ទីក្រុងហ្សឺណែវ៖ អង្គការសុខភាពពិភពលោកថ្លែងថាមនុស្ស៩០៦នាក់ស្ថិតនៅក្នុងស្ថានភាពសង្ស័យថាប្រហែលជាបានឆ្លងមេរោគអេបូឡាសន្តានថ្មីនៅសាធារណរដ្ឋប្រជាធិបតេយ្យកុងហ្គោ។ នៅក្នុងចំណោមនោះ អ្នកជំងឺ២២៣នាក់បានស្លាប់ហើយ ហើយកំពុងស្ថិតនៅក្នុងការស៊ើបអង្កេតរកការពិត។ ការផ្ទុះឡើងនូវមេរោគអេបូឡាសន្តានថ្មីឈ្មោះប៊ុនឌីបាក់យ៉ូ (Bundibugyo) កំពុងរីកសាយភាយនៅកុងហ្គោ។ នៅប្រទេសអ៊ូហ្កង់ដាដែលមានព្រំដែនជាប់នឹងកុងហ្គោក៏មានអ្នកឆ្លងជំងឺនេះផងដែរ។
សម្រាប់ពេលបច្ចុប្បន្ននេះ មានភស្តុតាងបញ្ជាក់ច្បាស់លាស់ថានៅកុងហ្គោមានអ្នកឆ្លងជំងឺអេបូឡា១២៥នាក់។ ក្នុងនោះ ១៧នាក់ស្លាប់នៅអ៊ីធូរី (Ituri), គីវូខាងជើង (North Kivu) និងគីវូខាងត្បូង (South Kivu)។ នៅអ៊ូហ្កង់ដា អាជ្ញាធរសុខាភិបាលក៏បញ្ជាក់ផងដែរថាមានអ្នកឆ្លងជំងឺនេះចំនួន៧នាក់។ ក្នុងនោះ ៣នាក់ឆ្លងពីកុងហ្គោ និងម្នាក់បានស្លាប់ហើយ។ ទោះជាយ៉ាងណាក្ដី គេមិនទាន់ទទួលបានរបាយការណ៍ថាមានករណីឆ្លងជាលក្ខណៈសហគមន៍នៅឡើយទេ។ នេះបើយោងតាមការអះអាងរបស់អង្គការសុខភាពពិភពលោក។
នៅដំណាក់កាលចុងក្រោយ ក្រសួងសុខាភិបាលអ៊ូហ្កង់ដាប្រកាសថាខ្លួនរកឃើញអ្នកឆ្លងកើនឡើងដល់៩នាក់។ អង្គការសុខភាពពិភពលោកថ្លែងកាលពីដើមខែឧសភាថាការផ្ទុះឡើងដំបូងនៃជំងឺអេបូឡានៅកុងហ្គោទំនងជាចាប់ផ្ដើមតាំងពីពីរខែមុនមកម៉្លេះ។ ការផ្ទុះឡើងនូវមេរោគអេបូឡាសន្ដានប៊ុនឌីបាក់យ៉ូនេះត្រូវអង្គការសុខភាពពិភពលោកប្រកាសថាជាគ្រោះអាសន្នសម្រាប់សុខភាពសាធារណៈជាអន្តរជាតិ។ មេរោគនេះគ្មានវ៉ាក់សាំងសម្រាប់ទប់ស្កាត់ទេ។ សូម្បីក្រុមអ្នកជំនាញក៏ភ្ញាក់ផ្អើលផងដែរព្រោះវាឆ្លងចូលទៅក្នុងខ្លួនមនុស្សរយៈពេលយូរ ហើយនៅតែសម្ងំលាក់ខ្លួនបានល្អណាស់។ គេមិនអាចដឹងថានរណាម្នាក់ឆ្លងមេរោគនេះឡើយរហូតដល់សឹងតែហួសពេលទៅហើយទើបចេញរោគសញ្ញា។
អត្រាមរណភាពនៅក្នុងចំណោមអ្នកជំងឺដែលឆ្លងមេរោគនេះគឺ៣០%-៥០%។ នេះបើយោងតាមមន្ត្រីជំនាញរបស់អង្គការសុខភាពពិភពលោក។ នេះជាអត្រាខ្ពស់ណាស់។ មានន័យថានៅក្នុងចំណោមអ្នកឆ្លងជំងឺនេះ១០នាក់ លទ្ធភាពស្លាប់អាចមានរហូតដល់ទៅ៥នាក់ឯណោះ។ នេះជាទិន្នន័យបឋមតែប៉ុណ្ណោះ ហើយត្រូវការការស៊ើបអង្កេតបន្ថែមទៀត។ ការមើលថែទាំសុខភាពពីដំបូងដៃអាចនឹងជួយកាត់បន្ថយអត្រាមរណភាព។ អ្នកជំងឺអេបូឡាដែលបានជាសះស្បើយដំបូងគេបានចាកចេញពីមន្ទីរពេទ្យនៃប្រទេសកុងហ្គោបន្ទាប់ពីគាត់ឆ្លងកាត់ការធ្វើតេស្ត២ដង លទ្ធផលអវិជ្ជមានទាំង២ដង៕ ប្រភព៖ Reuters
ចែករំលែកព័តមាននេះ