ថ្នាក់ដឹកនាំខេត្តបន្ទាយមានជ័យស្វាគមន៍គណៈ ប្រតិភូខេត្តដុងថាបជូនពរឆ្នាំថ្មី
- បន្ទាយមានជ័យ
ខេត្តបន្ទាយមានជ័យ ៖ ថ្នាក់ដឹកនាំខេត្តដឹកនាំដោយឯកឧត្តម អ៊ុំ រាត្រី អភិបាលខេត្ត និងឯកឧត្ដម ប្លែក វ៉ារី ប្រធានក្រុមប្រឹក្សាខេត្ត…
ខេត្តបន្ទាយមានជ័យ ៖ ថ្នាក់ដឹកនាំខេត្តដឹកនាំដោយឯកឧត្តម អ៊ុំ រាត្រី អភិបាលខេត្ត និងឯកឧត្ដម ប្លែក វ៉ារី ប្រធានក្រុមប្រឹក្សាខេត្ត កាលពីព្រឹកថ្ងៃទី២៥ ខែមីនា ឆ្នាំ២០២៦កន្លងទៅ បានទទួលបដិសណ្ឋារកិច្ចគណៈប្រតិភូខេត្តដុងថាប នៃសាធារណរដ្ឋសង្គមនិយមវៀតណាម ដឹកនាំដោយឯកឧត្តម ត្រឹន ទួនអាញ អគ្គកុងស៊ុលវៀតណាមប្រចាំខេត្តបាត់ដំបង និងឯកឧត្តម ផាម វ៉ាន់អាន អនុលេខាធិការគណៈកម្មាធិការបក្សខេត្ត និងជាអនុប្រធានគណៈកម្មាធិការប្រជាជនខេត្តដុងថាប រួមនឹងប្រតិភូអមដំណើរ ដែលបានអញ្ជើញមកបំពេញទស្សនកិច្ច និងជូនពរឆ្នាំថ្មីប្រពៃណីជាតិខ្មែរ ដល់ថ្នាក់ដឹកនាំ និងប្រជាជនក្នុងខេត្តបន្ទាយមានជ័យ និងបានប្រារព្ធធ្វើនៅសាលប្រជុំសាលា
ខេត្ត ។
នាឱកាសនោះ ប្រតិភូខេត្តដុងថាបបានជូនពរឯកឧត្តម អ៊ុំ រាត្រី អភិបាលនៃគណៈអភិបាលខេត្ត ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ព្រមទាំងមន្ត្រីរាជការនិងប្រជាជនទូទាំងខេត្តបន្ទាយ មានជ័យ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់នាពេលដ៏ខ្លីខាងមុខ ទទួលបាននូវក្តីសុខសប្បាយ សុខសន្តិភាព នឹងខេត្តកាន់តែមានការរីកចម្រើនទៅមុខជាលំដាប់ ។
ឯកឧត្ដម អ៊ុំ រាត្រី បានលើកឡើងពីទំនាក់ទំនងគ្នាល្អរវាងកម្ពុជា-វៀតណាម ពិសេសខេត្តបន្ទាយមានជ័យ និងខេត្តដុងថាប ដែលផ្សារភ្ជាប់យ៉ាងជិតស្និទ្ធក្នុងគ្រប់កាលៈទេសៈ និងជួយជ្រោមជ្រែងគ្នាទៅវិញទៅមក ដោយឈរលើស្មារតីសាមគ្គីស្អិតរមួត រួមគ្នាជាធ្លុងមួយតស៊ូប្រយុទ្ធ ប្រឈមនឹងបញ្ហា ការលំបាកនានា និងបានឆ្លងកាត់ភ្លើងសង្គ្រាមជាមួយគ្នាតាំងពីដើមរៀងមក ក្នុងការប្រយុទ្ធទល់នឹងសត្រូវរួម ដើម្បីឯករាជ្យភាព សេរីភាព នៃប្រជាជនទាំង២ ។
ឯកឧត្តម ផាម វ៉ាន់អាន អនុលេខាធិការគណៈកម្មាធិការគណបក្សខេត្ត និងជាអនុប្រធានគណៈ កម្មាធិការប្រជាជនខេត្តដុងថាប បានបញ្ជាក់សម្តែងនូវមនោសញ្ចេតនា និងបង្ហាញពីចំណងមិត្តភាពយ៉ាងជិតស្និទ្ធ ស៊ីជម្រៅរវាងខេត្តទាំង២ និងប្តេជ្ញាបន្តរក្សាទំនាក់ទំនងមួយនេះឱ្យនៅស្ថិតស្ថេរយូរអង្វែង ។
ក្នុងនាមប្រទេសទាំងពីរ ជាប្រទេសភូមិផងរបងជាមួយគ្នា ក៏ដូចជាដេីម្បីរឹតចំណងមិត្តភាព មេត្រីភាពរវាងប្រជាជននិងប្រជាជន ក៏ដូចជាប្រទេសទាំង២ ខេត្តដុងថាបក៏នឹងផ្តល់អាហារូបករណ៍ដល់និស្សិតរបស់ខេត្តបន្ទាយមានជ័យ ដើម្បីទៅសិក្សានៅប្រទេសវៀណាម ពាក់ព័ន្ធនឹងវិស័យកសិកម្ម ក៏ដូចជាវិស័យពាក់ព័ន្ធមួយចំនួនទៀត ។
ក្នុងនោះថ្នាក់ដឹកនាំខេត្ត និងប្រជាជនកម្ពុជា បានចងចាំជានិច្ចនូវគំរូវីរភាពដ៏អង់អាចក្លា ហានរបស់វីរយុទ្ធជននៃកងទ័ពទាំងពីរ ដើម្បីបុព្វហេតុជាតិមាតុភូមិ ។ ផ្តើមចេញពីស្មារតីនេះ ចំណងមិត្តភាព សាមគ្គីភាព ដ៏មានសារៈសំខាន់ និងជាសក្ខីភាពខេត្តបន្ទាយមានជ័យ បានសង់ស្តូបមិត្តភាពកម្ពុជា-វៀតណាមមួយកន្លែងស្ថិតនៅសង្កាត់ទឹកថ្លា ក្រុងសិរីសោភ័ណ ដែលបង្ហាញអំពីអត្ថន័យប្រកៀកស្មាគ្នា ជួយគ្នាទៅវិញទៅមក ក្នុងបុព្វហេតុជាតិមាតុភូមិរបស់ខ្លួន និងជាសិលាចារឹកទុកជាប្រវត្ថិសាស្ត្រ ៕
ចែករំលែកព័តមាននេះ