រាជធានីភ្នំពេញ ៖ អ៊ុំ វិចិត្រ អ្នកចាំទីឱ្យក្លិបក្រសួងការពារជាតិ បានឱ្យដឹងនៅក្នុងគេហទំព័ររបស់ខ្លួនកាលពីពេលថ្មីៗនេះថា ស្ទើរ តែ២០ប្រកួតទៅហើយ ទាំងការប្រកួតពាន រង្វាន់សម្ដេចតេជោហ៊ុន សែន និងការប្រកួតក្របខណ្ឌមិត្តហ្វូនខេមបូឌានលីគឆ្នាំ២០១៩ រូបគេត្រូវរ៉ាប់រងសំណាញ់ទីតែម្នាក់ឯង ។
រ៉ាប់ រងសំណាញ់ទីតែម្នាក់ឯងដោយសារប្អូនប្រុសបង្កើតរបស់គេរងរបួសពុំទាន់អាចចូលលេងបាន រីឯអ្នកចាំទីដៃទី២នៅមានកម្រិតពុំទាន់មានសមត្ថភាពគ្រប់គ្រាន់ក្នុងការជំនួសដៃជើងរបស់គេបាននៅឡើយ។
ទោះជាយ៉ាងនេះក្ដី អ្នកចាំទីដៃស្អិតរូបនេះនៅតែបង្ហាញសុទិដ្ឋិនិយមខ្ពស់ បើទោះជាហត់នឿយបន្តិចក្ដី ប៉ុន្តែគេនៅតែមានភាពរីករាយក្នុងការជួយក្លិបរកលទ្ធផលល្អប្រសើរសម្រាប់ការប្រកួតក្របខណ្ឌលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន វគ្គជម្រុះ៨ក្រុមចុងក្រោយ ។ ពិសេសជាងនេះទៅទៀត គេនៅតែខិតខំពង្រឹងសមត្ថភាពដើម្បីត្រៀមប្រកួតព្រឹត្តិការណ៍ជម្រុះWorld Cupជុំទី២ ទ្វីបអាស៊ីនាពេលខាងមុខ។
ជាមួយគ្នានេះ អ៊ុំ វិចិត្រ បានបង្ហាញបំណង ប្រាថ្នាមួយ គឺចង់ឃើញប្អូនប្រុសរបស់គេ អ៊ុំ សេរីរ័ត្ន វិលចូលទីលានបង្ហាញខ្លួនក្នុងក្រុមជម្រើស ជាតិសាជាថ្មី ដើម្បីជួយសម្រួលក្នុងការការពារ សំណាញ់ទី។ គេថា កាលពីមិនទាន់ប្រកួតជម្រុះពានHUN SEN CUP អត់សូវអីប៉ុន្មាន ទេ អាចទប់ទល់បាន តែដល់ពេលការប្រកួត ឈានចូលមកដល់ពាក់កណ្ដាលទី រាងយ៉ាប់បន្តិច ។
មានពេលខ្លះប្រមូលកម្លាំងអត់ទាន់ ពេលខ្លះលេងទាំងមានរបួស ព្រោះសេរីរ័ត្ន អត់ទាន់ជំនួសបាន បើមិនទ្រាំខ្លាចចាញ់ ។ យ៉ាងណាក៏ដោយគេថាមិនខ្លាចហត់ទេ សំខាន់ឱ្យតែក្លិបឈ្នះ ក្លិបទទួលបានលទ្ធផលល្អ យើងកាន់តែសប្បាយចិត្ត ។ ម្យ៉ាងចាត់ទុកជាការលត់ដំខ្លួនមួយដើម្បីកៅអីជម្រើសជាតិនៅវគ្គចែកពូល។
គួររម្លឹកថា គិតមកត្រឹមសប្ដាហ៍ទី១៥កន្លងទៅនេះ ក្រសួងការពារជាតិឈរនៅលេខរៀងទី៧ មាន២៣ពិន្ទុ ដែលបានពីការឈ្នះ៧ប្រកួតស្មើ២ប្រកួត ចាញ់៦ប្រកួត ៕ (កែសម្រួលដោយ ៖ បុប្ផា)
ចែករំលែកព័តមាននេះ