ខេត្តសៀមរាប ៖ សេចក្តីរាយការណ៍បឋម នេះបើតាមសម្តីរបស់លោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំបានឲ្យដឹងថា កាលពីវេលាម៉ោង២០និង៤០នាទីយប់នាថ្ងៃទី១៥ ខែកក្កដានេះ មានអគ្គិភ័យមួយបានកើតឡើងនៅវត្តវេឡុវ័នដោកពោយគោកក្រោល ស្ថិតក្នុងឃុំជ្រោយនាងងួន ស្រុកស្រីស្នំ ខេត្តសៀមរាប ឆេះកុដិ០១ខ្នង អស់ទាំងស្រុង ។
កុដិខាងលើមានទំហំ១២ម៉ែត្រគុណនឹង៩ម៉ែត្រធ្វើអំពីឈើប្រក់ក្បឿង ជញ្ជាំងក្ដារ បណ្ដាលឲ្យខូចខាតរថយន្ត០១គ្រឿង រទេះគោសម្រាប់ទុកតាំងលំអ១០គ្រឿង ងាប់កូនឆ្កែចំនួន០៦ក្បាល ឆេះគម្ពីរព្រះត្រ័យបិដក១០០ក្បាល (1995) អដ្ខកថាមួយចប់ គម្ពីរស្លឹករឹត ស្បង់ចីពរ ព្រមទាំងសម្ភារមួយចំនួនទៀត ហើយបានរលត់ទៅវិញម៉ោង២២និង០០នាទី។
លោកវរសេនីយ៍ឯក អ៊ុន ស្រស់ បានឲ្យដឹងទៀតថា ទោះបីជាបានចេញរថយន្តពន្លត់អគ្គិភ័យរបស់អធិការស្រុកចំនួន០១គ្រឿង ជួយអន្តរាគមន៍ប្រើទឹកអស់២ឡានក៏ដោយ ក៏មិនអាចសង្គ្រោះបានដែរ ហើយមូលហេតុនៃអគ្គិភ័យឆេះនេះ គឺបណ្ដាលមកពីភ្លើងទៀនដែលព្រះសង្ឃអុជថ្វាយបង្គំព្រះជាប្រចាំ ប៉ុន្តែពុំបណ្តាលឲ្យរងគ្រោះថ្នាក់ដល់មនុស្សឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ