ខេត្តបាត់ដំបង ៖ ទំនប់ពហុបំណងបាត់ដំបងជាទំនប់វារីអគ្គិសនីមិនទាន់រួចរាល់ទាំងស្រុង បានក្លាយទៅជាតំបន់ទេសចរណ៍តាមរយៈគម្រោងអភិវឌ្ឍន៍របស់រាជរដ្ឋាភិបាលដែលមានសម្តេចតេជោហ៊ុន សែន ជានាយករដ្ឋមន្ត្រីដឹកនាំ និងជំរុញតាមរយៈសម្តេចក្រឡាហោម ស ខេង ឧបនាយករដ្ឋមន្ត្រី ព្រមទាំងប្រធានក្រុមការងារខេត្តបាត់ដំបងពន្លឿនការរីកចម្រើនបន្ថែមទៀត តាមបែបសម័យទំនើបដែលប្រជាពលរដ្ឋកំពុងត្រូវការ ។
ទំនប់នេះមានទីតាំងសំណង់មេ ស្ថិតនៅក្នុងឃុំផ្លូវមាស ស្រុករតនមណ្ឌល ខេត្តបាត់ដំបង ដោយការងារនេះក្រសួងធនធានទឹក និងឧតុនិយមបានអនុវត្តន៍ដោយលើកទំនប់តភ្ជាប់ពីភ្នំជីប៉ាងទៅភ្នំកូប ដើម្បីបង្កើតជាអាងទឹកមានប្រវែងជាង៣គីឡូម៉ែត្រកំពស់១០ម៉ែត្រ ដែលមានសមត្ថភាពស្តុកទឹកបានចំនួន២៨៦លានម៉ែត្រគូប ។ ទឹកដែលប្រមូលស្តុកទុកនេះនឹងត្រូវទម្លាក់តាមដងស្ទឹងសង្កែ រួចបន្តចែកចាយតាមប្រឡាយមេប្រឡាយរង ទៅស្រោចស្រពលើផ្ទៃដីស្រូវវស្សាចំនួន៤៧.០០០ ហិកតា និងស្រូវប្រាំងចំនួន១២.០០០ ហិកតា នៅក្នុងស្រុករតនមណ្ឌល បាណន់ សង្កែ និងស្រុកមោងឫស្សី និងកន្លែងផ្សេងៗសរុបប្រមាណជិត១០ម៉ឺនហិកតា ។
គម្រោងនេះក៏អាចទាញយកថាមពលវារីអគ្គិសនីចំនួន១៣.២០០គីឡូវ៉ាត់ ព្រមទាំងផ្តល់ទឹកសម្រាប់ការប្រើប្រាស់ដល់ក្រុងបាត់ដំបងផងដែរ ។ នេះជាសមិទ្ធលថ្មីមួយទៀតរបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោនាយករដ្ឋមន្ត្រីបានជំរុញបន្តបន្ទាប់ដែលមានទំនប់កង្ហតនៅស្រុកបាណន់ តាមដងស្ទឹងសង្កែក្នុងខេត្តបាត់ដំបង ។
គេចាំបានថា នៅព្រឹកថ្ងៃទី០១ កក្កដា ឆ្នាំ២០១៧ កន្លងមកនេះ ស្ថិតនៅអាងទឹកទំនប់ពហុបំណងបាត់ដំបង (ហៅសេកសក) មានរៀបចំពិធីលែងកូនត្រីចម្រុះ និងបង្កងយ៉ាងអធិកអធម្ម ស្ថិតក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ព្រមទាំងចូលរួមដោយមន្ត្រីពាក់ព័ន្ធ និងប្រជាពលរដ្ឋប្រមាណជា៥ពាន់នាក់ និងសម្ពោធទំនប់ពហុបំណងហៅទំនប់សេកសក ក្នុងឱកាសទិវាមច្ឆាជាតិ ក្នុងផ្ទៃអាងអាចស្តុកទឹកបាន៣០០០លានម៉ែត្រត្រីគុណ ក្នុងនោះ១២៥លានម៉ែត្រត្រីគុណសម្រាប់វិស័យឧស្សាហ៍កម្ម៥២១លានម៉ែត្រត្រីគុណសម្រាប់ប្រជាជនប្រើប្រាស់២៤៣លានម៉ែត្រត្រីគុណសម្រាប់វិស័យកសិកម្ម ។
ក្នុងពិធីបានព្រលែងកូនត្រីមួយលានក្បាល បង្កងមួយសែនក្បាល និងត្រីពូជមានត្រីគល់រាំង ត្រីរស ឆ្តោ អណ្តើក កង្កែប ជាដើម ។ រីឯកូនត្រីដែលត្រូវលែងមានចំនួន១លានក្បាល , ត្រីគល់រាំង, ត្រីប្រា, ត្រីឆ្ពិនរាប់ម៉ឺនក្បាល និងបង្កង១០ម៉ឺនក្បាលផងដែរ ។
នេះជាចំណុចបានជំរុញទំនប់ពហុបំណងរមណីយដ្ឋានធម្មជាតិដ៏ស្រស់ស្អាតបំផុតមួយក្នុងខេត្តបាត់ដំបងឲ្យកាន់តែមានភ្ញៀវបានស្គាល់ចង់ដឹងតំបន់នេះដែលកំពុងប្រែក្លាយទៅជាតំបន់ទេសចរណ៍មុនគេ ដែលក្នុងថ្ងៃធម្មតា សៅរ៍ ឬអាទិត្យ ភាគច្រើនមកកម្សាន្តពេលល្ងាច និងព្រលប់ច្រើនជាងគេ ព្រោះអាកាសធាតុល្អ មានខ្យល់ធ្លាក់ត្រជាក់ស្រួល ហើយក្នុងឱកាសពិធីបុណ្យផ្សេងៗ ពិសេសបុណ្យចូលឆ្នាំថ្មី ប្រពៃណីជាតិខាងកន្លងមក ក្រសួងនឹងអនុញ្ញាតឲ្យបងប្អូនបានចូលទៅកម្សាន្តដោយក្តីសប្បាយរីករាយបំផុត ៕ កែសម្រួលដោយ ៖ សុឃាក់
ចែករំលែកព័តមាននេះ