រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា គេមិនដឹងថាផ្តើមចេញពីរឿងអ្វីនោះទេ សុខៗស្រាប់តែមានអំពើហិង្សាកើតឡើងរវាងភាគីម្ខាងជាជនជាតិចិនដែលមានគ្នាជាង២០នាក់បានព្រួតវាយនិងយកដំបងឆក់ភាគីម្ខាងទៀតជាជនជាតិចិនដែលមានគ្នា៣នាក់ បណ្តាលឱ្យរងរបួសធ្ងន់ទាំង៣នាក់ត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន។
ហេតុការណ៍ខាងលើនេះបានកើតឡើងកាលពីវេលាម៉ោង៤ទៀបភ្លឺថ្ងៃទី២០ ខែកក្កដា ឆ្នាំ២០១៩ តាមបណ្ដោយផ្លូវ២១៤ កែងនឹងផ្លូវ៦៣ នៅចំណុចសណ្ឋាគារឌីសខាវែរីហូលថេល ស្ថិតនៅក្នុងសង្កាត់បឹងរាំង ខណ្ឌដូនពេញ ។
ភាគីជនជាតិចិនទាំងក្រុមខាងលើមិនទាន់អត្តសញ្ញាណនោះទេ ។
តាមប្រភពពីសាក្សីដែលឃើញហេតុការណ៍បានប្រាប់ឲ្យដឹងថា មុនពេលកើតហេតុ គេបានឃើញជនជាតិចិនចំនួន២ក្រុម ដោយភាគីម្ខាងមានគ្នា៣នាក់ ចំណែកភាគីម្ខាងទៀតមានគ្នាជាង២០នាក់ប្រដាប់ដោយដំបងឆក់ និងដំបង៣កំណាត់បានព្រួតវាយទៅលើភាគីខាងជនរងគ្រោះដែលមានគ្នា៣នាក់ បណ្ដាលឲ្យរងរបួសធ្ងន់សន្លប់ទាំង៣នាក់ ក្នុងនោះ២នាក់សន្លប់ត្រូវបានជនជាតិចិនខាងភាគីបង្កអូសយកទៅក្នុងសណ្ឋាគារ ហើយម្នាក់ទៀតបានដេកដួលនៅមុខសណ្ឋាគារបែកក្បាលហូលឈាមសន្លប់ត្រូវរថយន្តសង្គ្រោះរបស់គ្លីនិកដឹកយកទៅព្យាបាល ។
តាមប្រភពពីសមត្ថកិច្ចបានឱ្យដឹងថា ពួកគាត់មិនដឹងថា ជនជាតិចិនទាំង២ក្រុមខាងលើនេះមានទំនាស់រឿងអ្វីនោះទេ គ្រាន់តែដឹងថាសុខៗក៏មានកើតជាអំពើហិង្សានៅមុខសណ្ឋាគារខាងលើតែម្ដង ។
ក្រោយពេលកើតហេតុ រថយន្តសង្គ្រោះបានដឹកយកជនរងគ្រោះយកទៅព្យាបាលនៅគ្លីនិកឯកជន ហើយរង់ចាំជនរងគ្រោះជាសះស្បើយសិននឹងទៅដាក់ពាក្យបណ្ដឹងនៅពេលក្រោយទៀត ៕ (កែសម្រួលដោយ ៖ ធីតា)
ចែករំលែកព័តមាននេះ