ប្រទេសសូម៉ាលី ៖ មនុស្សយ៉ាងតិច២៦នាក់បានត្រូវស្លាប់និង៥៦នាក់រងរបួស ក្នុងការវាយប្រហាររបស់ពួកសកម្មប្រយុទ្ធអ៊ិស្លាមនិយម ក្រុមSHEBAB ប្រឆាំងសណ្ឋាគារមួយនៅទីក្រុងកំពង់ផែគីស្មាយ៉ូភាគខាងត្បូងសូម៉ាលី។
ក្នុងចំណោមជនរងគ្រោះមានជនបរទេសច្រើននាក់និងអ្នកកាសែតម្នាក់ជនជាតិកាណាដា-សូម៉ាលី ដែលការស្លាប់របស់ពួកគេនាំឲ្យមានការក្ដុកក្ដួលយ៉ាងខ្លាំង។ ការវាយប្រហារចាប់ផ្ដើមពីចុងរសៀល ថ្ងៃទី១២កក្កដាមក ក្រោយពេលមានការបំផ្ទុះរថយន្តមួយគ្រឿង នៅត្រង់ច្រកចូលសណ្ឋាគារMEDINA ជាសណ្ឋាគារពេញនិយមមួយ ស្ថិតក្នុងភាគកណ្ដាលក្រុងគីស្មាយ៉ូ។
យោងតាមប្រភពព័ត៌មានសន្តិសុខថា បណ្ដាជនប្រដាប់អាវុធក្រោយពីការបំផ្ទុះរថយន្ត បានលុកចូលក្នុងអគារហើយក៏ផ្ទុះការប្រយុទ្ធគ្នាជាមួយកងកម្លាំងសន្តិសុខ។ ក្រុមSHEBABប្រកាសទទួលខុសត្រូវចំពោះការវាយប្រហារនោះ។
ក្នុងសន្និសីទសារព័ត៌មានមួយលោកAHMED MADOBE ប្រធានាធិបតីនៃតំបន់ពាក់កណ្ដាលស្វយ័តJUBALANDថ្លែងថា មនុស្ស២៦នាក់បានត្រូវស្លាប់ក្នុងការវាយប្រហារហើយមនុស្ស៥៦នាក់រងរបួស។ ក្នុងចំណោមអ្នកស្លាប់មានជនបរទេសច្រើននាក់ ក្នុងនោះមានជនជាតិកេនយ៉ា៣នាក់ កាណាដាម្នាក់ អង់គ្លេសម្នាក់ អាមេរិក២នាក់និងតង់ហ្សានី៣នាក់។ ចំណែកជនជាតិចិន២នាក់រងរបួស។
សណ្ឋាគារនោះត្រូវកងកម្លាំងសន្តិសុខឡោមព័ទ្ធជិត១២ម៉ោង មុនពេលកម្ទេចពួកអ្នកវាយប្រហារអស់។ អ្នកទទួលខុសត្រូវមូលដ្ឋានម្នាក់និយាយថា មានជនប្រដាប់អាវុធ៤នាក់ចូលរួមក្នុងការវាយប្រហារនេះ។ តាមសាក្សីទាំងឡាយថា សណ្ឋាគារនោះរងការបំផ្លាញធ្ងន់ធ្ងរដោយសារការបំផ្ទុះរថយន្ត។ អគារត្រូវបាក់ហើយបណ្ដាសាកសពមនុស្សនិងអ្នករបួស ត្រូវប្រមូលយកចេញពីខាងក្នុង។ តាមប្រភពជាច្រើនថាសណ្ឋាគារនេះនិយមស្នាក់ ដោយពួកពាណិជ្ជករនិងបណ្ដាអ្នកនយោបាយ ដែលមកកាន់ទីក្រុងនេះ ដើម្បីរៀបចំការបោះឆ្នោតប្រធានាធិបតីនៅJUBALAND៕ (កែសម្រួលដោយ ៖ បុប្ផា)
ចែករំលែកព័តមាននេះ