដោយសារទូរស័ព្ទរបស់លោកនៅក្រៅតំបន់សេវាដែរ ។
មជ្ឈដ្ឋាននានាទូទាំងខេត្តសៀមរាប សូមសំណូមពរឱ្យលោក ទៀ សីហា អភិបាលខេត្តដែលទើបឡើងថ្មីបានជិត១ឆ្នាំនេះ មេត្តាជួយពិនិត្យមើលស្ទឹងសៀមរាបផងកុំឱ្យភ្ញៀវបរទេសរិះគន់ ជាពិសេសភ្ញៀវជាតិ ដែលមកពីឆ្ងាយក៏ដូចជាពលរដ្ឋរស់នៅក្នុងខេត្តសៀមរាបផងដែរ ព្រោះខេត្តសៀមរាប ជាខេត្តប្រវត្តិសាស្ត្រ តាំងពីដូនតាខ្មែរជំនាន់មុនដែលគេមកទស្សនាប្រាង្គប្រាសាទអង្គរជាច្រើនពូជសាសន៍ផងដែរ បើពួកគេដើរលេងតាមដងស្ទឹងសៀមរាបប្រយ័ត្នគេថតបង្ហោះនាំខ្មាស់គេ ព្រោះនៅមុខព្រះរាជដំណាក់ផង ៕ កែសម្រួលដោយ ៖ សុឃាក់
ចែករំលែកព័តមាននេះ