ប្រទេសតួកគី ៖ ពេលប្រារព្ធខួបនៃការធ្វើរដ្ឋប្រហារមិនសម្រេច កាលពីឆ្នាំ២០១៦ដែលនាំឲ្យមានការឃ្លាតឆ្ងាយពីគ្នារវាងតួកគីនិងលោកខាងលិច ប្រធានាធិបតីតួកគីលោករីស៊ីបតៃយ៉ីបអ័រដូហ្គាន កាលពីថ្ងៃទី១៥កក្កដាបានសម្ដែងក្ដីរីករាយ ដែលប្រទេសលោកទទួលបានមីស៊ីលការពារអាកាសS-400រុស្ស៊ី ក៏ទោះជាមានការប្រឆាំងខ្លាំងក្លារបស់សហរដ្ឋអាមេរិកក្ដី។
លោកអ័រដូហ្គានថ្លែងថា យើងចាប់ផ្ដើមទទួលមីស៊ីលS-400ដែលយើងទិញ។ តើយើងនៅរង់ចាំអីទៀត? ពួកគេមិនអាចទិញមីស៊ីលទាំងនោះបាន។ ប្រសិនបើជាបំណងរបស់ព្រះជាម្ចាស់ នោះយើងនឹងបញ្ចប់ការដាក់ពង្រាយមីស៊ីលទាំងនោះនាខែមេសាឆ្នាំ២០២០។
ប្រធានាធិបតីតួកគីបានថ្លែងនៅមុខអ្នកគាំទ្រលោកច្រើនពាន់នាក់ក្នុងទីក្រុងអុីស្តង់ប៊ុល នាឱកាសនៃពិធីមួយ កំណត់ខួបលើកទី៣នៃរដ្ឋប្រហារមិនសម្រេច ដែលបណ្ដាលឲ្យមនុស្សជិត២៥០នាក់ស្លាប់។ ក្រុងវ៉ាស៊ិនតោនបានគំរាមដាក់ទណ្ឌកម្មចំពោះការទិញមីស៊ីលS-400 ដែលអាចប៉ះពាល់ដល់សេដ្ឋកិច្ចរបស់ប្រទេស។
កាលពី៣ឆ្នាំមុននាយប់ថ្ងៃទី១៥មក១៦កក្កដា២០១៦ កងទាហានតួកគីមួយក្រុមបានប៉ុនប៉ងដណ្ដើមអំណាច ដោយវាយប្រហារបណ្ដាទីតាំងយុទ្ធសាស្ត្រ ក្នុងទីក្រុងអង់ការ៉ានិងដាក់ពង្រាយរថក្រោះ តាមដងវិថីទាំងឡាយ នៃទីក្រុងអង់ការ៉ានិងក្រុងអុីស្តង់ប៊ុល។ អន្តរាគមន៍របស់កងកម្លាំងដែលស្មោះត្រង់ ក្នុងផ្ទៃកងកម្លាំងសន្តិសុខនិងអ្នកគាំទ្រលោកអ័រដូហ្គានច្រើនពាន់នាក់ ដែលលើកគ្នាមកកាន់ដងវិថីទាំងឡាយ តាមការអំពាវនាវរបស់ប្រធានាធិបតី អាចធ្វើឲ្យរដ្ឋប្រហារនោះបរាជ័យ។
ក្រុងអង់ការ៉ាបានទម្លាក់ការទទួលខុសត្រូវលើការប៉ុនប៉ងធ្វើរដ្ឋប្រហារនោះ លើគ្រូប្រដៅសាសនាលោកFETHULLAH GULEN ដែលរស់នៅនិរទេសឯសហរដ្ឋអាមេរិក។ ការប្រារព្ធខួបរដ្ឋប្រហារគឹជួនពេលគ្នាជាមួយការកើនឡើងនៃភាពតានតឹងរវាងតួកគីនិងបណ្ដាដៃគូលោកខាងលិច ដែលក្រៅពីទាក់់ទិននឹងមីស៊ីលS-400 មានបញ្ហានៃការខួងរកឧស្ម័នរបស់តួកគីក្នុងដែនទឹកស៊ីប៕ (កែសម្រួលដោយ ៖ បុប្ផា)
ចែករំលែកព័តមាននេះ