រាជធានីភ្នំពេញ៖ កាលពីព្រឹកថ្ងៃទី ១៤ ខែមេសា ឆ្នាំ ២០២៦ នេះ ឯកឧត្តម ហេង សួរ រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមក្នុងពិធីក្រុងពលី និងពិធីទទួលទេវតាឆ្នាំថ្មី ឆ្នាំមមី អដ្ឋស័ក ដ៏អធិកអធម ព្រមទាំងរៀបចំតាមគន្លងប្រពៃណីព្រះពុទ្ធសាសនា ប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) នៅបរិវេណរមណីយដ្ឋានប្រវត្តិសាស្ត្រវត្តភ្នំ ដើម្បីបួងសួងសុំសេចក្តីសុខ សិរីសួស្តី និងពរជ័យពីទេវតាឆ្នាំថ្មី។

ការទទួលអំណរសាទរឆ្នាំថ្មី ឆ្នាំនេះ នៅរាជធានីភ្នំពេញ ស.ស.យ.ក. និងរដ្ឋបាលរាជធានីភ្នំពេញ បានរៀបចំ«នគរសង្រ្កាន្ត» ដោយបានបង្កើតកម្មវិធីកម្សាន្តតាមបែបប្រពៃណី និងផ្ទាំងទស្សនីយភាពផ្សេងៗដើម្បីបង្កបរិយាកាសសប្បាយរីករាយជូនប្រជាពលរដ្ឋខ្មែរ និងទាក់ទាញភ្ញៀវទេសចរអន្តរជាតិផងដែរ។ ព្រឹត្តិការណ៍ «នគរសង្ក្រាន្ត»ត្រូវបានរៀបចំឡើងចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦។

ក្នុងឱកាសដ៏មហានក្ខត្តឫក្សនេះ ឯកឧត្តម ហេង សួរ បានបួងសួង និងជូនពរសព្ទសាធុការពរជ័យ វិបុលសុខគ្រប់ប្រការជូនចំពោះថ្នាក់ដឹកនាំជាតិ មន្រ្តីរាជការគ្រប់ក្រសួង ស្ថាប័ន រួមទាំងតំណាងសហគ្រាស 

រោងចក្រ ក្រុមហ៊ុន សមាគម សហជីព កម្មករនិយោជិត និយោជក ព្រមទាំងប្រជាពលរដ្ឋខ្មែរទូទាំងប្រទេស សូមឱ្យជួបតែសេចក្តីសុខចម្រើន និងសិរីសួស្តីជារៀងដរាបតទៅ៕ អត្ថបទសហការ