ខេត្តសៀមរាប ៖ នៅទីបំផុត លោកវរសេនីយ៍ត្រី គិន នឿង នាយប៉ុស្តិ៍នគរបាលរដ្ឋបាលព្រៃជ្រូក ត្រូវបានផ្អាកការងារជាបណ្តោះអាសន្ន តាមលិខិតបង្គាប់ការរបស់លោកឧត្តមសេនីយ៍ទោ ហួត…
ខេត្តសៀមរាប ៖ នៅទីបំផុត លោកវរសេនីយ៍ត្រី គិន នឿង នាយប៉ុស្តិ៍នគរបាលរដ្ឋបាលព្រៃជ្រូក ត្រូវបានផ្អាកការងារជាបណ្តោះអាសន្ន តាមលិខិតបង្គាប់ការរបស់លោកឧត្តមសេនីយ៍ទោ ហួត សុធី ស្នងការនគរបាលខេត្ត ចុះថ្ងៃទី២៤ ខែមីនា ឆ្នាំ២០២៦ ។ សូមរំលឹកថា ៖ ថ្លើ.មធំមែន ! ថ្នាក់លើអ្នកចាប់ ថ្នាក់ក្រោមដោះលែង មិនខុសពីពាក្យថា មានប្រាក់ទិញយក្សប្រើទេ
លិខិតបង្គាប់ការរបស់លោកស្នងការនគរបាលខេត្ត បានសម្រេចអនុវត្តវិន័យចំពោះលោកវរ សេនីយ៍ត្រី គិន នឿង អត្តលេខ ២៩៩៥៥ ឋានៈនាយប៉ុស្តិ៍នគរបាលរដ្ឋបាលព្រៃជ្រូកនៃអធិ ការដ្ឋាននគរបាលស្រុកពួក ដោយរូបភាពផ្អាកការងារបណ្តោះអាសន្ន និងមកបង្ហាញមុខនៅអធិការដ្ឋាននគរបាលស្រុកពួក ចាប់ពីថ្ងៃទី២៤ ខែមីនា ឆ្នាំ២០២៦ នៃការចុះហត្ថលេខានេះតទៅ មូលហេតុល្មើសបទវិន័យកងកម្លាំងនគរបាលជាតិកម្ពុជា ។
សូមជម្រាបថា លោកវរសេនីយ៍ទោ គិន នឿង នាយប៉ុស្តិ៍នគរបាលឃុំព្រៃជ្រូក ស្រុកពួក បានរងការរិះគន់ជុំវិញការដោះលែងមេល្បែងអាប៉ោងម្នាក់ ឈ្មោះ សៀង ដោយមិនខ្លាចញញើត និងផ្គើននឹងថ្នាក់លើ បន្ទាប់ពីអាជ្ញាធរស្រុកពួក បានដឹកនាំការចុះបង្ក្រាបល្បែងអាប៉ោងកាលពីពេលថ្មីៗនេះ ។
យោងតាមប្រភពព័ត៌មានបានរាយការណ៍ថា អភិបាលរងស្រុកពួកមួយរូប បានដឹកនាំការចុះបង្ក្រាបល្បែងអាប៉ោង ដែលមានឈ្មោះ សៀង ជាមេខ្លោង សរុបមានគ្នាចំនួន៧នាក់ ប្រគល់ឱ្យប៉ុស្តិ៍នគរបាលឃុំព្រៃជ្រូក ដើម្បីអនុវត្តតាមនីតិវិធី ។ ប៉ុន្តែក្រោយមកស្រាប់តែបាត់ឈ្មោះ សៀង ដែលជាមេខ្លោង នៅសល់តែមនុស្ស៦នាក់ ប៉ុណ្ណោះ មុនបញ្ជូនទៅកាន់អធិការដ្ឋាន ។
បើតាមប្រភពពីអ្នកភូមិថា ករណីនេះនគរបាលឃុំព្រៃជ្រូក ជាពិសេសលោកវរសេនីយ៍ទោ គិន នឿង នាយប៉ុស្តិ៍អាចមានចេតនាដោះលែងមេអាប៉ោងឈ្មោះ សៀង ឱ្យរត់គេចខ្លួន មុនបញ្ជូនទៅអធិការដ្ឋាន ។
ជុំវិញករណីនេះ អភិបាលស្រុកពួក លោកស៊ិន ចាន់ថុល បានប្រាប់អ្នកយកព័ត៌មានថា កាលពីខែកុម្ភៈ ឆ្នាំ២០២៦ លោកបានចាត់ឱ្យអភិបាលរងស្រុកមួយរូប ដឹកនាំកម្លាំងសមត្ថកិច្ចទៅបង្ក្រាប ហើយបាននាំយកមកធ្វើការអប់រំនៅប៉ុស្តិ៍នគរបាលឃុំព្រៃជ្រូក ប៉ុន្តែពួកគេមិនរាងចាល នៅតែលេងបន្តទៀត ។ លុះប៉ុន្មានថ្ងៃមុននេះ លោកបានដឹកនាំកម្លាំងសមត្ថកិច្ចទៅបង្ក្រាបផ្ទាល់ ក៏ប៉ុន្តែអ្នកមើលផ្លូវឱ្យក្រុមលេងល្បែង ស្គាល់រថយន្តរបស់លោក ក៏រាយការណ៍ប្រាប់អ្នកលេងល្បែងរត់គេចអស់ ។
លុះនៅពេលយប់ លោកបានចាត់ឱ្យលោកអភិបាលរងស្រុកដឹកនាំកម្លាំងសមត្ថកិច្ចទៅម្ដងទៀត ក៏ចាប់បាន៧នាក់ប្រគល់ឱ្យទៅប៉ុស្តិ៍នគរបាលឃុំព្រៃជ្រូក ខណៈនោះស្រាប់តែបាត់មេខ្លោងឈ្មោះ សៀង ដែលមេប៉ុស្តិ៍ឱ្យគេចខ្លួន ៕
ចែករំលែកព័តមាននេះ