រាជធានីភ្នំពេញ ៖ គណៈកម្មការជាតិកីឡាស៊ីហ្គេម (CAMSOC) កាលពីព្រឹក ថ្ងៃទី១៥ កក្កដា នៅវិមានមិត្តភាព បានបើកកិច្ចប្រជុំលើកទី៣របស់ខ្លួន ក្រោមអធិបតីភាពសម្ដេចពិជ័យសេនាទៀបាញ់…
រាជធានីភ្នំពេញ ៖ គណៈកម្មការជាតិកីឡាស៊ីហ្គេម (CAMSOC) កាលពីព្រឹក ថ្ងៃទី១៥ កក្កដា នៅវិមានមិត្តភាព បានបើកកិច្ចប្រជុំលើកទី៣របស់ខ្លួន ក្រោមអធិបតីភាពសម្ដេចពិជ័យសេនាទៀបាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ និងជាប្រធានគណៈកម្មការជាតិកីឡាស៊ីហ្គេម ដើម្បីស្វែងរកគន្លឹះល្អៗ
សម្រាប់ឆ្ពោះទៅស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ។
កិច្ចប្រជុំនេះ គណៈកម្មការជាតិប្រកួតកីឡាស៊ីហ្គេម ធ្វើឡើងរយៈពេល៣ខែម្ដង ធ្វើយ៉ាងណាជំរុញដល់ផែនការប្រកួតកីឡាស៊ីហ្គេមឱ្យកាន់តែទទួលបានជោគជ័យ ។ ជាពិសេសលេខាធិការដ្ឋានដែលមានការិយាល័យទំនាក់ទំនងការងាររដ្ឋបាលកីឡាស៊ីហ្គេមត្រូវចាប់ផ្ដើមដំណើរការពីពេលនេះទៅ ។
សម្ដេចពិជ័យសេនា ទៀ បាញ់ បានផ្ដល់អនុសាសន៍ណែនាំជាច្រើន ជាពិសេសសម្ដេចបានជំរុញឱ្យបើកដំណើរការការិយាល័យលេខាធិការដ្ឋានដែលជាច្រកចេញចូលតែមួយនៃការងាររដ្ឋបាល ហើយចំពោះគណៈ កម្មការជំនាញទាំង១៥ដែលមានការិយាល័យ របស់ខ្លួននៅក្នុងអគារគណៈកម្មាធិការជាតិអូឡាំពិកកម្ពុជា ក៏ត្រូវចាប់ផ្ដើមធ្វើការងាររបស់ខ្លួនចាប់ពីពេលនេះទៅដែរ ដើម្បីបង្ហាញនូវយន្តការដំណើរការនិងប្រសិទ្ធភាពការងារគណៈកម្មការជាតិស៊ីហ្គេមរបស់យើង។
សម្ដេចបានសង្កត់ធ្ងន់ដោយផ្ដោតទៅលើការអភិវឌ្ឍជំនាញជាមួយសហព័ន្ធកីឡាជាតិទាំងអស់ ដូចជាការបញ្ជូនកីឡាករឱ្យទៅហ្វឹកហាត់នៅក្រៅប្រទេស ជាពិសេសត្រូវសហការជាមួយក្រសួងអប់រំ យុវជន និងកីឡា ពិនិត្យមើលកីឡាករ កីឡាការិនីដែលមានទេពកោសល្យ មានឆន្ទៈប្រកួតពិតក្នុងការទៅហ្វឹកហាត់ និងទៅប្រកួតរយៈពេលវែងនៅក្រៅប្រទេស ដែលមាន ចិន ជប៉ុន កូរ៉េ ឬក៏អឺរ៉ុបជាដើម ។ ជាមួយគ្នានេះដែរក៏មានការអនុវត្តតាមការសម្រេចរបស់សម្ដេចតេជោនាយករដ្ឋមន្ត្រី ហ៊ុន សែន ក្រោយពីការប្រកួតកីឡាស៊ីហ្គេមរួចរយៈពេល២សប្ដាហ៍ឬក៏១ខែដោយនៅមិនទាន់កំណត់ច្បាស់ និងត្រូវប្រើប្រាស់ធនធានទាំងអស់របស់គណៈកម្មការកីឡាស៊ីហ្គេមឱ្យមកបម្រើការងារអាស៊ានប៉ារ៉ាហ្គេមតែម្ដង ។
សម្ដេចយកចិត្តទុកដាក់ជាងគេគឺការធ្វើឱ្យមានប្រសិទ្ធភាពផ្នែកហិរញ្ញវត្ថុធ្វើយ៉ាងណាឱ្យមានតម្លាភាព គណនេយ្យភាព និងសុចរិតភាពក្នុងកាប្រើប្រាស់ហិរញ្ញវត្ថុរបស់ជាតិ ក្នុងសកម្មភាពជំរុញនិងអភិវឌ្ឍន៍វិស័យកីឡាជាតិ៕ (កែសម្រួលដោយ ៖ បុប្ផា)
ចែករំលែកព័តមាននេះ