ទីក្រុងតេអេរ៉ង់៖ ច្រកសមុទ្រហ័រម៉ូសបើកបានត្រឹមតែបន្តិចប៉ុណ្ណោះ ឥឡូវនេះឮថាអ៊ីរ៉ង់កំពុងកិកកុកចង់បិទវិញហើយក្រោមហេតុផលថាអាមេរិកប្រព្រឹត្តទង្វើដូចចោរសមុទ្រ។ យោធាអ៊ីរ៉ង់ថ្លែងថាខ្លួននឹងចូលកាន់កាប់ច្រកសមុទ្រនេះឡើងវិញ។ នេះបើយោងតាមការផ្សាយរបស់សារព័ត៌មានរដ្ឋអ៊ីរ៉ង់។ ទីភ្នាក់ងារព័ត៌មានហ្វាស (Fars) ដែលមានទំនាក់ទំនងជាមួយឆ្មាំបដិវត្តឥស្លាម រួមទាំងទីភ្នាក់ងារព័ត៌មាននិស្សិត និងប្រព័ន្ធផ្សព្វផ្សាយ IRIB បានដកស្រង់សេចក្ដីប្រកាសរបស់ឆ្មាំបដិវត្តមកផ្សាយថាច្រកសមុទ្រហ័រម៉ូសនឹងវិលទៅរកស្ថានភាពដដែលឡើងវិញ។ មានន័យថាពួកគេនឹងចូលគ្រប់គ្រងទីនោះជាថ្មី។
យោធាអ៊ីរ៉ង់ចោទប្រកាន់ថាអាមេរិកប្រព្រឹត្តទង្វើឆក់ប្លន់របៀបជាចោរសមុទ្រព្រោះពួកគេ (អាមេរិក) បន្តបិទខ្ទប់កំពង់ផែរបស់អ៊ីរ៉ង់។ តាំងពីមុននេះ អ៊ីរ៉ង់ធ្លាប់និយាយរួចហើយថាខ្លួននឹងបិទច្រកហ័រម៉ូសវិញប្រសិនបើអាមេរិកនៅតែបន្តបិទខ្ទប់កំពង់ផែរបស់ខ្លួន (អ៊ីរ៉ង់)។ អ៊ីរ៉ង់ថាអាមេរិកបានក្បត់សន្យារបស់ខ្លួន។ ដូច្នេះ ថ្ងៃនេះ យោធាអ៊ីរ៉ង់ចាប់ផ្ដើមរឹតត្បិតការបើកកប៉ាល់កាត់ច្រកសំខាន់ៗបន្ទាប់ពីអាមេរិកប្រកាសច្បាស់ៗថាខ្លួននឹងបន្តបិទខ្ទប់កំពង់ផែអ៊ីរ៉ង់រហូតដល់មានកិច្ចព្រមព្រៀងសន្តិភាព។
តាមពិត លទ្ធភាពនៃការបើកច្រកសមុទ្រហ័រម៉ូសឡើងវិញបានជួយស្ដារស្ថានភាពនៅផ្សារមូលប័ត្របានមួយផ្នែកដែរកាលពីថ្ងៃសុក្រ ហើយក៏ធ្វើឱ្យរដ្ឋាភិបាលទីក្រុងវ៉ាស៊ីនតោនមានសុទិដ្ឋិនិយមផងដែរ។ លោកដូណាល់ត្រាំថ្លែងប្រាប់អ្នកសារព័ត៌មានថាកិច្ចព្រមព្រៀងសន្តិភាពរវាងអ៊ីរ៉ង់ និងអាមេរិកអាចនឹងកើតឡើងឆាប់ៗនេះ។ លោកថាអ៊ីរ៉ង់យល់ព្រមប្រគល់ទៅឱ្យអាមេរិកនូវសារធាតុអ៊ុយរ៉ាញ៉ូមដែលចម្រាញ់រួចហើយ។ បញ្ហាអ៊ុយរ៉ាញ៉ូមនេះជាលក្ខខណ្ឌដ៏សំខាន់មួយនៅក្នុងការចរចា។
លោកត្រាំថ្លែងថាយើងនឹងចូលទៅជីកកកាយយកសារធាតុនេះពីប្រទេសអ៊ីរ៉ង់ ហើយនឹងបញ្ជូនគ្រឿងចក្រប្រភេទអេស្កាវ៉ាទ័រ (excavator) ជាច្រើនគ្រឿងទៅទីនោះ។ ប៉ុន្តែអ៊ីរ៉ង់ច្រានចោលការអះអាងនេះ។ អ៊ីរ៉ង់ថាសារធាតុអ៊ុយរ៉ាញ៉ូមរបស់ខ្លួនមិនអាចដឹកទៅកាន់ទីកន្លែងណាទេ។ អ៊ីរ៉ង់ថែមទាំងព្រមានថាប្រសិនបើនាវាចម្បាំងអាមេរិករារាំងផ្លូវនាវាដែលចង់ចូលចតកំពង់ផែអ៊ីរ៉ង់ ពេលនោះ ខ្លួននឹងបិទច្រកហ័រម៉ូសជាថ្មី។ ប្រធានរដ្ឋសភាអ៊ីរ៉ង់ថ្លែងថាការបើកនាវាឆ្លងកាត់ច្រកសមុទ្រនេះត្រូវតែស្នើសុំការអនុញ្ញាតពីអ៊ីរ៉ង់៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ