ទីក្រុងមូស្គូ ៖ ប្រាក់ចំណូលបានមកពីការលក់ប្រេង និងឧស្ម័នរបស់ប្រទេសរុស្ស៊ី កំពុងកើនឡើងយ៉ាងសម្បើម ត្រូវបានអ្នកជំនាញប៉ាន់ប្រមាណថាយ៉ាងហោចណាស់ ៧៦០ លានដុល្លារក្នុង១ថ្ងៃ ខណៈសង្គ្រាមនៅអ៊ីរ៉ង់បានធ្វើឱ្យទីផ្សារសកលរង្គោះរង្គើខ្លាំង។ នេះបើតាមប្រភពពីកាសែត…
ទីក្រុងមូស្គូ ៖ ប្រាក់ចំណូលបានមកពីការលក់ប្រេង និងឧស្ម័នរបស់ប្រទេសរុស្ស៊ី កំពុងកើនឡើងយ៉ាងសម្បើម ត្រូវបានអ្នកជំនាញប៉ាន់ប្រមាណថាយ៉ាងហោចណាស់ ៧៦០ លានដុល្លារក្នុង១ថ្ងៃ ខណៈសង្គ្រាមនៅអ៊ីរ៉ង់បានធ្វើឱ្យទីផ្សារសកលរង្គោះរង្គើខ្លាំង។ នេះបើតាមប្រភពពីកាសែត The Telegraph របស់ចក្រភពអង់គ្លេស និង The Times of India ចេញផ្សាយកាលពីថ្ងៃទី២៦ ខែមីនា ឆ្នាំ២០២៦។
យោងតាមវិទ្យាស្ថានសេដ្ឋកិច្ចទីក្រុងគៀវ (KSE) ប្រាក់ចំណូលប្រចាំខែរបស់រុស្ស៊ីបានពីការលក់ប្រេង និងឧស្ម័នអាចកើនឡើងទ្វេដងពីប្រហែល ១២ ពាន់ ដល់ ២៤ ពាន់លានដុល្លារ ជំរុញដោយការឡើងថ្លៃ និងការបន្ធូរបន្ថយទណ្ឌកម្មប្រេងបណ្តោះអាសន្នផ្តល់ដោយប្រធានាធិបតីអាមេរិក លោក ដូណាល់ ត្រាំ (Donald Trump)។
ប្រាក់ចំណូលប្រេង និងឧស្ម័នរបស់រុស្ស៊ី ត្រូវបានគេព្យាករណ៍ថានឹងឈានដល់ ២១៨,៥ ពាន់លានដុល្លារនៅឆ្នាំ ២០២៦ ដែលខ្ពស់ជាងការប៉ាន់ស្មានមុនពេលសង្គ្រាមប្រហែល ៦៣%។ នៅក្នុងករណីសង្គ្រាមដែលអូសបន្លាយយូរជាងនេះ ដែលមានរយៈពេលរហូតដល់ ៦ ខែ ប្រាក់ចំណូលអាចកើនឡើងដល់ ៣៨៦,៥ ពាន់លានដុល្លារ។
នៅក្នុងកិច្ចប្រជុំនៅឯវិមានក្រឹមឡាំង កាលពីពេលថ្មីៗនេះ ប្រធានាធិបតីរុស្ស៊ី លោក វ្លាដឺមៀរ ពូទីន (Vladimir Putin) បានជំរុញឱ្យបណ្តាក្រុមហ៊ុនថាមពលបញ្ជូនប្រាក់ចំណេញទាំងនេះទៅក្នុងការកាត់បន្ថយបំណុលក្នុងស្រុក។ ប្រាក់ចំណេញទាំងនេះ បានកើតឡើងក្នុងចំណោមភាពចលាចលនៅក្នុងទីផ្សារថាមពលសកល បន្ទាប់ពីការរំខានដល់ការដឹកជញ្ជូនដោយអ៊ីរ៉ង់ តាមរយៈការបិទច្រកសមុទ្រហ័រមូស (Hormuz)។
ជាលទ្ធផល តម្លៃប្រេងឆៅម៉ាក Brent បានកើនឡើងប្រហែល ៣៨% ឬជាង ១០០ ដុល្លារក្នុង១ធុង ចាប់តាំងពីសង្គ្រាមបានចាប់ផ្តើមនៅថ្ងៃទី២៨ ខែកុម្ភៈ ឆ្នាំ២០២៦ រហូតមកទល់ពេលនេះ។ ទោះយ៉ាងណាក៏ដោយ បើយោងតាមអ្នកវិភាគនៅ KSE បានឱ្យដឹងថា ប្រេងរុស្ស៊ីបានកើនឡើងលឿនជាងមុន ដោយតម្លៃបានកើនឡើងប្រហែល ៧២% ឯណោះ៕
ចែករំលែកព័តមាននេះ