រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នារីម្នាក់ផឹកស្រវឹង គ្រាន់តែបងស្រីធម៌ប្រាប់ថា កុំផឹកច្រើនពេកប្រយ័ត្នស្រវឹងគ្មានអ្នកណាជូនទៅផ្ទះ ហើយសង្ស័យនាងខឹងទើបជិះម៉ូតូកង់បីទៅលោតទឹកសម្លាប់ខ្លួននៅមុខព្រះអង្គដង្កើចំនួន២ដង តែត្រូវបានប្រជាពលរដ្ឋជួយសង្គ្រោះ និងស្រង់មកលើគោកវិញទាន់ពេលវេលា ។…
រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នារីម្នាក់ផឹកស្រវឹង គ្រាន់តែបងស្រីធម៌ប្រាប់ថា កុំផឹកច្រើនពេកប្រយ័ត្នស្រវឹងគ្មានអ្នកណាជូនទៅផ្ទះ ហើយសង្ស័យនាងខឹងទើបជិះម៉ូតូកង់បីទៅលោតទឹកសម្លាប់ខ្លួននៅមុខព្រះអង្គដង្កើចំនួន២ដង តែត្រូវបានប្រជាពលរដ្ឋជួយសង្គ្រោះ និងស្រង់មកលើគោកវិញទាន់ពេលវេលា ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១និង១៥នាទីរំលងអាធ្រាត្រឈានចូលថ្ងៃទី១១ ខែកក្កដា ឆ្នាំ២០១៩ តាមបណ្ដោយផ្លូវព្រះស៊ីសុវត្ថិ ត្រង់ចំណុចមុខព្រះអង្គដង្កើមាត់ទន្លេ ស្ថិតក្នុងសង្កាត់ជ័យជំនះ ខណ្ឌដូនពេញ ។
នារីម្នាក់ខាងលើដែលលោតទឹកសម្លាប់ខ្លួនឈ្មោះ ស្រីនិច អាយុ២១ឆ្នាំ ជាបុគ្គលិកភោជនីយដ្ឋាន ស្នាក់នៅខណ្ឌទួលគោក ។ ចំណែកបងស្រីធម៌ឈ្មោះ អាម៉ី អាយុ២៨ឆ្នាំ ធ្វើការជាមួយគ្នា ។
តាមប្រភពព័ត៌មានពីបងស្រីធម៌បានប្រាប់ឲ្យដឹងថា គាត់ទើបតែស្គាល់នារីរងគ្រោះបានរយៈពេលជិតមួយខែតែប៉ុណ្ណោះ ដោយធ្វើការនៅក្នុងហាងភោជនីយដ្ឋានមួយកន្លែងនៅម្ដុំទួលគោក ។ មុនពេលកើតហេតុ នារីរងគ្រោះបានកំដរភ្ញៀវផឹកស្រាស្រវឹង ហើយគាត់ក៏បានប្រាប់ថា «អូនឯងផឹកកំដរភ្ញៀវអស់ច្រើនហើយ កុំផឹកច្រើនពេក ខ្លាចស្រវឹងគេធ្វើបាប និងគ្មានអ្នកណាជួយជូនទៅផ្ទះទេ» ។
តាមប្រភពដដែលបានបន្តថា ស្រាប់តែភ្លាមៗនោះ នារីរងគ្រោះគិតច្រើន និងបែកគំនិតជិះម៉ូតូកង់បីសំដៅទៅមុខព្រះអង្គដង្កើ រួចក៏ធ្វើសកម្មភាពលោតទឹកបម្រុងសម្លាប់ខ្លួន តែសំណាងល្អត្រូវបានប្រជាពលរដ្ឋដែលនៅម្ដុំនោះជួយសង្គ្រោះទាន់ពេលវេលា ដោយស្រង់នារីរងគ្រោះឡើងមកលើគោក និងនិយាយលួងលោមបានមួយសន្ទុះ ស្រាប់តែនាងគិតពិចារណាបានបន្តិចក៏សម្រេចចិត្តលោតទឹកសម្លាប់ខ្លួនម្តងទៀត ធ្វើឱ្យបុរស៥នាក់ដែលនៅកន្លែងកើតហេតុ ស្ទុះលោតទឹកទៅជួយសង្គ្រោះបានម្តងទៀត ទើបទំនាក់ទំនងហៅគាត់ជាបងស្រីធម៌ឲ្យមកកន្លែងកើតហេតុដើម្បីមកទទួលយកនារីរងគ្រោះត្រឡប់ទៅផ្ទះវិញ ។
បើតាមនារីដែលប៉ុនប៉ងលោតទឹកសម្លាប់ខ្លួនមួយភ្លែត២ដងបានឈររៀបរាប់ទាំងទឹកភ្នែកទឹកសំបោរថា គាត់មានវិបត្តិផ្លូវចិត្ត ដោយសារគាត់ជាកូនកំព្រាអត់មានសាច់ញាតិ ទើបប្រជាពលរដ្ឋដែលជួយសង្គ្រោះនិងលួងលោមគាត់ឲ្យត្រឡប់ទៅផ្ទះវិញ ។
ក្រោយពេលកើតហេតុ នារីរងគ្រោះបានឡើងជិះម៉ូតូកង់បីទៅតាមបងស្រីធម៌ដើម្បីត្រឡប់ទៅផ្ទះវិញ ប៉ុន្តែក៏មានអ្នកសារព័ត៌មានជួយជូនទៅផ្ទះផងដែរ ព្រោះខ្លាចនាងគិតខ្លីទៀត ហើយម្យ៉ាងទៀតខ្លាចមានបញ្ហាតាមផ្លូវ ៕ (កែសម្រួលដោយ ៖ ធីតា)
ចែករំលែកព័តមាននេះ