សុខភាព៖ យោងតាមការចុះផ្សាយពីប្រភពបរទេស វិបត្តិអស់កម្លាំងចិត្តក្នុងការងារ គឺជាស្ថានភាពដែលកើតចេញពីការសន្សំស្ត្រេសរ៉ាំរ៉ៃក្នុងកន្លែងធ្វើការរហូតដល់ថ្នាក់រាងកាយ និងផ្លូវចិត្តមិនអាចទ្រាំទ្របានទៀតឡើយ។

អ្នកអាចសង្កេតដឹងពីអាការៈនេះតាមរយៈសញ្ញាសំខាន់ៗដូចជា អារម្មណ៍អស់ថាមពល លែងចង់ធ្វើអ្វីទាំងអស់ ការបាត់បង់ទំនុកចិត្តលើសមត្ថភាពខ្លួនឯង និងប្រសិទ្ធភាពការងារធ្លាក់ចុះគួរឱ្យកត់សម្គាល់ ដែលអាចនាំឱ្យមានទំនាក់ទំនងមិនល្អជាមួយអ្នកជុំវិញខ្លួន។ បញ្ហានេះប្រសិនបើទុកចោលយូរ នឹងក្លាយជាដើមហេតុនាំឱ្យកើតជំងឺបាក់ទឹកចិត្ត ឬជំងឺទាក់ទងនឹងប្រព័ន្ធប្រសាទដែលពិបាកក្នុងការព្យាបាល។

ដើម្បីដោះស្រាយវិបត្តិនេះ អ្នកគួរផ្ដល់ពេលវេលាសម្រាកឱ្យបានគ្រប់គ្រាន់ ញ៉ាំអាហារ និងហាត់ប្រាណឱ្យទៀងទាត់ រួមទាំងការកែតម្រូវរបៀបរស់នៅដោយមិនត្រូវយកបញ្ហាការងារទៅផ្ទះ និងចេះបដិសេធការងារដែលហួសពីលទ្ធភាព។ អ្វីដែលសំខាន់បំផុត គឺការបើកចិត្តនិយាយជាមួយអ្នកដែលទុកចិត្ត ឬប្រឹក្សាជាមួយគ្រូពេទ្យជំនាញ ដើម្បីកែតម្រូវតុល្យភាពជីវិត និងស្វែងរកកម្លាំងចិត្តក្នុងការងារឱ្យវិលត្រឡប់មកវិញ៕