រាជធានីភ្នំពេញ ៖ ឃាតករ ដែលជាអតីតប្ដីបាញ់ និងវាយសម្លាប់ប្រពន្ធជាម្ចាស់ហាងសាឡន «ម៉ា មី» នៅខណ្ឌពោធិ៍សែនជ័យ កាលពី៣ថ្ងៃមុននោះ ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល…
រាជធានីភ្នំពេញ ៖ ឃាតករ ដែលជាអតីតប្ដីបាញ់ និងវាយសម្លាប់ប្រពន្ធជាម្ចាស់ហាងសាឡន «ម៉ា មី» នៅខណ្ឌពោធិ៍សែនជ័យ កាលពី៣ថ្ងៃមុននោះ ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល កម្លាំងនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ កម្លាំងអធិការដ្ឋាននគរបាលខណ្ឌពោធិ៍សែនជ័យ កម្លាំងប៉ុស្តិ៍នគរបាលរដ្ឋបាលចោមចៅទី១ សហការជាមួយកម្លាំងស្នងការដ្ឋាននគរបាលខេត្តកំពង់ចាម និងកម្លាំងនគរបាល នៃអធិការដ្ឋានស្រុកកំពង់សៀម ខេត្តកំពង់ចាម ធ្វើការឃាត់ខ្លួនបានហើយ ។
ការឃាត់ខ្លួននោះបានធ្វើឡើងកាលពីវេលាម៉ោង១០ព្រឹកថ្ងៃទី១៥ ខែមេសា ឆ្នាំ២០២៦ ជាថ្ងៃ នៃពិធីបុណ្យចូលឆ្នាំទី២ ខណៈជនដៃដល់រូបនេះ រត់គេចទៅសម្ងំលាក់ខ្លួននៅក្នុងព្រៃមួយកន្លែង ស្ថិតនៅក្នុងភូមិត្រើង ឃុំមៀន ស្រុកព្រៃឈរ ខេត្តកំពង់ចាម ខេត្តកំពង់ចាម ។ បន្ទាប់មកនគរបាលបានសម្រេចបញ្ជូនខ្លួនឃាតកររូបនោះទៅកាន់ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញដើម្បីចាត់ការតាមច្បាប់ ។
ខ្មានកាំភ្លើងខាងលើឈ្មោះ ធូក ជី អាយុ៣៩ឆ្នាំ មានទីលំនៅភូមិព្រើង ឃុំបៀន ស្រុកព្រៃឈរ ខេត្តកំពង់ចាម ហើយនគរបាលពុំទាន់ប្រាប់ឲ្យដឹងលម្អិតអំពីចម្លើយសារភាពរបស់ជនដៃដល់ រូបនោះនៅឡើយទេ ព្រោះទើបតែចាប់បាននិងកំពុងស្ថិតនៅក្នុងការសាកសួរនៅឡើយ ។
ចំណែកស្ត្រីរងគ្រោះ ជាអតីតប្រពន្ធ ដែលរងការបាញ់ប្រហារ និងវាយសម្លាប់នោះ មានឈ្មោះ ជុន តឿ អាយុ២២ឆ្នាំ មុខរបរម្ចាស់ហាងសាឡន «ម៉ា មី» មានទីតាំងស្ថិតនៅក្នុងផ្សារទួលពង្រ ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។ នាងមានទីលំនៅអចិន្ត្រៃយ៍នៅភូមិមាក់កណ្ដាល ឃុំស្រែចារ ស្រុកស្នួល ខេត្តក្រចេះ ហើយអ្នកទាំងបានលែងលះគ្នា២ខែមកហើយ ក្រោយមកជនដៃដល់ បានសុំត្រូវរ៉ូវ និងរួមរស់នៅជាមួយគ្នាវិញ ប៉ុន្តែនាងមិនព្រម ទើបត្រូវអតីតប្ដីកំណាចរូបនេះបាញ់ និងវាយសម្លាប់តែម្ដង ហើយនាងបានស្លាប់បាត់បង់ជីវិតនៅក្នុងមន្ទីរពេទ្យព្រះកុសុមៈ នៅក្រោយពេលកើតហេតុតែប៉ុន្មានម៉ោងប៉ុណ្ណោះ ។
សូមរម្លឹកថា ហេតុការណ៍នោះបានកើតឡើងកាលពីវេលាម៉ោងជាង៣រសៀលថ្ងៃទី១២ ខែមេសា ឆ្នាំ២០២៦ នៅក្នុងហាងសាឡនយីហោ«ម៉ា មី» និងតាមវាយបន្ថែមដល់ក្នុងហាងកាត់សក់យីហា «BORIN» នៅទល់មុខគ្នានោះ ដែលមានទីតាំងស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញនោះ ។
យោងតាមរូបភាពវីដេអូកាមេរ៉ាសុវត្ថិភាព គេបានឃើញឃាតកររូបនោះពាក់អាវយឺតពណ៌លឿង ស្លៀកខោជើងវែងពណ៍ប្រផេះ ពាក់ស្បែកជើងផ្ទាត់ពណ៌ស ដើរចូលទៅក្នុងហាងសាឡន (ម៉ា មី) នោះ ។ បន្ទាប់មកបានប្រើប្រាស់កាំភ្លើងខ្លី១ដើមបាញ់ប្រហារ នារីរងគ្រោះ ១គ្រាប់ ហើយនារីរងគ្រោះ បានរត់ចេញពីហាងសាឡនរបស់នាងចូលទៅកាន់ហាងកាត់សក់មួយនៅកន្លែង ដែលស្ថិតនៅទល់មុខគ្នារំលងតែផ្លូវ១ខ្សែប៉ុណ្ណោះ ដើម្បីឲ្យគេជួយ ពេលនោះ ជនដៃដល់ ក៏បានកាន់កាំភ្លើងខ្លី រត់ដេញតាមពីក្រោយនាងយ៉ាងប្រកៀកប្រកិត ។
កាមេរ៉ាសុវត្ថិភាពដដែល បានបង្ហាញឲ្យឃើញទៀតថា នៅពេលរត់ចូលដល់ក្នុងហាងកាត់សក់នោះ ជនដៃដល់បានចាប់ផ្ដួលនាងរងគ្រោះរួចវាយក្បាល ចំនួនប្រមាណ១៦ស្នាប់កាំភ្លើងខ្លីបន្ថែមទៀត បណ្ដាលឲ្យនាងដួលដេកនៅក្នុងថ្លុកឈាមគួរឲ្យរន្ធត់ ។ បន្ទាប់មកទៀត ជនជាឃាតករនោះ ក៏បានកាន់កាំភ្លើងខ្លី រត់ចេញពីកន្លែងកើតហេតុបាត់ដោយសុវត្ថិភាព មិនតែប៉ុណ្ណោះនៅក្នុងពេលកើតហេតុនោះ ក៏មិនស្ងាត់ឡើយ ទីនោះក៏មានមនុស្សអ៊ូអរដែរ ប៉ុន្តែនៅពេលឮស្នូរផ្ទុះអាវុធភ្លាម ទាំងអ្នកដែលទៅធ្វើសាឡន និងអ្នកដែលទៅកាត់សក់ ហើយកំពុងអង្គុយកាត់សក់មិនទាន់កាត់រួចផង រួមទាំងជាងកាត់សក់ផងដែរ បាននាំគ្នារត់ចែកជើងគ្នា ប្រសាចទាំងព្រលឹងចុងសក់ គ្មាននរណាហ៊ានចូលទៅជួយនារីរងគ្រោះនោះឡើយ ។
ទោះបីជាបែបណានេះ គ្រាន់តែជាការប្រាប់ឲ្យដឹងពីប្រភពព័ត៌មាននានា រួមទាំងរូបភាពនៅក្នុងកាមេរ៉ាសុវត្ថិភាពដែលបំពាក់នៅកន្លែងកើតហេតុតែប៉ុណ្ណោះ ចំណែកឯការពិតច្បាស់ជាងនេះបែបណានោះ នឹងរង់ចាំលទ្ធផល នៃការស៊ើបអង្កេតរបស់សមត្ថកិច្ចបន្តទៀតសិន ។
ក្រោយពេលកើតហេតុ នគរបាលការិយាល័យបច្ចេកទេស និងវិទ្យាសាស្ត្រ នៃស្នងការដ្ឋានរាជធានីភ្នំពេញ រួមជាមួយសមត្ថកិច្ចមូលដ្ឋាន និងលោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យអយ្យការអមសាលាដំបូងរាជធានីភ្នំពេញបានធ្វើការពិនិត្យកោសល្យវិច័យសាកសព ហើយបានរកឃើញមានស្នាមត្រូវគ្រាប់កាំភ្លើង ១គ្រាប់ ចូលពីថ្ពាល់ខាងស្ដាំ ទៅធ្លាយចេញទៅ ក ចំហៀងខាងឆ្វេង និងត្រូវបានឃាតកររូបនោះវាយក្បាលរងរបួសចំនួន១៧កន្លែង បែកលលាដ៍ក្បាល ហើយជនរងគ្រោះបានស្លាប់ដោយត្រូវគ្រាប់កាំភ្លើង និងវាយក្បាលជាករណី ឃាតកម្ម ៕
ចែករំលែកព័តមាននេះ