ខេត្តកំពង់ចាម ៖ ដើម្បីពង្រឹងសុខភាពរបស់ប្រជាពលរដ្ឋ មន្ត្រីជំនាញនៃសាខាក.ប.ប បានសហការជាមួយមន្ត្រីមន្ទីរពាណិជ្ជកម្មខេត្ត ចុះពិនិត្យមើលរកប្រេងឆាក្លែងក្លាយចំនួន៥ម៉ាក ដែលធ្វើឲ្យប៉ះពាល់សុខភាពពេលយកមកចម្អិនម្ហូបអាហារ ។ តែតាមរយៈការចុះពិនិត្យរបស់មន្ត្រីជំនាញគិតរហូតមកដល់ល្ងាចថ្ងៃទី២៤ តុលា…
ខេត្តកំពង់ចាម ៖ ដើម្បីពង្រឹងសុខភាពរបស់ប្រជាពលរដ្ឋ មន្ត្រីជំនាញនៃសាខាក.ប.ប បានសហការជាមួយមន្ត្រីមន្ទីរពាណិជ្ជកម្មខេត្ត ចុះពិនិត្យមើលរកប្រេងឆាក្លែងក្លាយចំនួន៥ម៉ាក ដែលធ្វើឲ្យប៉ះពាល់សុខភាពពេលយកមកចម្អិនម្ហូបអាហារ ។ តែតាមរយៈការចុះពិនិត្យរបស់មន្ត្រីជំនាញគិត
រហូតមកដល់ល្ងាចថ្ងៃទី២៤ តុលា ឆ្នាំ២០២៥ មិនទាន់រកឃើញនៅផ្សារណាមួយក្នុងខេត្តកំពង់ចាមចរាចរណ៍លក់ដូរនោះទេ ទោះបីជាបែបនេះក៏ដោយ មន្ត្រីជំនាញនៅបន្តតាមដានតទៅទៀត
ធ្វើយ៉ាងណាទប់ស្កាត់ឈ្មួញខិលខូច ។
លោកស៊ាន ស៊ីណាត ប្រធានអង្គភាពសាខាក.ប.ប មានប្រសាសន៍ឲ្យដឹងថា ក្រោយពីបានទទួលបទបញ្ជាពីស្ថាប័នជំនាញក្រសួងពាណិជ្ជកម្មក៏ដូចជាការណែនាំរបស់រដ្ឋបាលខេត្ត បានឲ្យកម្លាំងជំនាញរបស់លោកបំពេញបេសកកម្មនៅតាមបណ្ដាស្រុកមួយចំនួនក្នុងខេត្តកំពង់ចាម នាពេលកន្លងទៅថ្មីៗ តែពេលចុះទៅដល់តូបលក់ដូររបស់បងប្អូនអាជីវករ គឺរកប្រេងឆាចំនួន៥ម៉ាក ដែលជាប្រភេទប្រេងឆាក្លែងក្លាយនៅប្រទេសវៀតណាម ដែលធ្វើឲ្យប៉ះពាល់សុខភាព តែពុំឃើញមានតូបលក់ដូរណាមួយលក់ប្រេងឆាទាំងនោះទេ ។
មន្ត្រីជំនាញបានបន្តឲ្យដឹងទៀតថា កាលពីថ្ងៃទី២២ តុលា ២០២៥ មន្ត្រីសាខា ក.ប.ប.ខេត្តកំពង់ចាមបានសហការជាមួយមន្ត្រីមន្ទីរពាណិជ្ជកម្មចុះត្រួតពិនិត្យទំនិញផលិតផលម្ហូបអាហារ និងស្វែងរកប្រេងឆាទាំងប្រាំប្រភេទដែលមានបញ្ហានៅប្រទេសវៀតណាម នៅផ្សារព្រែករំដេង និងផ្សារព្រែកដំបូក ស្រុកស្រីសន្ធរ តែជាលទ្ធផលរកពុំឃើញលក់នៅលើទីផ្សារឡើយ ។ ដោយឡែកចំពោះផ្សារបឹងកុក និងផ្សារធំក្រុងកំពង់ចាម ក្រុមមន្ត្រីជំនាញបានចុះស្វែងរកដោយយកចិត្តទុកដាក់ តែរកមិនឃើញមានដូចគ្នា ។
ការចុះត្រួតពិនិត្យនេះ ក្នុងគោលបំណងធានាការពារនូវសុខុមាលភាពជូនអ្នកប្រើប្រាស់ ទប់ស្កាត់ផលិតផលទំនិញមិនសមស្រប ពិសេស ផលិតផលម្ហូបអាហារដែលមិនអនុលោមតាមលក្ខខណ្ឌតម្រូវផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ជាយថាហេតុ។
ទន្ទឹមនឹងនេះ អគ្គនាយកដ្ឋាន ក.ប.ប. នៃក្រសួងពាណិជ្ជកម្ម សូមអំពាវនាវដល់ប្រជាពលរដ្ឋបង្កើនការប្រុងប្រយ័ត្ន កុំទិញ លក់ ឬប្រើប្រាស់ផលិតផលប្រេងឆាដែលមានម៉ាកខាងលើ និងក្នុងករណីបើប្រទះ សូមធ្វើការទំនាក់ទំនងតាមរយៈ CCF Complaint App, លេខទូរសព្ទ ១២៦៦ ដើម្បីមានវិធានការតាមនីតិវិធី ឱ្យបានទាន់ពេលវេលា ។ ជាមួយនោះមន្ត្រីជំនាញមានជំនឿមុតមាំថា បងប្អូនអាជីវករនិងស្ដាប់ការណែនាំធ្វើយ៉ាងណា លក់ដូប្រេងឆាដែលមានកាលកំណត់បរិច្ឆេទត្រឹមត្រូវតាមស្តង់ដារបច្ចេកទេស ។
ចែករំលែកព័តមាននេះ