ទីក្រុងប៉េកាំង៖ ប្រទេសចិនទាមទារឱ្យជប៉ុនចាត់វិធានការឱ្យបានច្រើនបន្ថែមទៀតជាជាងបានត្រឹមតែសម្ដែងការសោកស្ដាយជុំវិញករណីដែលបុរសជនជាតិជប៉ុនម្នាក់ចូលបរិវេណស្ថានទូតចិនប្រចាំទីក្រុងតូក្យូកាលពីពេលថ្មីៗនេះ។ ការថ្លែងដូច្នេះបន្ទាប់ពីជប៉ុនថ្លែងថាខ្លួនសោកស្ដាយដែលមន្ត្រីយោធាជប៉ុនមានកាំបិតនៅក្នុងដៃម្នាក់សម្រុកចូលស្ថានទូតចិនទាំងកម្រោល។ ទោះជាយ៉ាងណាក្ដី ចិនយល់ថាប៉ុណ្ណឹងមិនទាន់គ្រប់គ្រាន់ទេ។ នេះបើយោងតាមការប្រកាសរបស់ក្រសួងការបរទេសចិន។
រហូតមកដល់ពេលនេះ ប្រទេសជប៉ុនមិនទាន់និយាយលម្អិតអំពីឧបទ្ទវហេតុនេះនៅឡើយទេ។ នេះបើយោងតាមការអះអាងរបស់អ្នកនាំពាក្យចិន លោកលីនចៀន (Lin Jian)។ អ្នកនាំពាក្យរដ្ឋាភិបាលជប៉ុនចាត់ទុកថាសំណុំរឿងនោះគួរឱ្យសោកស្ដាយ។ លោកថ្លែងបន្តទៀតថារដ្ឋាភិបាលជប៉ុននឹងចាត់វិធានការបន្ថែមទៀតដើម្បីទប់ស្កាត់មិនឱ្យករណីបែបនេះកើតឡើងនាពេលអនាគត។
តាមពិត ប្រទេសចិន និងជប៉ុនមានជម្លោះការទូតជាមួយគ្នាជាច្រើនខែមកហើយក្រោយការថ្លែងរបស់នាយករដ្ឋមន្ត្រីជប៉ុននៅរដ្ឋសភាដែលថាជប៉ុនអាចនឹងធ្វើអន្តរាគមន៍យោធានៅក្នុងបញ្ហាតៃវ៉ាន់។ លោកស្រីថ្លែងដូច្នេះកាលពីខែវិច្ឆិកា ឆ្នាំ២០២៥។ បញ្ហាទំនាក់ទំនងរកាំរកូសនេះមិនទាន់ធូរស្រាលផង ឧបទ្ទវហេតុមួយទៀតក៏ស្រាប់តែកើតឡើងថែមទៀត ហាក់ដូចជាផ្ទួនៗគ្នាតែម្ដង។ ពោលគឺវាប្រៀបបាននឹងការធ្វើឱ្យភាពតានតឹងនេះឡើងកម្ដៅកាន់តែខ្លាំង។
លោកលីនចៀនថ្លែងថា «ជាថ្មីម្ដងទៀត យើងសូមជំរុញឱ្យភាគីជប៉ុនបើកការស៊ើបអង្កេតដ៏ទូលំទូលាយឱ្យបានឆាប់រហ័សជាទីបំផុត ហើយឡើងរាយការណ៍ជូនប្រទេសចិននូវការពន្យល់បកស្រាយប្រកបដោយការទទួលខុសត្រូវ»។ រដ្ឋមន្ត្រីការពារជាតិជប៉ុនថ្លែងថាហេតុការណ៍នេះជារឿងគួរឱ្យសោកស្ដាយពិតមែន។ លោកថាក្រសួងរបស់លោកកំពុងសហការគ្នាយ៉ាងពេញទំហឹងជាមួយនគរបាលនៅក្នុងដំណើរការស៊ើបអង្កេត។ យើងនឹងឆ្លើយតបដោយភាពហ្មត់ចត់នៅពេលរកឃើញការពិត៕ ប្រភព៖ រ៉យទ័រ និងប្រភពដទៃទៀត
រដ្ឋមន្ត្រីការពារជាតិជប៉ុន លោក Shinjirō Koizumi
ចែករំលែកព័តមាននេះ