អ្នកលក់ស្មៅគោត្អូញត្អែរថា លក់មិនដាច់ (មានវីដេអូ)

ថ្ងៃទី ១១ ខែ កក្កដា ឆ្នាំ ២០១៩

ម៉ោង ១៧:២៥

រាជធានីភ្នំពេញ ៖ ប្រជាពលរដ្ឋ៥ទៅ៦គ្រួសារបានប្រកបរបរលក់ស្មៅសម្រាប់ឱ្យសត្វគោស៊ី ហើយមុខរបរមួយនេះវាអាចជួយសម្រាលជីវភាពនៅក្នុងគ្រួសារមួយចំណែកផងដែរ ប៉ុន្តែរហូតមកដល់បច្ចុប្បន្ននេះ អ្នកលក់ស្មៅគោបានត្អូញត្អែរថាលក់មិនដាច់។

លោក កន រ៉ន ជាអ្នកលក់ស្មៅគោ ដែលមានទីលំនៅភូមិព្រែថី ឃុំរការខ្ពស់ ស្រុកស្អាង ខេត្តកណ្តាល បានរៀបរាប់ប្រាប់ឣោយដឹងថា គាត់បានមកលក់ស្មៅនៅចំណុចផ្លូវជាតិលេខ២ ស្ថិតនៅភូមិព្រែកអាទាំង សង្កាត់ព្រែកកំពឹស ខណ្ឌដង្កោ រាជធានីភ្នំពេញ នេះមានដូចជា ស្មៅគោ ត្រកួន និងដើមពោត សម្រាប់ផ្គត់ផ្គង់តម្រូវរបស់អតិថិជន ហើយក្នុងមួយបាច់លក់ក្នុងតម្លៃ១.០០០រៀលទៅ១.៥០០រៀល។

លោកបានបន្តថា គាត់មានម៉ូយ៥ទៅ៦នាក់មកទិញរាល់ថ្ងៃយកទៅឲ្យសត្វស៊ីនៅតាមរមណីយដ្ឋាននិងកសិដ្ឋានចិញ្ចឹមគោ-គោបា។ លោកបានបន្តទៀតថា ការលក់ស្មៅគោ សព្វថ្ងៃនេះបានត្រឹមតែ១ពាន់បាច់ទេ ពេលខ្លះលក់មិនអស់ក៍មានដែរ ហើយពេលខ្លះដាក់លក់ឡៃឡុងឲ្យតែអស់ទៅជាជាងខូចចោល។ ការលក់នៅក្នុងមួយថ្ងៃអាចរកចំណូលបាន១លានរៀលទាំងប្រាក់ដើម បើសិនទូទាត់ទាំងដើមទាំងចុងទាំងថ្លៃស៊ីចាយសោរហ៊ុយប្រេងសាំងអស់ទៅ នៅសល់ប្រហែល៧ទៅ៨ម៉ឺនរៀលដែរ។

អ្នកស្រី ឆេង វូចលីម ហៅស្រី.ស ជាអ្នកលក់ស្មៅ រស់នៅលើកំណាត់ផ្លូវជាតិលេខ២ ស្ថិតនៅ ភូមិព្រែកអាទាំង សង្កាត់ព្រែកកំពឺស ខណ្ឌដង្កោ រាជធានីភ្នំពេញ បានឲ្យដឹងថា គាត់បានប្រកបរបរលក់ស្មៅគោនេះជាង១០ឆ្នាំមកហើយ ដោយបើករថយន្តប្រមូលទិញពីអ្នកភូមិព្រែកថីខ្លះ និងអ្នកស្ទឹងមានជ័យខ្លះ ដោយទិញចូលក្នុងមួយបាច់តម្លៃ៧ទៅ៨រយរៀល ហើយលក់ចេញក្នុងមួយបាច់ពី១ពាន់រៀលទៅ១ពាន់ប្រាំរយរៀល។

អ្នកស្រីបន្តថា កាលពីឆ្នាំមុនស្មៅនេះលក់ដាច់ណាស់ច្រូតសឹងមិនទាន់ នៅក្នុងមួយថ្ងៃៗអស់ពី២ទៅ៣រថយន្តផងដែរ ដោយឡែកក្នុងឆ្នាំ២០១៩មានកាប្រែប្រួល គឺអតិថិជនមានការថយចុះលក់មិនដាច់ ពេលខ្លះយកស្មៅមួយឡានមកលក់មិនអស់ផង។

សូមបញ្ជាក់ថា ពួកគាត់បានប្រមូលទិញស្មៅគោពីពលរដ្ឋនៅឃុំរការខ្ពស់ និងខណ្ឌស្ទឹងមានជ័យ ដែលប្រជាពលរដ្ឋនៅទីនោះបានច្រូតនៅតាមចំការ លើប្រឡាយរួចជាស្រេចសម្រាប់ទុកលក់ ដោយបច្ចុប្បន្នមានកាប្រែប្រួល និងថយចុះនូវអតិថិជន និងបានធ្វើឲ្យប្រជាពលរដ្ឋជាអ្នកលក់ស្មៅមានការព្រួយបារម្ភ ហើយក៏អាចប្រឈមនឹងការបិទមុខរបរនេះចោលផងដែរ៕ (កែសម្រួលដោយ ៖ ធីតា)