ទីក្រុងឡុង៖ ថ្ងៃនេះ អង់គ្លេសកោះហៅឯកអគ្គរដ្ឋទូតរុស្ស៊ីទៅឆ្លើយបំភ្លឺ និងកើតទុក្ខមិនសុខចិត្តពាក់ព័ន្ធនឹងករណីដែលដ្រូនរបស់រុស្ស៊ីហោះចូលដែនអាកាសប៉ូឡូញកាលពីសប្ដាហ៍មុនរហូតដល់រាប់សិបគ្រឿង។ អង្គការណាតូក្នុងនាមប៉ូឡូញជាសមាជិករបស់ខ្លួនម្នាក់ដែរនោះពិតជាមិនស្ងប់ចិត្តចំពោះរឿងនេះទាល់តែសោះព្រោះវាជាព្រឹត្តិការណ៍ដ៏គួរឱ្យភ្ញាក់ផ្អើល។
ទោះបីដ្រូនទាំងនោះហោះជ្រុលជ្រួសដោយចេតនាក្ដី ឬអចេតនាក្ដី វាជាសញ្ញាមិនល្អ ហើយអាចមានន័យថាសង្គ្រាមអ៊ុយក្រែនមិនត្រឹមតែមិនថយចុះទេ ប៉ុន្តែអាចនឹងហៀរចូលប្រទេសក្បែរខាងដទៃទៀត។ មែនទែនទៅ ដ្រូនទាំងនោះត្រូវប៉ូឡូញបាញ់ទម្លាក់អស់ភាគច្រើនក្រោមការជួយជ្រោមជ្រែងយ៉ាងពេញទំហឹងពីសំណាក់អង្គការណាតូ។
ប៉ុន្មានថ្ងៃក្រោយព្រឹត្តិការណ៍នោះ ប្រទេសរ៉ូម៉ានីក៏ប្រញាប់ចល័តយន្តហោះចម្បាំងដើម្បីចេញធ្វើអន្តរាគមន៍បន្ទាន់នៅពេលដ្រូនរបស់រុស្ស៊ីមួយគ្រឿងហោះចូលដែនអាកាសរបស់ខ្លួន។ អ្នកនាំពាក្យក្រសួងការបរទេសអង់គ្លេសបានចេញសេចក្ដីថ្លែងការណ៍ចាត់ទុកការរំលោភដែនអាកាសរបស់រដ្ឋជាសមាជិកអង្គការណាតូជាទង្វើដែលមិនអាចទទួលយកបានទាល់តែសោះ។ អង់គ្លេសនឹងបន្តឈរនៅខាងសម្ព័ន្ធមិត្តណាតូរបស់ខ្លួនជានិច្ចដើម្បីថ្កោលទោសទង្វើដ៏ខ្ជីខ្ជានេះ។
អ្នកនាំពាក្យអង់គ្លេសថ្លែងបន្តទៀតថារុស្ស៊ីគួរណាស់យល់ឱ្យបានច្បាស់ថានៅពេលខ្លួនប្រព្រឹត្តទង្វើឈ្លានពានបែបនេះកាន់តែច្រើននឹងធ្វើឱ្យអង្គការណាតូរួបរួមសាមគ្គីគ្នាកាន់តែខ្លាំង ហើយនឹងប្ដេជ្ញាចិត្តឈរនៅខាងអ៊ុយក្រែនជានិច្ច។ លើកក្រោយ បើមានករណីបំពានដែនអាកាសបែបនេះទៀតអង់គ្លេសព្រមានថាអង្គការណាតូនឹងប្រើកម្លាំងតបតបទៅវិញជាមិនខាន។
អ្នកសារព័ត៌មានព្យាយាមទាក់ទងទៅស្ថានទូតរុស្ស៊ីប្រចាំចក្រភពអង់គ្លេសដើម្បីស្នើសុំធ្វើអត្ថាធិប្បាយ ឬមានមតិយោបល់ផ្សេងៗ។ ប៉ុន្តែគ្មានការឆ្លើយតបទេ។ កាលពីពេលកន្លងមក រុស្ស៊ីថាខ្លួនគ្មានផែនការវាយប្រហារទីតាំងណាមួយនៅប្រទេសប៉ូឡូញទេ។ នៅយប់កើតហេតុនោះ ដ្រូនរបស់ខ្លួនហោះទៅវាយប្រហារអ៊ុយក្រែន។ ដូច្នេះអាចនឹងហោះជ្រុលចូលដែនអាកាសប៉ូឡូញ។
ទោះជាយ៉ាងណាក្ដី អង្គការណាតូមិនគិតដូច្នេះទេ។ ណាតូគិតថារុស្ស៊ីចង់ធ្វើតេស្តសាកល្បងជំហររបស់ណាតូ។ បើសិនណាតូនៅស្ងៀម មិនមាត់ មិនកអ្វីទេ រុស្ស៊ីរឹតតែបានចិត្ត និងធ្វើរឹតតែខ្លាំងដៃជាងនេះទៀត។ ដូច្នេះ មិនរង់ចាំយូរទេ ណាតូក៏បញ្ចេញប្រតិកម្មជាបន្តបន្ទាប់ ជាពាក្យសម្ដីផង និងជាការចាត់វិធានការក្ដៅផង។ ថ្មីៗនេះ បារាំងប្រកាសបញ្ជូនយន្តហោះទៅជួយពង្រឹងដែនអាកាសប៉ូឡូញ។ ចំណែកអង់គ្លេសដាក់ទណ្ឌកម្មកប៉ាល់ដឹកប្រេង និងក្រុមហ៊ុនបរទេសមួយចំនួនដែលផ្គត់ផ្គង់គ្រឿងបរិក្ខារ និងរំសេវសម្រាប់រុស្ស៊ីយកទៅផលិតដ្រូន និងអាវុធ។ នេះបើតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ