ទីក្រុងវ៉ាស៊ីនតោន៖ មេបញ្ជាការកងទ័ពកំពូលដែលមើលការខុសត្រូវលើទាហានប្រចាំការនៅតំបន់អាមេរិកឡាទីនមានកិច្ចជំនួបដ៏កម្រមួយកាលពីយប់មិញជាមួយមន្ត្រីយោធាជាន់ខ្ពស់របស់គុយបានៅបរិវេណមូលដ្ឋានកងទ័ពជើងទឹកអាមេរិកប្រចាំច្រកសមុទ្រក្វានតាណាម៉ូ (Guantanamo Bay) នៃប្រទេសគុយបា។ នេះបើយោងតាមការបង្ហើបឱ្យដឹងពីទាហានអាមេរិក។ ក្វានតាណាម៉ូជាទឹកដីរបស់គុយបា ហើយត្រូវអាមេរិកជួលធ្វើជាមូលដ្ឋានទ័ព។ ឧត្ដមសេនីយ៍យោធាអាមេរិក លោកហ្វ្រានស៊ីស ដូណូវ៉ាន់ (Francis Donovan) ជាមេបញ្ជាការកងប្រតិបត្តិការសឹកខាងត្បូងបានជួបគ្នារយៈពេលខ្លីជាលក្ខណៈកញ្ឆក់កណ្ដៀត។ លោកបានពិភាក្សាគ្នាអំពីបញ្ហាសន្តិសុខជាមួយគណៈប្រតិភូគុយបា។
លោកដូណូវ៉ាន់ក៏បានដឹកនាំការត្រួតពិនិត្យ និងវាយតម្លៃអំពីស្ថានការណ៍សន្តិសុខនៃមូលដ្ឋានកងទ័ពអាមេរិកនៅទីនោះ និងពិភាក្សាអំពីការការពារកងកម្លាំងរបស់ខ្លួន, ការធានាសុវត្ថិភាពជូនចំពោះយោធិនដែលបំពេញភារកិច្ចនៅទីនោះ និងក្រុមគ្រួសាររបស់ពួកគេ ព្រមទាំងការត្រៀមលក្ខណៈចេញប្រតិបត្តិការសឹកផងដែរ។ កិច្ចជំនួបរបស់លោកដូណូវ៉ាន់នោះជាករណីដំបូងនៅក្នុងរយៈពេលចុងក្រោយពីសំណាក់មេបញ្ជាការកងប្រតិបត្តិការសឹកខាងត្បូង ហើយកិច្ចជំនួបនេះក៏ធ្វើឡើងចំពេលដែលគេកាន់តែព្រួយបារម្ភថាអាមេរិកអាចនឹងវាយប្រហារប្រទេសកុម្មុយនិស្តគុយបាមួយនេះ។
កងទ័ពគុយបាបានបង្ហោះសារនៅលើហ្វេសប៊ុកថាកិច្ចជំនួបនោះរៀបចំឡើងដោយមានការព្រមព្រៀងគ្នាទៅវិញទៅមក និងថាភាគីទាំង២បានឯកភាពគ្នាថានឹងនៅតែបន្តទំនាក់ទំនងគ្នាទៅថ្ងៃមុខទៀត។ គណៈប្រតិភូទាំង២វាយតម្លៃជាវិជ្ជមានចំពោះការជួបគ្នាលើកនេះដោយផ្ដោតលើបញ្ហាពាក់ព័ន្ធនឹងវិស័យសន្តិសុខនៅក្នុងដែនសមត្ថកិច្ចគ្រប់គ្រងរបស់យោធាអាមេរិក។ គួរកត់សម្គាល់ថាការជួបគ្នាលើកនេះធ្វើឡើងក្រោយការបំពេញទស្សនកិច្ចដ៏កម្ររបស់នាយកភ្នាក់ងារសម្ងាត់ស៊ីអាយអេ (CIA) នៅទីក្រុងឡាហាវ៉ាននៅខែឧសភានេះ។
លោកត្រាំឧស្សាហ៍លើកនិយាយអំពីប្រទេសគុយបានៅពេលនិយាយដល់នយោបាយការបរទេសរបស់លោកនៅអាណត្តិទី២នេះ។ លោកថែមទាំងនិយាយបែបផ្លែផ្កាថានៅពេលរួចដៃពីការធ្វើសង្គ្រាមនៅអ៊ីរ៉ង់ លោកនឹងចាត់ការគុយបាវិញម្ដង។ គុយបាជាសត្រូវធំរបស់អាមេរិកតាំងពីច្រើនទសវត្សរ៍មកហើយ។ ពោលគឺតាំងពីជំនាន់ហ្វ៊ីដែលកាស់ស្ត្រូធ្វើបដិវត្តកាលពីឆ្នាំ១៩៥៩មកម៉្លេះ។ លោកត្រាំទទួលការគាំទ្រខ្លាំងពីសំណាក់ជនជាតិអាមេរិកាំងដើមកំណើតគុយបាដែលមាននិន្នាការដាច់ខាតនិយមប្រឆាំងនឹងរបបដឹកនាំនៅគុយបាសព្វថ្ងៃ។ ពួកគេនិយាយពន្យុះលោកត្រាំឱ្យផ្ដួលរំលំរបបនេះចោល។ រដ្ឋាភិបាលរបស់លោកក៏បន្តដាក់សម្ពាធទៅលើរដ្ឋាភិបាលទីក្រុងឡាហាវ៉ានកាន់តែខ្លាំងឡើងៗផងដែរ៕ ប្រភព៖ Reuters
ចែករំលែកព័តមាននេះ