រាជធានីភ្នំពេញ ៖ ថ្មីៗនេះ មានគណនីហ្វេកប៊ុកឈ្មោះ Kim Lay បានចុះផ្សាយដែលមានខ្លឹមសារថា «តើសាលាក្រុងជាអ្នកចាត់ចែងឲ្យមន្ត្រីដើរលក់បំពង់អគ្គិភ័យហើយគាត់ថាបើផ្ទះណាគ្មានបំពង់អគ្គិភ័យ ត្រូវតាមស្តង់ដារទេ គឺត្រូវរងការផាកពិន័យហើយមន្ត្រីចុះមកដូរមុខផ្សេងគ្នារហូត»…
រាជធានីភ្នំពេញ ៖ ថ្មីៗនេះ មានគណនីហ្វេកប៊ុកឈ្មោះ Kim Lay បានចុះផ្សាយដែលមានខ្លឹមសារថា «តើសាលាក្រុងជាអ្នកចាត់ចែងឲ្យមន្ត្រីដើរលក់បំពង់អគ្គិភ័យហើយគាត់ថាបើផ្ទះណាគ្មានបំពង់អគ្គិភ័យ ត្រូវតាមស្តង់ដារទេ គឺត្រូវរងការផាកពិន័យហើយមន្ត្រីចុះមកដូរមុខផ្សេងគ្នារហូត» និងបានភ្ជាប់ជាមួយរូបភាពវីដេអូយកពីកាមេរ៉ាសុវត្ថិភាព មកបង្ហោះ ខណៈដែលមានមន្ត្រីចុះគោះទ្វាររបងផ្ទះស្ត្រីម្ចាស់គណនីឈ្មោះ Kim lay ។
បើតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្រោយមានផ្សព្វផ្សាយដូចខ្លឹមសារខាងលើនោះហើយ នាព្រឹកថ្ងៃទី២៧ ខែមីនា ឆ្នាំ២០២៦ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យលោកនាយការិយាល័យបង្ការ ពន្លត់អគ្គិភ័យ និងសង្គ្រោះ ធ្វើការស្រាវជ្រាវចំពោះការផ្សព្វផ្សាយករណីខាងលើនេះ ។
នៅថ្ងៃទី២៦ ខែមីនា ឆ្នាំ២០២៦ វេលាម៉ោង ១០:០០ នាទីព្រឹក មានកម្លាំងជំនាញចំនួន ០៤នាក់បាន ចុះផ្សព្វផ្សាយអប់រំណែនាំដល់ប្រជាពលរដ្ឋក្នុងទីតាំងបុរី សំបួរមាស ស្ថិតនៅសង្កាត់ដង្កោ ខណ្ឌដង្កោ រាជធានីភ្នំពេញ ដើម្បីឲ្យប្រជាពលរដ្ឋប្រុងប្រយ័ត្ន និងចូលរួមបង្ការទប់ស្កាត់បញ្ហាអគ្គិភ័យ នារដូវបុណ្យចូលឆ្នាំថ្មីប្រពៃណីខ្មែរ ដែលជាការចុះអនុវត្តតាមគោលការណ៍របស់ស្នងការដ្ឋាននគរបាលរាជធានីភ្នំពេញ។ ខណៈដែលមន្ត្រីបានឈប់ឈរខាងមុខផ្ទះ របស់ស្ត្រីគណនីហ្វេសប៊ុកឈ្មោះ Kim Lay ហើយបានគោះទ្វារបងផ្ទះដើម្បីហៅម្ចាស់ផ្ទះធ្វើការណែនាំអំពីវិធីប្រើប្រាស់បំពង់ពន្លត់អគ្គិភ័យ និងការរត់ជម្លៀសខ្លួនពេលមានអាសន្នកើតឡើង ប៉ុន្តែមិនបានជួបម្ចាស់ផ្ទះនោះទេ ដោយគ្មានអ្នកនៅផ្ទះ។ បន្ទាប់មកមន្ត្រីក៏បន្តទៅផ្សព្វផ្សាយអប់រំម្ចាស់ផ្ទះផ្សេងទៀត។លុះក្រោយមកស្រាប់តែម្ចាស់ផ្ទះខាងលើបែរជាយករូបភាពមន្ត្រីចុះបំពេញការងារ យកបង្ហោះផ្សព្វផ្សាយលើបណ្តាញសង្គម ដោយបានសរសេរខ្លឹមសារដូចរៀបរាប់ខាងលើ ចោទប្រកាន់មកលើសមត្ថកិច្ចជំនាញ គ្មានមូលដ្ឋាននិងគ្មានមូលហេតុច្បាស់លាស់ ដែលនាំឲ្យសាធារណជន អ្នកលេងបណ្តាញសង្គមយល់ច្រឡំ បញ្ចេញមតិរិះគន់ មកលើសមត្ថកិច្ចជំនាញអគ្គិភ័យ ចំពោះការផ្សព្វផ្សាយព័ត៌មានមិនត្រឹមត្រូវ គ្មានវិជ្ជាជីវៈ និងគ្មានការទទួលខុសត្រូវរបស់ម្ចាស់គណនីហ្វេសប៊ុកឈ្មោះ Kim lay ដែលង្កឲ្យប៉ះពាល់កិត្តិយសសេចក្តីថ្លៃថ្នូរ របស់សមត្ថកិច្ចជំនាញចុះបំពេញភារកិច្ច។
នៅថ្ងៃដដែលនេះ សមត្ថកិច្ចជំនាញក៏បានទំនាក់ទំនងដើម្បីសុំការបំភ្លឺ ពីម្ចាស់គណនីឈ្មោះ Kim Lay ប៉ុន្តែម្ចាស់ទូរស័ព្ទមិនលើកទទួល ។ បន្ទាប់មកមន្ត្រីក៏បានសួរនាំតាមប្រព័ន្ធតេឡេក្រាមទូរស័ព្ទរបស់ស្ត្រីម្ចាស់គណនីឈ្មោះ Kim Lay ហើយគាត់ក៏បានឆ្លើយតបប្រាប់ថាខ្លួនគាត់ពិតជាមិនបានជួបសួរនាំជាមួយនឹងសមត្ថកិច្ចជំនាញអគ្គិភ័យដែលបានចុះមកនោះទេ ហើយក៏មិនបានប៉ះពាល់ផលប្រយោជន៍គាត់អ្វីដែរ វីដេអូដែលគាត់បង្ហោះនោះ គ្រាន់តែជាវីដេអូចម្ងល់ចង់សួរទៅមហាជនតែប៉ុណ្ណោះ ។
សូមបញ្ជាក់ថា អនុវត្តតាមគោលការណ៍របស់ស្នងការដ្ឋាននគរបាលរាជធានីភ្នំពេញ បានចាត់ឲ្យមន្ត្រីជំនាញបង្ការពន្លត់អគ្គិភ័យចុះផ្សព្វផ្សាយអប់រំនិងបង្រៀនប្រជាពលរដ្ឋឲ្យចេះប្រើប្រាស់របៀបសង្គ្រោះបឋមបំពង់ពន្លត់អគ្គិភ័យនៅតាមបណ្តាសហគ្រាស ក្រុមហ៊ុន រោងចក្រ ខុនដូ និងតាមលំនៅឋាន។ ការចុះផ្សព្វផ្សាយនោះក៏មិនបង្ខំតម្រូវឲ្យប្រជាពលរដ្ឋទិញបំពង់ពន្លត់អគ្គិភ័យនោះដែរ ប៉ុន្តែបើប្រជាពលរដ្ឋស្ម័គ្រចិត្តទិញ សមត្ថកិច្ចនឹងលក់ជូនតាមតម្លៃទីផ្សារ ។
សមត្ថកិច្ចជំនាញក៏សូមធ្វើការបដិសេធចំពោះការផ្សព្វផ្សាយថាបើផ្ទះណាគ្មានបំពង់អគ្គិភ័យត្រូវតាមស្តង់ដារទេនោះគឺត្រូវរងការផាកពិន័យ បញ្ហានេះ ការិយាល័យជំនាញបង្ការពន្លត់អគ្គិភ័យ គ្មានគោលការណ៍ផាកពិន័យនោះទេ ប៉ុន្តែបើមន្ត្រីណាចុះទៅអនុវត្តគ្មានក្រមសីលធម៌វិជ្ជាជីវៈ អនុវត្តលើសបទបញ្ជានិងគោលការណ៍របស់ការិយាល័យជំនាញ បើក្នុងករណីរកឃើញមន្ត្រីណាប្រព្រឹត្តកំហុសឆ្គង មន្ត្រីនោះនឹងប្រឈមអនុវត្តវិន័យរបស់កងកម្លាំងនគរបាលជាតិ ៕
ចែករំលែកព័តមាននេះ