ខេត្តកំពង់ចាម ៖ សេចក្តីរាយការណ៍បឋម សកម្មភាពរបស់ក្រុមជំនាញបានចុះបង្ក្រាបបទល្មើសនេសាទ ចំនួន២កន្លែង នៅព្រឹកថ្ងៃទី១៨ កក្កដា ២០១៩ នៅត្រង់ចំនុចទំនប់ជ្រោយអណ្តូង និងទំនប់រលំពោធិ ឃុំមៀន ស្រុកព្រៃឈរ ។ ដោយបានរឹបអូសបទល្មើសនេសាទជាច្រើន និងបានដុតបំផ្លាញចោលក្រោមការឯកភាពពីលោកហួត វុទ្ធី ព្រះរាជអាជ្ញាអមសាលាដំបូងខេត្តផងដែរ ។
លោកអ៊ុក ណារិន នាយខណ្ឌរដ្ឋបាលជលផលខេត្តកំពង់ចាមប្រាប់ឲ្យដឹងថា បន្ទាប់ពីមានសេចក្តីរាយការណ៍ថា នៅត្រង់ទីតាំងចំនួន២កន្លែង នៅតំបន់ខាងលើមានដាក់ស្បៃមុង ដើម្បីចាប់យកត្រីក្នុងរដូវបិទនេសាទនោះ រូបលោកបានរាយការណ៍ជូនប្រធានមន្ទីរកសិកម្មខេត្ត ដើម្បីមានវិធានការចុះបង្ក្រាបជាបន្ទាន់ព្រោះ ថាឧបករណ៍នេសាទល្មើសច្បាប់បានបំផ្លាញត្រីតូចៗដែលទើបនឹងញាស់ ។
លោកអ៊ុក ណារិន នាយខណ្ឌជលផលខេត្តប្រាប់បន្តថា ចំពោះការបង្ក្រាបលើកទី១ ត្រង់ចំនុចទំនប់ជ្រោយអណ្តូង ឃុំមៀន ដោយបានរឹបអូសលូស្បៃមុងចំនួន៣១មាត់ របាំងស្បៃមុងប្រវែង៧១៣ម៉ែត្របង្គោលចម្រឹងចំនួន៣៧២ដើម ចាក់លែងកូនត្រីទៅក្នុងបឹងធម្មជាតិទង្ងន់២៥គីឡូក្រាម ។ បន្ទាប់មករូបលោកបានបន្តចុះដឹកនាំកម្លាំងរបស់ជលផលខេត្តដោយមានការចូលរួមពីមន្ត្រីផ្នែកសង្កាត់ និងសហគមន៍នេសាទសាមគ្គីឃុំមៀន ចុះបង្ក្រាបលើកទី២ ត្រង់ចំនុចទំនប់រលំពោធិ ឃុំមៀន ដោយបានរឹបអូសរ៉ាវចំនួន០៤មាត់ របាំងឧបករណ៍រ៉ាវប្រវែង១០៥ម៉ែត្រ បង្គោលចម្រឹងចំនួន៥៣ដើម ចាក់លែងកូនត្រីចំរុះច្រើនគីឡូក្រាមបន្ថែមទៀត ។ ដោយមានការឯកភាពពីលោកហួត វុទ្ធី ព្រះរាជអាជ្ញាអមសាលាដំបូងខេត្ត សម្ភារបទល្មើសនេសាទដែលរឹបអូសបានត្រូវដុតបំផ្លាញចោលផងដែរ ។
ជាមួយនោះតាមការណែនាំរបស់អាជ្ញាធរខេត្តក៏ដូចជាប្រធានមន្ទីរកសិកម្មខេត្ត រូបលោកនឹងបន្តចុះបង្ក្រាបបទល្មើសនៅកន្លែងផ្សេងទៀតឲ្យបានដូចភ្លៀងរលឹម។ ហើយប្រសិន បើប្រជាពលរដ្ឋបានឃើញបទល្មើសនៅតាងដងទន្លេមេគង្គ ឫបឹងបួរនានាត្រូវរាយការណ៍មកជំនាញរបស់លោក ដើម្បីមានវិធានការចុះបង្ក្រាប ហើយក៏សូមឲ្យអ្នកប្រើប្រាស់បទល្មើសនេសាទមេត្តាសូមបញ្ឈប់សកម្មភាពនេសាទបន្តទៀត ហើយងាកមកប្រើប្រាស់នូវឧបករណ៍នេសាទស្របច្បាប់លក្ខណៈគ្រួសារ ៕ កែសម្រួលដោយ ៖ សុឃាក់
ចែករំលែកព័តមាននេះ