ខេត្តសៀមរាប ៖ លោកស្នងការនគរបាលខេត្តសៀមរាបដាក់បទបញ្ជាមិនឲ្យយករថយន្តស្លាកលេខនគរបាល ទៅប្រើប្រាស់ក្នុងវិស័យឯកជន ថ្លែងក្នុងកិច្ចប្រជុំផ្សព្វផ្សាយសេចក្តីណែនាំលេខ០១៩ របស់ក្រសួងមហាផ្ទៃ នារសៀលថ្ងៃទី១៥ ខែកក្កដានេះ ។ លោកឧត្តមសេនីយ៍ទោ…
ខេត្តសៀមរាប ៖ លោកស្នងការនគរបាលខេត្តសៀមរាបដាក់បទបញ្ជាមិនឲ្យយករថយន្តស្លាកលេខនគរបាល ទៅប្រើប្រាស់ក្នុងវិស័យឯកជន ថ្លែងក្នុងកិច្ចប្រជុំផ្សព្វផ្សាយសេចក្តីណែនាំលេខ០១៩ របស់ក្រសួងមហាផ្ទៃ នារសៀលថ្ងៃទី១៥ ខែកក្កដានេះ ។
លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាបបានដាក់បទបញ្ជាដល់កម្លាំងនគរបាលទាំងអស់ មិនត្រូវយករថយន្តស្លាកនគរបាលទៅប្រើប្រាស់ក្នុងវិស័យឯកជន ឬឲ្យជនបរទេសប្រើប្រាស់រថយន្តស្លាកលេខរដ្ឋជាដាច់ខាត ជាពិសេសកងកម្លាំងនគរបាល និងអាវុធមិនត្រូវឲ្យមានការចេញទៅការពារតាមក្លឹបកម្សាន្ត ខារ៉ាអូខេ ឬ ការពារវិស័យឯកជន ដែលផ្ទុយពីសេចក្តីណែនាំជាដាច់ខាត ។
ក្នុងឱកាសនោះដែរលោកស្នងការនគរបាលខេត្តបានក្រើនរំលឹកដល់ថ្នាក់ដឹកនាំទាំងអស់ត្រូវបង្កើនការគ្រប់គ្រងការដឹកនាំ និងការចាត់ចែងកងកម្លាំងក្រោមឱវាទឲ្យបានល្អក្នុងការបំពេញភារកិច្ចស្នូលរបស់ខ្លួន ដោយអនុវត្តន៍តាមអនុសាសន៍អភិក្រមទាំង៥ ចំណុចរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺ១- ឆ្លុះកញ្ចក់ ២- ងូតទឹក ៣- ដុសក្អែល ៤-ព្យាបាល ៥- វះកាត់ ជាពិសេសកម្លាំងនគរបាលទាំងអស់ត្រូវបង្កើនការយកចិត្តទុកដាក់បន្ថែមទៀត ក្នុងការបង្ការទប់ស្កាត់ និងបង្ក្រាបបទល្មើសគ្រប់ប្រភេទ សំដៅរក្សាការពារធានាសន្តិសុខ សុវត្ថិភាព និងសណ្តាប់ធ្នាប់សង្គម ជូនប្រជាពលរដ្ឋឲ្យកាន់តែប្រសើរឡើងថែមទៀត ៕ កែសម្រួលដោយ ៖ សុឃាក់
ចែករំលែកព័តមាននេះ