ខេត្តបាត់ដំបង ៖ ខណ:ម៉ោងនេះ ផ្សែងនៅបន្តហុយចេញពីគំនរបាក់បែកផ្សារទំនើប«ហេងឆាយលី» ហើយរថយន្តពន្លត់អគ្គិភ័យរបស់សមត្ថកិច្ចនៅតែបន្តបាញ់ទឹកពន្លត់នៅឡើយ ស្រាប់តែមានការភ្ញាក់ផ្អើលមួយឈុលជាថ្មីទៀត នៅម៉ោង១០និង១៧នាទីព្រឹកថ្ងៃទី២៥ តុលា ដោយសារមានឧប្បត្តិហេតុទុស្សេខ្សែចរន្តអគ្គិសនី បង្កជាផ្សែងហុយទ្រលោមចេញពីអគារផ្សារ១៣មករា…
ខេត្តបាត់ដំបង ៖ ខណ:ម៉ោងនេះ ផ្សែងនៅបន្តហុយចេញពីគំនរបាក់បែកផ្សារទំនើប«ហេងឆាយលី» ហើយរថយន្តពន្លត់អគ្គិភ័យរបស់សមត្ថកិច្ចនៅតែបន្តបាញ់ទឹកពន្លត់នៅឡើយ ស្រាប់តែមានការភ្ញាក់ផ្អើលមួយឈុលជាថ្មីទៀត នៅម៉ោង១០និង១៧នាទីព្រឹកថ្ងៃទី២៥ តុលា ដោយសារមានឧប្បត្តិហេតុទុស្សេខ្សែចរន្តអគ្គិសនី បង្កជាផ្សែងហុយទ្រលោមចេញពីអគារផ្សារ១៣មករា (ផ្សារថ្មី) ស្ថិតក្នុងសង្កាត់ព្រែកព្រះស្ដេច ក្រុងបាត់ដំបង ។ អគ្គិភ័យដែលមានតែផ្សែងនេះ បានធ្វើឲ្យសមត្ថកិច្ច ប្រជាពលរដ្ឋ ជាពិសេស ក្រុមរថយន្តពន្លត់អគ្គិភ័យចេញអន្តរាគមន៍ប្រសេចប្រសាច ។
អ្នកឃើញហេតុការណ៍បានឲ្យដឹងថា ផ្សែងបានហុយយ៉ាងខ្លាំងចេញពីផ្នែកខាងលើ នៃអគារផ្សារ ជាមួយនឹងអណ្ដាតភ្លើងផងដែលគេអះអាងថា ជាការទុស្សេខ្សែចរន្តអគ្គិសនី ។ រថយន្តពន្លត់អគ្គិភ័យរបស់សមត្ថកិច្ចបានចេញអន្តរាគមន៍ភ្លាមៗ ប៉ុន្តែអគ្គិភ័យដែលកើតឡើងត្រឹមមួយដង្ហើមចង្រិតនោះ ត្រូវបានកម្លាំងសន្តិសុខផ្សារប្រើប្រាស់បំពង់ឧស្ម័នឡើងបាញ់ពន្លត់ និងទប់ស្កាត់បានទាន់ពេលវេលា ។ បើមិនដូច្នេះទេ ផ្សារ១៣មករា ឬ ផ្សារថ្មីនេះ អាចនឹងមានវាសនាមិនខុសពីផ្សារទំនើប«ហេងឆាយលី»ឡើយ ។
សូមបញ្ជាក់ថា ផ្សារទំនើប«ហេងឆាយលី» ដែលមានកំពស់០៤ជាន់ ស្ថិតចំកណ្ដាលក្រុងបាត់ដំបង ត្រូវអគ្គិភ័យលេបត្របាក់យកអស់ទាំងស្រុង ដោយទាំងផ្ទះអ្នកនៅក្បែរខាងអស់ចំនួន០៥ល្វែងផ្ទះទៀត ។
ចាប់តាំងពីយប់កើតហេតុ ថ្ងៃទី២៣ តុលា រហូតមកដល់ត្រឹមម៉ោង១២ថ្ងៃត្រង់ថ្ងៃទី២៥ តុលា នេះ ផ្សែងនៅតែហុយចេញពីគំនរបាក់បែកនៃអគារផ្សារ និងផ្ទះល្វែងនៅជាប់ៗគ្នានោះ ហើយរថយន្តពន្លត់អគ្គិភ័យរបស់សមត្ថកិច្ចក៏កំពុងបន្តជួយបាញ់ទឹកពន្លត់នៅឡើយដែរ ៕
ចែករំលែកព័តមាននេះ