ប៉េកាំង ៖ យោងតាមការស្ទង់មតិរបស់សារព័ត៌មាន Nikkei Asian បានឱ្យដឹងថា សន្ទុះនៃការផ្លាស់ប្តូរទីតាំងផលិតកម្មរបស់ក្រុមហ៊ុនចិន បានកំពុងកើនឡើង ខណៈដែលមានក្រុមហ៊ុនអន្តរជាតិជាង៥០ ដូចជាក្រុមហ៊ុន Apple, Nintendo និង Dell ជាដើម កំពុងប្រញាប់ដកការផលិតនៅប្រទេសចិន ដើម្បីគេចផុតពីការបង់ពន្ធថ្លៃកប់ពពកដែលដាក់ដោយអាមេរិក។
សង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន បានអូសបន្លាយជាងមួយឆ្នាំ ដោយមានពន្ធចំនួន២៥% ដែលដាក់លើទំនិញចិនចំនួន ២០០ពាន់លានដុល្លារ។ លោកប្រធានាធិបតី Donald Trump នៅតែគំរាមកំហែងដាក់ពន្ធលើទំនិញផ្សេងទៀតចំនួន ៣២៥ពាន់លានដុល្លារ។ បន្ទាប់ពីមានការប្រយុទ្ធគ្នាកាន់តែខ្លាំង ក្រុមហ៊ុនជាច្រើនបានប្រកាសផែនការឬកំពុងតែពិចារណាផ្លាស់ប្តូរការផលិតពីប្រទេសចិន។
សារព័ត៌មាន Nikkei បានរាយការណ៍ថា ក្រុមហ៊ុនផលិតកុំព្យូទ័ររបស់អាមេរិច HP និង Dell អាចផ្លាស់ប្តូររហូតដល់ ៣០%នៃផលិតផលកុំព្យូទ័រយួរដៃរបស់ពួកគេ នៅក្នុងប្រទេសចិន ទៅកាន់តំបន់អាស៊ីអាគ្នេយ៍។ ក្រុមហ៊ុន Apple បានស្នើឱ្យក្រុមហ៊ុនផ្គត់ផ្គង់ធំៗ របស់ខ្លួន វាយតម្លៃពីការផ្លាស់ប្តូរការផលិតរបស់ខ្លួនប្រហែល ១៥%ទៅ៣០% ពីប្រទេសចិនទៅឥណ្ឌា។
ក្រុមហ៊ុន Nintendo របស់ជប៉ុនក៏នឹងទាញផលិតកម្មម៉ាស៊ីនហ្គេមវីដេអូរបស់ខ្លួន ពីប្រទេសចិនមកប្រទេសវៀតណាមផងដែរ។
មិនត្រឹមតែក្រុមហ៊ុនបរទេសដែលកំពុងពិចារណាឡើងវិញនូវទីតាំងផលិតរបស់ខ្លួននោះទេ តែក្រុមហ៊ុនចិនមួយចំនួនតូចក៏កំពុងចាកចេញពីប្រទេសចិនផងដែរ។ ក្រុមហ៊ុនអេឡិចត្រូនិកចម្រុះជាតិចិន TCL កំពុងផ្លាស់ប្តូរផលិតកម្មទូរទស្សន៍របស់ខ្លួនទៅប្រទេសវៀតណាម ខណៈដែលក្រុមហ៊ុនផលិតសំបកកង់ចិន Sailun Tire កំពុងផ្លាស់ប្តូរខ្សែចង្វាក់ផលិតកម្មរបស់ខ្លួនទៅឱ្យប្រទេសថៃ។
ជម្លោះពាណិជ្ជកម្មយូរអង្វែងហាក់ដូចជាកំពុងធ្វើឱ្យប៉ះពាល់ដល់សេដ្ឋកិច្ចចិន។ ទិន្នន័យកាលពីថ្ងៃចន្ទបានបង្ហាញថា កំណើនសេដ្ឋកិច្ចរបស់ចិនបានធ្លាក់ចុះដល់ ៦.២% នៅក្នុងត្រីមាសទី ២ ដែលជាអត្រាទាបបំផុតក្នុងរយៈពេល២៧ឆ្នាំកន្លងមកនេះ។
លោក Trump បានអះអាងថា ការរីកចម្រើនយឺតគឺជាភស្តុតាងដែលថាប្រទេសចិនកំពុងតែខាតបង់ក្នុងសង្គ្រាមពាណិជ្ជកម្ម ដោយសារតែប្រទេសនេះកំពុងប្រឈមមុខនឹងត្រូវក្រុមហ៊ុនជាច្រើនរត់ចោល ៕
ប្រភព ៖ cnbc , កែសម្រួលដោយ ៖ សំណាង
ចែករំលែកព័តមាននេះ